မန္တလေးမြို့မီး နေအိမ် ၆လုံး ပြာကျ

မတ်-၁၀၊ ၂၀၂၆။မေရီ/People’s Spring

မန္တလေးမြို့မှာ မနေ့ မတ်လ ၉ရက် ညက မီးလောင်မှုကြောင့် နေအိမ် ၆လုံး မီးလောင်ဆုံးရှုံးခဲ့ပါတယ်။

မနေ့က မတ်လ ၉ ရက် ည ၇ နာရီခွဲခန့်က မန္တလေးမြို့၊ ပြည်ကြီးတံခွန်မြို့နယ်၊ တံခွန်တိုင်ရပ်ကွက်၊ ဈေးတန်းရပ်မှာ မီးလောင်ကျွမ်းမှုတစ်ခု ဖြစ်ပွားခဲ့တာပါ။

နာရီဝက်ကျော်လောင်ကျွမ်းခဲ့ရာမှာ သွပ်မိုး၊ ကျောက်ပြားကာနဲ့ ထရံကာနေအိမ် စုစုပေါင်း ၆ လုံး၊ CZI-125 အမျိုးအစား ဆိုင်ကယ် ၂စီးနဲ့ နေအိမ်အတွင်းရှိ လူသုံးကုန်ပစ္စည်းတွေ ဆုံးရှုံးခဲ့တယ်လို့ မီးသတ်ဌာနက ထုတ်ပြန်ပါတယ်။

Public Service Announcement

“မီးကတအား များတယ်။ ကြောက်စရာကြီး။ အိမ်နဲ့နည်းနည်းဝေးသေးတာကို အပူတွေကလာဟပ်တာ။ ထိန်းနိုင်သွားလို့တော်သေးတယ်”လို့ စျေးတန်းရပ်မှာနေထိုင်တဲ့ အမျိုးသမီးတစ်ဦးက ပြောပါတယ်။

အဆိုပါမီးဟာ ​ဖယောင်းတိုင်မီးပူဇော်ရာကနေ စတင်လောင်ကျွမ်းတယ်လို့ မီးသတ်ကဆိုပါတယ်။ အဲဒီဖြစ်စဥ်ကြောင့် မီးစလောင်တဲ့နေအိမ်က အသက် ၅၇ နှစ်အရွယ် အမျိုးသားတစ်ဦးကို အမှုဖွင့်ခံရတယ်လို့ သိရပါတယ်။

မန္တလေးမြို့ဟာ နွေမပေါက်ခင်ကတည်းက မီးလောင်ကျွမ်းမှုမကြာခဏ ဖြစ်ပွားနေတာပါ။ ဒါ့အပြင် လက်တလော စက်သုံးဆီရှားပါးမှုကြောင့် နေအိမ်တွေမှာ စက်သုံးဆီတွေ သိုလှောင်နေကြတဲ့အတွက် မီးဘေးအန္တရာယ်စိုးရိမ်နေရတယ်လို့ မြို့ခံတွေက ပြောပါတယ်။