မေ ၁၊ ၂၀၂၆။ဟာနာဆန်/People’s Spring
မန္တလေးမြို့ရဲ့ အထင်ကရနေရာတစ်ခုဖြစ်တဲ့ မန္တလေးတောင်ပေါ်မှာ အာဏာသိမ်းစစ်တပ်က ကင်းချထားပြီး တောင်တက်ကားလမ်းမှာ အားကစားပြုလုပ်သူတွေ တက်ရောက်ခွင့် ပိတ်ပင်ထားကြောင်း မြို့ခံတွေက ပြောပါတယ်။
ပြီးခဲ့တဲ့ ဧပြီ၂၉ ရက် ညနေ ၆ နာရီခွဲခန့်က မန္တလေးတောင်ပေါ် တောင်တက်ကားလမ်းကနေ ပုံမှန်အားကစားတက်ရောက်လေ့ရှိသူ အပြေးသမားအချို့ကို စစ်ကောင်စီတပ်ဖွဲ့ဝင်တွေက ခေါ်ယူသတိပေးမှုများ ပြုလုပ်ခဲ့ကြောင်း၊ ၎င်းတို့ ပြောကြားချက်အရ နောက်ရက်တွေကစပြီး မန္တလေးတောင် အတက်အဆင်းလမ်းတလျှောက်မှာ အပြေးလေ့ကျင့်တာ၊ စက်ဘီးစီးတာနဲ့ လမ်းလျှောက်တာစတဲ့ ဘယ်အားကစားလှုပ်ရှားမှုကိုမဆို ခွင့်မပြုတော့ကြောင်းပြောကြားခဲ့တယ်လို့ တောင်ပေါ်တက်ရောက်လေ့ရှိသူတွေက ပြောပါတယ်။
“အရင်ကလည်း ဆိုင်ကယ်နဲ့တက်ရင် သေနတ်တွေနဲ့လိုက်ကြည့်နေတာ။ တောင်အဆင်းလမ်းဆုံတပ်က ပိုဆိုးတယ်။ ရစ်တယ်။ အခုတော့ မန္တလေးတောင်ပေါ်ကို အပြေး၊ စက်ဘီး၊ လမ်းလျှောက် ဘယ်ဟာမှ မတက်ဖို့ တားမြစ်လိုက်တာ”လို့ ဒေသခံတစ်ဦးက ပြောပါတယ်။
Public Service Announcement
လက်ရှိမှာ မန္တလေးတောင်ပေါ်၌ လုံခြုံရေးအကြောင်းပြချက်နဲ့ တောင်ဆင်းတောင်တက်ကားလမ်းကို ကန့်သတ်ချက်တွေ ပြုလုပ်ထားခြင်းဖြစ်ပြီး စောင်းတန်းကတက်တာတွေကိုတော့ တားမြစ်တာမရှိသေးဘူးလို့ သိရပါတယ်။
မန္တလေးတောင်ပေါ်မှာ စစ်တပ်က အာဏာသိမ်းကာလအစောပိုင်းကတည်းက လုံခြုံရေးယူထားတာဖြစ်ပြီး လက်နက်ကြီးတွေပါ တပ်ဆင်ထားကြောင်း ဒေသခံတွေက ပြောပါတယ်။
