ရေဖြူမြို့နယ်မှာ စစ်တပ် လက်နက်ကြီးထိမှန်လို့ ပြည်သူ၂ဦး သေဆုံး၊ကလေး ၁ဦး ဒဏ်ရာရ

မတ်-၂၁။ ၂၀၂၆။ ထားမြတ်/People’s Spring

တနင်္သာရီတိုင်း၊ ရေဖြူမြို့နယ် ရားဖူးကျေးရွာမှာ အာဏာသိမ်းစစ်တပ်က ပြည်သူလူထု နေထိုင်ရာကျေးရွာအတွင်းကို လက်နက်ကြီးနဲ့ ပစ်ခတ်ခဲ့လို့ ပြည်သူ ၂ဦးသေဆုံးခဲ့တယ်လို့ ကရင်အမျိုးသားအစည်းအရုံး(KNU) မြိတ်ထားဝယ်ခရိုင်က ထုတ်ပြန်ပါတယ်။

KNU အုပ်ချုပ်နယ်မြေသတ်မှတ်ချက်အရ လယ်ဒိုစိုးမြို့နယ် ဒဝယ်ခီးကျေးရွာအုပ်စု ရာဖူးကျေးရွာကို စစ်ကောင်စီက မတ်လ ၂၀ရက်မှာ လက်နက်ကြီးနဲ့ တိုက်ခိုက်ခဲ့တာပါ။ လယ်ဒိုစိုးမြို့နယ်ဆိုတာ ရေဖြူနဲ့ ထားဝယ်မြို့နယ်အတွင်းက နယ်မြေဒေသတွေ ပါဝင်ပါတယ်။

ရားဖူးရွာဟောင်းမှာ တပ်စွဲထားတဲ့ စစ်ကောင်စီတပ်ရဲ့ ပူးပေါင်းစစ်ကြောင်းက ၁၂၀ မမ လက်နက်ကြီးနဲ့ ၁၀လုံးထက်မနည်း ပစ်ခတ်ခဲ့လို့ ပြည်သူ ၂ဦး ထိမှန်သေဆုံးပြီး (၁၀)နှစ်အောက်ကလေးငယ် ၁ဦး ဒဏ်ရာရခဲ့ကြောင်း KNUက ထုတ်ပြန်ပါတယ်။

Public Service Announcement

အခု မတ်လအတွင်းမှာ စစ်ကောင်စီ တပ်စခန်းအချို့ကို တိုက်ခိုက်သိမ်းပိုက်ထားတဲ့ KNU မြိတ်ထားဝယ်ခရိုင် တပ်မဟာ(၄) နယ်မြေကို စစ်ကောင်စီကလည်း လေကြောင်း တိုက်ခိုက်တာ၊ လက်နက်ကြီးနဲ့ တိုက်ခိုက်တာတွေ ဆက်တိုက်ပြုလုပ်ခဲ့ပါတယ်။

မတ်လ ၁၁ရက်က သိမ်းပိုက်ခံရတဲ့ ဝင်း၀ စစ်ကောင်စီတပ်စခန်းသိမ်းတိုက်ပွဲ ကာလမှာလည်း စစ်ကောင်စီဟာ ဝင်း၀ စခန်းတည်ရှိရာ သရက်ချောင်းမြို့နယ် အပါအဝင် KNU တပ်မဟာ(၄)နယ်မြေတွေက အရပ်သား နေထိုင်ရာတွေကို လေကြောင်းဗုံးကြဲတိုက်ခိုက်တာတွေ ဆက်တိုက်ပြုလုပ်ခဲ့လို့ ကလေးငယ်တွေအပါအဝင် အရပ်သားသေဆုံးထိခိုက်မှုတွေ အများအပြားဖြစ်ခဲ့ပါတယ်။

ဝင်း၀ တပ်စခန်း အသိမ်းခံရပြီးနောက်ပိုင်းမှာလည်း စစ်ကောင်စီတပ်ဟာ လေကြောင်းကနေ ဗုံးကြဲတိုက်ခိုက်မှုတွေ ဆက်လက်ပြုလုပ်နေကြောင်း KNUက ဓာတ်ပုံမှတ်တမ်းတွေနဲ့အတူ အအသိပေး ထုတ်ပြန်ပါတယ်။