မတ်-၁၃၊ ၂၀၂၆။ဇေအောင်/People’s Spring
မန္တလေးမြို့က စက်သုံးဆီဆိုင်တွေမှာ ဆိုင်ကယ်တွေကို ၂ လီတာအပြည့် ရောင်းမပေးဘဲ ကျပ် ငါးထောင်ဖိုးသာရောင်းပေးလို့ အခက်အခဲတွေ့နေကြောင်း ဆိုင်ကယ်စီးနင်းသူ မြို့ခံတွေက ပြောပါတယ်။
ပြီးခဲ့တဲ့ မတ်လ ၆ ရက်ကစပြီး စစ်ကောင်စီက ဆိုင်ကယ်တစ်စီး ၂လီတာနှုန်းနဲ့ ရောင်းချဖို့ ကန့်သတ်လိုက်ပေမဲ့ မန္တလေးမြို့က စက်သုံးဆီဆိုင်တွေမှာတော့ လီတာနဲ့မသတ်မှတ်ဘဲ ကျပ်ငါးထောင်ဖိုးသာ ရောင်းချပေးနေကြောင်း၊ ဒီကနေ့ဆိုရင် မန္တလေးမြို့မှာ 92 ဓာတ်ဆီ တစ်လီတာ ၂၉၄၀ ကျပ်၊ 95 ဓာတ်ဆီ တစ်လီတာ ၃၀၄၅ ကျပ် ဝန်းကျင် ရှိနေတဲ့အတွက် ကျပ်ငါးထောင်ဖိုးဟာ၂ လီတာမရတာကြောင့်အခက်အခဲရှိနေကြောင်း မြို့ခံအချို့က ပြောပါတယ်။
“ဆိုင်တွေက ၂ လီတာပြည့်အောင်မပေးဘူး။ ငါးထောင်ဖိုးပဲပေးတယ်။ တစ်ရက်ခြား ၂ လီတာတောင်မလောက်တာ။ ပြည့်အောင်ရောင်းမပေးတော့ ပိုဆိုးတယ်”လို့ မန္တလေးမြို့ပေါ်နေ ဆိုင်ကယ်စီးနင်းသူ အမျိုးသမီးတစ်ဦးက ပြောပါတယ်။
Public Service Announcement
ဒါ့အပြင် စစ်ကောင်စီက QR စနစ်နဲ့အပြင် စုံ၊မစနစ်နဲ့လည်း တစ်ရက်ခြားတစ်ကြိမ်သာ ဝယ်ယူခွင့်ကန့်သတ်ထားတာကြောင့် လုပ်ငန်းသုံးဆိုင်ကယ်တွေ စက်သုံးဆီအခက်အခဲရှိနေတယ်လို့ ဆိုင်ကယ်စီးနင်းသူတွေက ပြောပါတယ်။
စစ်ကောင်စီဟာ ယာဥ်အမျိုးအစားအလိုက် တစ်ကြိမ်ဝယ်ရင် ဆိုင်ကယ် ၂ လီတာ၊ သုံးဘီးနဲ့ အိုးဝေ ၄ လီတာ၊ အိမ်စီးကားများ ၁၂ လီတာ၊ Light Truck (အိမ်စီးကားအမျိုးအစား)၂၀ လီတာ၊ ခရီးသည်တင်ယာဉ်နဲ့ ကုန်ကားကြီးများ ၅၀ လီတာ သာ တစ်ရက်ခြား ဝယ်ယူခွင့် ကန့်သတ်ထားတာဖြစ်ပါတယ်။
ဒါ့အပြင် အရောင်းဆိုင်တွေအနေနဲ့ မနက် ၆ နာရီကနေ ညနေ ၆ နာရီအတွင်းသာ ရောင်းချရမည်ဖြစ်ပြီး၊ ပုံး သို့မဟုတ် ပေပါနဲ့ ရောင်းချခြင်းကို လုံးဝခွင့်မပြုဘဲ တားမြစ်ထားတယ်လို့ သိရပါတယ်။
