သြဂုတ် ၁၆၊ ၂၀၂၆။ ဇေရွှေပြည်စိုး၊ဇေအောင်/People’s Spring
မြန်မာ-တရုတ်နယ်စပ်၊ မူဆယ်မြို့နယ်၊ ၁၀၅မိုင် အနီး၊ခိုတိန်ကျေးရွာက ကျားဖြန့်ရုံကို တရုတ်ရဲတပ်ဖွဲ့နဲ့ စစ်တပ် ပူးပေါင်းစီးနင်းခဲ့ပြီး အဆောက်အအုံအတွင်းက ပစ္စည်းတွေအားလုံး ဒေသခံတွေကို အလကားပေးပြီး လက်စဖျောက်လိုက်တယ်လို့ ဒေသခံတွေက ပြောပါတယ်။
လူသိများတဲ့ အဲ့ဒီကျားဖြန့်ရုံကို ဩဂုတ် ၁၅ ရက်မနက်မှာ တရုတ်ရဲတပ်ဖွဲ့က ဦးဆောင်ပြီးစီးနင်းတာလို့ ခိုတိန်ရွာဒေသခံတစ်ဦးက ပြောပါတယ်။ တရုတ်နိုင်ငံသားတွေအပါအဝင် လူ၃၀၀ ကျော် ဖမ်းမိပြီး အဆောက်အအုံထဲက မွေ့ယာတွေ၊ ကွန်ပြူတာတွေနဲ့ လျှပ်စစ်ပစ္စည်းတွေအပြင် ပရိဘောဂပစ္စည်းတွေကို အလကား လာယူခိုင်းခဲ့တယ်လို့ ဆိုပါတယ်။
” လာယူလို့ရတယ်ဆိုတော့ ယူကြတာပဲ။ တွေ့သမျှလူ လာယူခိုင်းတာ။ ကျတော်ထင်တာတော့ လက်စဖျောက်တာနေမယ်။ တရုတ်ရဲကပါ ရပ်ကြည့်နေတာ”လို့ ဒေသခံက ပြောပါတယ်။
Public Service Announcement
ဒါပေမယ့် တန်ဖိုးရှိတဲ့ ပစ္စည်းတွေကိုတော့ အာဏာသိမ်းစစ်တပ်လက်အောက်ခံ မြို့နယ်အုပ်ချုပ်သူလူကြီးတွေက ဂိုဒေါင်ထဲမှာ သော့ခတ်သိမ်းထားပြီး ဘယ်သူ့မှ မပေးဘူးလို့ ဒေသခံတွေက ပြောပါတယ်။
မြန်မာနိုင်ငံက ကျားဖြန့်လုပ်ငန်းတွေဟာ ကမ္ဘာတစ်ဝန်းကငွေကြေးအမြောက်အမြား လိမ်လည်နေတာတွေနဲ့ လူကုန်ကူးမှုပြဿနာတွေကြောင့် အမေရိကန်အပါအဝင် နိုင်ငံတကာရဲ့ ပြင်းထန်တဲ့ ဖိအားတွေရှိနေပြီး အာဏာသိမ်းစစ်တပ်က အယောင်ပြဖမ်းဆီးနေတာ ဖြစ်ပါတယ်။
ရှမ်းပြည်မြောက်ပိုင်း၊မူဆယ်မြို့နယ်မှာ စစ်တပ်နဲ့ ပတ်သက်တဲ့ ကျားဖြန့်ရုံတွေ အများအပြားရှိနေပြီး မနေ့က စီးနင်းမှုဟာ တရုတ်က သတင်းအတိအကျရပြီး လာဖမ်းတာလို့ ဒေသခံတွေက ပြောပါတယ်။
