ဧပြီ-၆ ၊၂၀၂၆။ဖိုးသား/People’s Spring
မကွေးတိုင်း၊ မင်းဘူးမြို့နယ်မှာ စစ်တပ်နဲ့ တော်လှန်ရေးတပ်တွေ တစ်ပတ်နီးပါးကြာတိုက်ပွဲဖြစ်ပွားခဲ့တယ်လို့ မင်းဘူးခရိုင်၊အမှတ်(၆)တပ်ရင်းက ဒီကနေ့ ဧပြီ ၆ရက်မှာ ထုတ်ပြန်ပါတယ်။
မတ်လ ၂၉ ရက်ကစခဲ့ပြီး ၆ရက်ကြာတဲ့ အဲဒီတိုက်ပွဲက အင်အား ၁၂၀ကျော် ပါတဲ့ စစ်တပ်စစ်ကြောင်းကို မင်းဘူးမြို့ရဲ့အနောက်ခြမ်းက ရှော်ဖြူတောကျေးရွာမှာ ဆီးကြိုတိုက်ခိုက်ခဲ့တယ်လို့ ဆိုပါတယ်။
အဲဒီနောက် မတ်လ ၃၁ရက်မှာ စစ်တပ်က မုတ္ထောကြီးကျေးရွာမှာ အထိုင်ချပြီး မန်းချောင်းအနောက်ဘက်က မရှက်ကျေးရွာကို စစ်ကြောင်းထိုးလာချိန်မှာ ဒရုန်းတွေနဲ့ တန်ပြန်တိုက်ခိုက်ခဲ့တယ်လို့ အသိပေးပါတယ်။
Public Service Announcement
အခုဧပြီ ၁ ရက်မှာ မင်းရွာကတဆင့် မရှက်ကျေးရွာဘက်ကို စစ်ကြောင်းထိုးလာတာကြောင့် မင်းရွာနဲ့ မရှက်ရွာကြားမှာ တစ်ကြိမ်၊ ဖြူကုန်းရွာနားမှာ တစ်ကြိမ် မင်းဘူးခရိုင်တပ်ရင်းတွေက ကြားဖြတ်တိုက်ခဲ့တယ်လို့ ဖော်ပြပါတယ်။
စစ်တပ်ဟာ မင်းရွာကိုပြန်ဆုတ်သွားပြီး တိုက်ခိုက်မှုတွေအတွင်း စစ်တပ်က ၁၀ ဦးကျော်ထိခိုက်ဒဏ်ရာရတယ်လို့ ဆိုပါတယ်။
“မြို့ပေါ်က ပျူတွေနဲ့ ခလရ(၈၈)နဲ့ ခလရ(၁၀)က ထုတ်နှုတ်အင်အားတွေနဲ့လာတာ”မင်းဘူးခရိုင်၊အမှတ်(၆)တပ်ရင်းတာဝန်ရှိသူက ပြောပါတယ်။
စစ်တပ်စစ်ကြောင်းရဲ့ ဒရုန်းနဲ့ လေယာဥ်နဲ့ ဗုံးကြဲမှုတွေကြောင့် မရှက်ရွာနဲ့ ကြီးကန်ကျေးရွာက အရပ်သား ၂ဦး ဒဏ်ရာရခဲ့ပါတယ်။
လက်ရှိစစ်တပ်စစ်ကြောင်းဟာ မဆုတ်ခွာသေးတာကြောင့် ကျေးရွာ ၂၀ကျော်က ဒေသခံ ပြည်သူ ၄၀၀၀ကျော်ဟာ ဘေးလွတ်ရာတိမ်းရှောင်နေရပါတယ်။
