မတ်-၂၇၊၂၀၂၆။အိမ်သွင်/People’s Spring
၁၀၂၇ စစ်ဆင်ရေးအောင်မြင်မှုတွေကြောင့် နွေဦးတော်လှန်ရေးတပ်ဖွဲ့တိုင်းက လေးစားအားကျ အတုယူနေကြရတဲ့ TNLAနဲ့ MNDAA အနေနဲ့ လက်ရှိဖြစ်ပွားနေတဲ့ စစ်ရေးပဋိပက္ခတွေဟာ စစ်အာဏာရှင်တော်လှန်ရေးကို အကျိုးသက်ရောက်စေတဲ့အတွက်တွေ့ဆုံဆွေးနွေး အဖြေရှာဖို့ နွေဦးတော်လှန်ရေးမဟာမိတ်တပ်ပေါင်းစု(SRA)ဦးဆောင်ကော်မတီကမေတ္တာရပ်ခံတိုက်တွန်းကြောင်းထုတ်ပြန်လိုက်ပါတယ်။
တိုက်ပွဲစတင်ဖြစ်ပွားခဲ့တဲ့မတ်လ၁၄ရက်ကတောင်းဆိုချက်ကို မတ်လ ၁၆ရက်မှာ SRAရဲ့ ဖေစ်ဘွခ်စာမျက်နှာကနေထုတ်ပြန်တာဖြစ်ပါတယ်။
ညီနောင်မဟာမိတ်(၃)ဖွဲ့ဖြစ်တဲ့ TNLA၊MNDAA နဲ့AA တို့၏ ၁၀၂၇ စစ်ဆင်ရေး အောင်မြင်မှုကနေ အချင်းချင်းကြား မဟာမိတ်ခိုင်မာမှု၊ အဖိနှိပ်ခံအချင်းချင်း သွေးစည်းညီညွတ်ကြမှုရှိခြင်းတို့အပေါ် နွေဦးတော်လှန်ရေးတပ်ဖွဲ့တိုင်းက လေးစားအားကျ အတုယူနေကြတယ်လို့တောင်းဆိုချက်မှာဖော်ပြထားပါတယ်။ ၁၀၂၇ စစ်ဆင်ရေးမှာလည်း ညီနောင်မဟာမိတ်(၃)ဖွဲ့နှင့်အတူ SRA အဖွဲ့ဝင် တပ်ဖွဲ့တွေက ပူးပေါင်းပါဝင်တိုက်ခိုက်ပြီးစစ်အာဏာရှင်စနစ်ကို ချေမှုန်းခွင့်ရခဲ့တဲ့အတွက်အစဉ်အမြဲ ဂုဏ်ယူလျက်ရှိတယ်လို့လည်းဖော်ပြပါတယ်။
Public Service Announcement
လက်ရှိ အချင်းချင်း လက်နက်ကိုင်ပဋိပက္ခဖြစ်နေခြင်းက သက်ဆိုင်ရာအဖွဲ့အစည်းနှစ်ခုတည်းသာ ထိခိုက်ခြင်းမဟုတ်ဘဲတော်လှန်ရေးတစုံလုံးအတွက်ပါ အကျိုးသက်ရောက်မှုများစွာ ရှိနေကြောင်းနဲ့ပြည်သူတွေ ယုံကြည်မျှော်လင့်နေကြတဲ့ ပြည်ထောင်စုတခုလုံးရဲ့အကျိုးကို မျှော်ကိုးပြီး အခတွေ့ဆုံဆွေးနွေး အဖြေရှာကြဖို့ တိုက်တွန်းထားပါတယ်။
အာရက္ခတပ်တော်(AA)၊ တအာင်းအမျိုးသားလွတ်မြောက်ရေးတပ်မတော်(TNLA)နဲ့ မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA) ဟာ ၂၀၂၃ အောက်တိုဘာလ ၂၇ရက်မှာ ၁၀၂၇ စစ်ဆင်ရေးဖော်ဆောင်ပြီး စစ်ကောင်စီထိန်းချုပ်ထားတဲ့မြို့ပေါင်း ဆယ်နဲ့ချီပြီး ရှမ်းပြည်နယ်မြောက်ပိုင်းတစ်ခုလုံးနီးပါးကိုသိမ်းပိုက်ထိန်းချုပ်နိုင်ခဲ့ပါတယ်။MNDAAက ရှမ်းပြည်နယ်မြောက်ပိုင်းမှာ လားရှိုး၊ လောက်ကိုင်၊ ချင်းရွှေဟော်၊ မုန်းကိုး၊ ဖောင်းဆိုင်၊ ကုန်းကြမ်း၊ ပန်လုံ၊ ကွမ်းလုံ၊ သန္နီ၊ တာမိုးညဲ၊ ပန်ဆိုင်း မြို့တွေကိုသိမ်းပိုက်ခဲ့ပါတယ်။ တရုတ်အစိုးရရဲ့ ဖိအားကြောင့် လားရှိုးမြို့ကို ၂၀၂၅ ခုနှစ် ဧပြီလမှာ စစ်ကောင်စီထံ ကျည်တချက်မဖောက်ရပဲ ပြန်လွှဲပေးခဲ့ရပါတယ်။
