ဇွန်-၂၄၊၂၀၂၆။သတိုး/People’s Spring
လူထုခေါင်းဆောင် ဒေါ်အောင်ဆန်းစုကြည် အသက်ရှင်နေသေးကြောင်း သက်သေပြဖို့တောင်းဆိုတဲ့ Proof Of Life ကမ်ပိန်း ၂လကြာတဲ့အထိ စစ်တပ်က တုံ့ပြန်မှု တစ်စုံတစ်ရာမရှိသေးဘူးလို့ ဒီကမ်ပိန်းကိုစတင်ခဲ့တဲ့ All In One Piece Movement က အသိပေးထားပါတယ်။
” နိုင်ငံတကာက တောင်းဆိုနေတာကိုလည်း စစ်အုပ်စုက သိတယ်။သားဖြစ်သူက တောင်းဆိုနေတာကိုလည်း စစ်အုပ်စုက သိတယ်။ပြည်သူတွေက တောင်းဆိုနေတာကိုလည်း စစ်အုပ်စုက သိတယ်။မင်းတို့ စစ်အုပ်စုက အမေဒေါ်အောင်ဆန်းစုကြည်ကို အစဖျောက်ဖို့ ကြိုးစားနေတာကိုလည်း ငါတို့အားလုံး သိတယ်။အခုအချိန်အထိ အမေစု သက်ရှိထင်ရှား ရှိနေသေးကြောင်း ခိုင်မာတဲ့ သက်သေကို ပြည်သူတွေရှေ့ မပြနိုင်သေးတာ ဘာကြောင့်လဲ။အမေစု သက်ရှိထင်ရှား ရှိနေသေးကြောင်း ခိုင်မာတဲ့ သက်သေကို ပြသပါ။”လို့ ဇွန်လ ၂၃ ရက်က ထပ်မံတောင်းဆိုထားပါတယ်။
စစ်တပ်အနေနဲ့ ဒေါ်အောင်ဆန်းစုကြည်ကို အစဖျောက်ဖို့ ကြိုးစားမယ်ဆိုရင် ပြည်သူတွေရဲ့ဒေါသ၊ နိုင်ငံတကာ အသိုက်အဝန်းရဲ့ ဖိအားနဲ့ ဖြစ်ပေါ်လာမယ့် အကျိုးဆက်တွေကို ရင်ဆိုင်ရမယ်ဆိုတာ သိထားဖို့ လိုတယ်လို့ သတိပေးထားပါတယ်။
Public Service Announcement
ဒါကြောင့် ပြည်သူတွေတောင်းဆိုနေတဲ့ ဒေါ်အောင်ဆန်းစုကြည်ရဲ့ လက်ရှိအခြေအနေကို ပွင့်လင်းမြင်သာစွာ အတည်ပြုပေးဖို့ All In One Piece Movement က တောင်းဆိုထားပါတယ်။
Proof Of Life ကမ်ပိန်းကို ဧပြီ ၂၁ ရက်ကစတင်ခဲ့တာဖြစ်ပြီး ၂လတာ ကာလအတွင်းမှာ ပြည်တွင်း ၊ပြည်ပက ပြည်သူတွေကလည်း Proof Of Life ကမ်ပိန်းအတွက် လှုပ်ရှားမှုတွေဆက်တိုက်ပြုလုပ်ပြီး တောင်းဆိုနေကြတာပါ။
စစ်တပ်ကတော့ ဒေါ်အောင်ဆန်းစုကြည်နဲ့ ပတ်သက်ပြီး တိကျတဲ့အချက်အလက် တစ်စုံတစ်ရာ တုံ့ပြန်တာမျိုးမရှိသေးပါဘူး။
မေလ ၁ ရက်က ဒေါ်အောင်ဆန်းစုကြည်ကို နေပြည်တော်အကျဉ်းထောင်ကနေ သတ်မှတ်ထားတဲ့နေအိမ်ကို ရွှေ့ပြောင်းတယ်လို့ ဓာတ်ပုံတစ်ပုံနဲ့ ထုတ်ပြန်ခဲ့ပေမယ့် အဲဒီ့ဓာတ်ပုံ က ဘယ်အချိန်ရိုက်ကူးထားတယ်ဆိုတာဘယ်သူမှ အတည်ပြုမပေးနိုင်ပါဘူး။
