ဩဂုတ်-၁၅ ၊၂၀၂၆။ဖိုးသား/People’s Spring
ဖမ်းမိထားတဲ့ ပျူစောထီး ၂ဦး ထွက်ပြေးခုခံခဲ့တာကြောင့် ပစ်ခတ်ရှင်းလင်းလိုက်ရတယ်လို့ ဧရာဒေါင်းပြည်သူ့ကာကွယ်ရေးတပ်ဖွဲ့က ဒီကနေ့ ဩဂုတ် ၁၅ရက်မှာ ထုတ်ပြန်ပါတယ်။
ပခုက္ကူခရိုင် မြစ်ခြေမြို့နယ်မှာ ဖမ်းမိတဲ့ ပျူစောထီး ၂ဦးက မနေ့က(ဩဂုတ် ၁၄ ရက်)မနက် ၄ နာရီမှာ ဖမ်းဆီးထိန်းသိမ်းထားတဲ့နေရာကနေ ထွက်ပြေးဖို့ကြိုးပမ်းခဲ့တာလို့ ဆိုပါတယ်။
သူတို့ကို လိုက်လံရှာဖွေတွေ့ရှိခဲ့ချိန်မှာ ရဲဘော်တွေကို ပြန်လည်ခုခံတာကြောင့် ပစ်ခတ်ခဲ့ရတယ်လို့ အသိပေးပါတယ်။
Public Service Announcement
အဲဒီပျူစောထီး ၂ဦးက ညောင်ဦးမြို့နယ် ပျူစောထီးခေါင်းဆောင်နောင်နောင်ကို ရှင်းလင်းစဉ် မေလ ၁၀ ရက်က ဖမ်းမိခဲ့သူတွေဖြစ်တယ်လို့ ဧရာဒေါင်းပြည်သူ့ကာကွယ်ရေးတပ်ဖွဲ့ တာ၀န်ရှိသူက ပြောထားပါတယ်။
“ပစ်ခတ်မှုဖြစ်တဲ့အချိန် သူတို့ ၂ယောက်ကတော့ ရေထဲခုန်ချလို့ မသေဘူးဗျ အရှင်မိခဲ့သူတွေ”လို့ သူက ပြောပါတယ်။
ညောင်ဦးပျူစောထီးခေါင်းဆောင် နောင်နောင်နဲ့အတူ သူတို့ ၂ဦးက အာဏာသိမ်းစစ်တပ်နဲ့အတူ ဒေသတွင်းစစ်ရေးလှုပ်ရှားမှုတွေနဲ့ အရပ်သားတွေကို ဖမ်းဆီးမှုမှာ ပါ၀င်တယ်လို့ ဆိုပါတယ်။
ဒါ့အပြင် အခုနှစ် ၂၀၂၆ မေလ နဲ့ ဇွန်လ ပထမပတ်အထိ မြစ်ခြေမြို့နယ်ကို စစ်တပ်စစ်ကြောင်းထိုးပြီး ကလေးငယ်တွေအပါအ၀င် အရပ်သား ၄၀ ကျော်ကို သတ်ဖြတ်ခဲ့တဲ့အပြင် ဒေသခံအများစုဟာ ပခုက္ကူမြို့ပေါ်မှာ စစ်ရှောင်နေကြရပါတယ်။
လက်ရှိမှာ စစ်တပ်က ပခုက္ကူမြို့နယ်၊ မြစ်ခြေ ရဲစခန်းနဲ့ မီတာ၃၀၀အကွာမှာ ဘန်ကာတွေနဲ့ အခိုင်အာတပ်စွဲပြီး မြစ်ခြေမြို့နယ်က ရှစ်မျက်နှာဘုရားမှာလည်း အထိုင်ချထားတယ်လို့ သိရပါတယ်။