TNLAက ၁၀၂၇ စစ်ဆင်ရေးနဲ့အတူ ရှမ်းပြည်နယ်မြောက်ပိုင်းမှ သီပေါ၊ ကျောက်မဲ၊ နမ့်ဆန်၊ မိုင်းလုံ၊ မိုးမိတ်၊ မိုးကုတ်၊ မန်တုံ၊နမ္မတူ၊ ကွတ်ခိုင်၊ နောင်ချို၊နမ့်ခမ်းနှင့် မိုင်းငေါ့မြို့တို့ကို သိမ်းပိုက်ထိန်းချုပ်ခဲ့ပါတယ်။နောင်ချို၊ သီပေါ၊ ကျောက်မဲ၊မြို့တွေကို စစ်ကောင်စီက ပြန်လည်ထိုးစစ်ဆင်ထိန်းချုပ်သွားပါတယ်။ မိုးမိတ်၊ မိုးကုတ်မြို့တွေကိုတော့ တရုတ်ရဲ့ကြားဝင်မှုဖြင့် TNLAနဲ့စစ်တပ်တို့တွေ့ဆုံဆွေးနွေးပြီး TNLA ကပြန်လွှဲပေးခဲ့ပါတယ် ။
TNLAနဲ့ MNDAA ဟာ မတ်လ၁၄ရက်နေ့ကစတင်ပြီး ကွတ်ခိုင်မြို့မှာ တိုက်ပွဲဖြစ်ပွားခဲ့ပါတယ်။ ဒီနေ့ တိုက်ပွဲကာလ၃ရက်မြောက်နေ့ဖြစ်ပြီး ကွတ်ခိုင်မြို့ကို MNDAAက ထိန်းချုပ်ထားပါတယ်။ နမ့်ခမ်းမြို့အပါအဝင်TNLA ထိန်းချုပ်ထားတဲ့မြို့တွေကို MNDAAက ဆက်လက်တိုက်ခိုက်နိုင်ကြောင်းသတင်း တွေထွက်ပေါ်နေပါတယ်။
MNDAAနဲ့ TNLA တိုက်ပွဲဟာ ဒေသခံပြည်သူလူထုကို လုံခြုံရေးအရခြိမ်းခြောက်နေပြီးအပစ်ရပ်ကြဖို့နဲ့ တွေ့ဆုံဆွေးနွေးကြဖို့ အရပ်ဖက်အဖွဲ့အစည်းတွေက တိုက်တွန်းနေကြပါတယ်။
တအာင်းအရပ်ဘက်အဖွဲ့အစည်းများကွန်ရက်၊ ကျန်းမာရေးအင်အားစု မန္တလေး၊ ကျန်းမာရေးအင်အားစုတအာင်းပြည်နဲ့ကျန်းမာရေးအင်အားစုအထူးဒေသ(၁)၊ ကလည်း TNLAနဲ့ MNDAAအပစ်ရပ်ကြဖို့ တိုက်တွန်းချက်ထုတ်ပြန်ထားပါတယ်။
အမျိုးသားညီညွတ်ရေးအတိုင်ပင်ခံကောင်စီ(NUCC)က TNLA နဲ့ MNDAA မဟာမိတ်တပ်တွေကြား တိုက်ပွဲ ချက်ချင်းရပ်တန့်ဖို့နဲ့ နိုင်ငံရေးအရ ငြိမ်းချမ်းစွာ တွေ့ဆုံဆွေးနွေးဖြေရှင်းကြဖို့မေတ္တာရပ်ခံထားပါတယ်။
နွေဦးတော်လှန်ရေးမဟာမိတ်တပ်ပေါင်းစု (Spring Revolution Alliance – SRA)ဟာ စစ်အာဏာရှင်စနစ်ကို တိုက်ဖျက်ဖို့အတွက်နွေဦးတော်လှန်ရေးမှာ ဒေသအသီးသီးက တော်လှန်ရေးအင်အားစုတွေ စုပေါင်းဖွဲ့စည်းထားတဲ့ မဟာမိတ်အဖွဲ့အစည်း ဖြစ်ပါတယ်။အမျိုးသားညီညွတ်ရေးအစိုးရ(NUG)၊ ကာကွယ်ရေးဝန်ကြီးဌာန (MOD)နဲ့လည်း ချိတ်ဆက်မှုတွေရှိသလို၊ ဒေသတွင်းတိုင်းရင်းသားလက်နက်ကိုင် (EAO) တွေနဲ့လည်း မဟာမိတ် ပြုလုပ်ထားပါတယ်။
