ပေါက်မြို့နယ်က ပျူစောထီးရွာတွေ တိုက်ခိုက်ခံနေရလို့ စစ်တပ် လေကြောင်းကအပြင်းအထန် ခုခံနေ

ဇွန် -၃၊၂၀၂၆။ဖိုးသား/People’s Spring

မကွေးတိုင်း၊ ပေါက်မြို့နယ်က ပျူစောထီးကျေးရွာတွေ တိုက်ခိုက်ခံနေရလို့ စစ်တပ်ကလေကြောင်းကနေ အပြင်းအထန်ခုခံနေတယ်လို့ ဒေသခံသတင်းရင်းမြစ်တွေက လူထုနွေဦးကို ပြောပါတယ်။

မနေ့က(‌ဇွန်လ ၂ ရက်)ကစပြီး ပေါက်မြို့နယ် အရှေ့တောင်ဘက်ခြမ်းက စစ်တပ်အ‌‌ခြေပြု ကျေးရွာတွေ နဲ့ စစ်တပ်စခန်းရှိတဲ့ နေရာတွေကို ဒေသခံတော်လှန်ရေးအဖွဲ့တွေက ထိုးစစ်ဆင်တိုက်ခိုက်နေတာလို့ ဆိုပါတယ်။

“ရွာတစ်ခု တော့ရပြီ။စစ်တပ်ရဲ့ စစ်ကူစစ်ကြောင်းကို ကြားဖြတ်တိုက်နေတာတွေလည်း ရှိတယ်။အခြေအနေကတော့ တော်တေယ်ပြင်းပြင်းထန်ထန်ပဲ “လို့ ပေါက်မြို့နယ် စစ်ရေးသတင်းရင်းမြစ်က ဒီကနေ့ အခြေအနေကို ပြောပါတယ်။

Public Service Announcement

တော်လှန်ရေးတပ်ဖွဲ့တွေ ထိုးစစ်ဆင်နေတဲ့ ပျူစောထီးကျေးရွာတွေဟာ အာဏာသိမ်းပြီး ၂၀၂၁ ကတည်းက စစ်တပ်ဖွဲ့စည်းထားတဲ့ ပြည်သူ့စစ်ရွာတွေလို့ အသိပေးပါတယ်။

“မနေ့ကဆို ဂျက်ဖိုက်တာနဲ့ Y 12 ချည်းပဲ ၁၀ စီး ထက်မနည်း သုံးပြီး ဗုံးတွေဆက်တိုက်ကြဲတယ်။ဒီနေ့မနက်လည်း Y 12 နဲ့လာကြဲတယ်”လို့ အသက် ၃၀ အရွယ်ပေါက်မြို့နယ်ဒေသခံတစ်ဦးက ပြောပါတယ်။

မကွေးတိုင်းက မြို့နယ်တွေမှာ ပေါက်မြို့နယ် ဟာ စစ်တပ်အမာခံ ကျေးရွာအများစုရှိပြီး ဇီးပြား၊ ဝန်ကျုံး၊ သစ်ချိုကုန်း၊ ကုက္ကိုလ်စု၊ အင်မထီး၊ ရေပြာ ရွာတွေဟာ ‌ဒေသတွင်း ပြည်သူ့စစ်(ပျူစောထီး)ရွာကြီးတွေအဖြစ် နာမည်ကျော်ပါတယ်။

ပေါက်မြို့နယ်နဲ့ကပ်လျက်ရှိတဲ့ မြိုင်မြို့နယ်မှာလည်း စစ်တပ်အ‌ခြေစိုက်ထားတဲ့ သရက်ကန် ပျူစောထီးရွာကို တော်လှန်ရေးပူးပေါင်းတပ်က ပြီးခဲ့တဲ့ရက်ပိုင်းက သိမ်းပိုက်ထားပါတယ်။