ဖားကန့်မှာ ရေကျသွားပေမယ့် ဒေသခံတွေ သွားလာနေထိုင်ရေး အခက်ကြုံနေ

ဇူလိုင် -၂၂၊ ၂၀၂၆ /People’s Spring

ကျောက်စိမ်းမြို့တော်ဖားကန့်မှာပြီးခဲ့တဲ့ ရက်ပိုင်းက ရေဘေးသင့်ခဲ့ပြီး လတ်တလောမှာရေကျသွားပေမယ့်မြေနိမ့်ပိုင်းရပ်ကွက်တွေမှာ သွားရေးလာရေးနဲ့ စားဝတ်နေရေးအခက်အခဲကြုံနေရတယ်လို့ ဒေသခံအချို့ဆီကသိရပါတယ်။

“ရေကတော့ ပြန်ကျနေတယ်၊တချို့နေရာတွေကားသွားလို့ရတယ်ပေါ့ ၊ဒါပေမယ့် ပြန်လည်ထူထောင်ရေးက မလုပ်နိုင်သေးပါဘူး ၊ရေနစ်ထားတဲ့နေရာတွေကချက်ချင်းပြန်နေဖို့ မဖြစ်နိုင်ဘူး” လို့ ဒေသခံတစ်ဦးကပြောပါတယ်။

ဒီနေ့ (ဇူလိုင်လ ၂၂ ရက်)မှာတော့ မြို့ပေါ် ရပ်ကွက်ဖြစ်တဲ့ မြို့မရပ်ကွက်မှာ ရေကျသွားတဲ့အတွက် စုပေါင်းသန့်ရှင်းရေးတွေ လုပ်ဆောင်နေကြပါတယ်။

Public Service Announcement

ရေကျသွားပြီးနောက်နေအိမ်တွေထဲမှာရွှံ့နဲ့အမှိုက်သရိုက်တွေတင်ကျန်ခဲ့တာကြောင့်ပြန်လည်နေထိုင်ရေးအပြင်သောက်သုံးရေနဲ့ လျှပ်စစ်မီးရရှိ အခက်အခဲဖြစ်နေတယ်လို့ သိရပါတယ်။

ပြီးခဲ့တဲ့ရက်ပိုင်းကမိုးရေကြောင့်ဥရုချောင်းရေမြင့်တက်လာပြီးဖားကန့်မြေနိမ့်ရပ်ကွက်တွေမှာ ရေအလုံးအရင်း ဝင်ရောက်ခဲ့တဲ့အတွက်နေအိမ်တွေရေနစ်မြုပ်ခဲ့တာပါ။

လက်ရှိမှာရေကျသွားပေမယ့်ရေဘေးသင့်ပြည်သူတွေကို လူမူကူညီရေး အသင်းတွေနဲ့ ဒေသခံအချို့က စုပေါင်းပြီး ထမင်းထုပ်တွေ နဲ့ ရေသန့်ဘူးတွေကို လိုက်လံလှုဒါန်းနေရပါတယ်။

“အနိမ့်ပိုင်းရပ်ကွက်တွေမှာ လှုဒါန်းမှုတွေကတော့ လုပ်နေရတုန်း ၊ရေအကုန်ကျသွားတာတောင် ချက်ချင်းနေမရတဲ့ ရပ်ကွက်တွေက လှုဒါန်းမှုတွေလိုအပ်နေဦးမှာ” လို့လူမူကူညီရေးလုပ်ကိုင်နေသူတစ်ဦးကပြောပါတယ်။

ဖားကန့် မြို့ပေါ် ရပ်ကွက်တွေဖြစ်တဲ့ မှော်ဝမ်း၊ မြို့မ၊ ငှက်ပျောတော၊ မရှီကထောင်နဲ့ အေးမြသာယာရပ်ကွက်တွေမှာ ရေဘေးသင့်ခဲ့တာဖြစ်ပြီး မှော်ဝမ်းရပ်ကွက်မှာ တော့ မြေပြိုတာကြောင့် နေအိမ်တစ်လုံးပါသွားပါတယ်။

ဒါအပြင်မနေ့ (ဇူလိုင်လ ၂၀ ရက်)ကငှက်ပျောတောရပ်ကွက်မှာရေစီးနဲ့အတူမျောပါလာတဲ့အသက်ငါးနှစ်အရွယ် ကလေးငယ် တစ်ဦးရဲ့ ရုပ်အလောင်းကိုလည်းဒေသခံတွေတွေခဲ့ပါတယ်။

အဖိုးတန်ကျောက်စိမ်းထွက်ရှိရာကချင်ပြည်နယ်၊ဖားကန့်မှာ အလွန်အကျွံ သယံဇာတထုတ်ယူမှုကြောင့် သဘာဝပတ်ဝန်းကျင် ထိခိုက်ပျက်စီးပြီး မြေပြိုကျတာတွေကြောင့် နှစ်စဉ်လူအသက်ပေါင်းများစွာဆုံးရှုံးနေတာလည်းဖြစ်ပျက်နေပါတယ်။

ပြီးခဲ့တဲ့ ရက်ပိုင်း ဇူလိုင် ၁၇ရက် ညနေပိုင်းကတင် မိုးသည်းထန်နေချိန် ကုဋေမှော်ကျောက်စိမ်းတူးဖော်ရေးလုပ်ကွက်ဟောင်းမှာ မြေစာပုံပြိုလို့ ရေမဆေးကျောက်ရှာသူ ခုနှစ်ဦး ထက်မနည်း သေဆုံးသွားခဲ့တဲ့ဖြစ်စဉ် ဖြစ်ထားပါတယ်။