စက်တင်ဘာ ၁၉၊ ၂၀၂၆။ ထားမြတ်/People’s Spring
စစ်တပ်အာဏာသိမ်းလိုက်ခြင်းကြောင့် စစ်သားတွေ ပိုပင်ပန်းတော့မယ် ပိုအလုပ်ရှုပ်တော့မယ်ဆိုတာ ခံစားခဲ့ရကြောင်း ပြည်သူ့ကာကွယ်ရေးတပ်မတော်(PDF) ရဲ့ စစ်သုံ့ပန်းဖြစ်နေတဲ့ ဗိုလ်မှူး အောင်ဖြိုးဝေက ပြောပါတယ်။
ဗိုလ်မှူးအောင်ဖြိုးဝေဟာ ဇွန်လ ၁ရက်က ပြည်သူ့ကာကွယ်ရေးတပ်မတော် (PDF) ရဲ့ မကွေးတိုင်းစစ်ဌာန စစ်ဆင်ရေးနယ်မြေတစ်နေရာမှာ ဖမ်းဆီးခံခဲ့ရတာဖြစ်ပါတယ်။ ဗိုလ်မှူးအောင်ဖြိုးဝေ၊ ဗိုလ်ကြီးပြည့်စုံအောင် အပါအဝင် စစ်ကောင်စီတပ်ဖွဲ့ဝင် ၃ဦးကို ပစ္စတိုသေနတ် ၁၉ လက်နဲ့အတူ ဖမ်းဆီးရမိခဲ့တာပါ။
ဖမ်းမိစစ်သုံ့ပန်းတွေရဲ့ ပြောကြားချက်တွေကို ပြည်သူ့ကာကွယ်ရေးတပ်မတော်က ထုတ်ပြန်လျက်ရှိရာ ဒီကနေ့ စက်တင်ဘာ ၁၉ရက်မှာ ဗိုလ်မှူးအောင်ဖြိုးဝေရဲ့ ပြောကြားချက်ကို ဖော်ပြခဲ့တာပါ။
Public Service Announcement
PDF တပ်ဖွဲ့ရဲ့ စစ်တပ်အာဏာသိမ်းမှုအပေါ် ဘယ်လိုခံစားရသလဲဆိုတဲ့ မေးမြန်းချက်ကို ဗိုလ်မှူးအောင်ဖြိုးဝေက “ကျနော်တို့တော့ အလုပ်ပိုရှုပ်ပြီလို့ပဲ ခံစားလိုက်ရတယ်၊ ကျနော်တို့တော့ ပင်ပန်းတော့မယ်ပေါ့။ ကျန်တာကတော့ ဆက်မတွေးမိဘူး”လို့ ပြောပါတယ်။
စစ်တပ်အာဏာသိမ်းစက ရက္ခိုင်ဒေသသို့ ရောက်နေတာမို့ အာဏာသိမ်းတာကို ချက်ချင်း မသိရရဘဲ လေးရက်လောက်ကြာမှ သိရတာလို့လည်း သူက ပြောပါတယ်။
ပြည်သူ့ကာကွယ်ရေးတပ်မတော်ရဲ့ ထုတ်ပြန်ချက်မှာ အကြမ်းဖက်စစ်တပ်လက်အောက်ရှိ စစ်အရာရှိတွေဟာ တပ်မတော်ဟာ ပြည်သူရွေးကောက်ထားသော အရပ်သားအစိုးရထက် ကဏ္ဍတိုင်းတွင် စီမံနိုင်တယ်ဆိုတဲ့ စစ်တပ်ဝါဒဖြန့်မှုများကို အစဉ်အမြဲ ယုံကြည်သူများဖြစ်ပြီး စစ်တပ်အုပ်ချုပ်မှုအောက်တွင် စစ်တပ်အရာရှိများသာ ချမ်းသာနေကာ ပြည်သူများ ဆင်းရဲမွဲတေခဲ့မှုကို မျက်ကွယ်ပြု လျစ်လျူရှုသူများသာဖြစ်ကြောင်း ဖော်ပြထားပါတယ်။
စစ်တပ်အရာရှိတွေကို ဖမ်းဆီးရမိချိန် သုံ့ပန်းအဖြစ် ဂျီနီဗာကွန်ဗင်းရှင်း၊ စစ်ဥပဒေများအတိုင်း ကောင်းမွန်စွာ စောင့်ရှောက်ထားဟုလည်း ပြည်သူ့ကာကွယ်ရေးတပ်မတော်က အသိပေးပါတယ်။
“အကြမ်းဖက်စစ်တပ်အတွက် ပြည်သူကို မနှိပ်စက်လိုတော့သော”၊ လူစိတ်ကျန်ရှိနေသေးသည့် သန္ဓေ၊ ပစ များအနေနဲ့ ပြည်သူ့မျက်နှာကိုကြည့်ကာ အမှန်တရားဘက်သို့ အမြန်ဆုံး ရပ်တည်ကူးပြောင်းကြဖို့လည်း ပြည်သူ့ကာကွယ်ရေးတပ်မတော် က တိုက်တွန်းထားပြီး ပြည်သူ့ရင်ခွင် ခိုလှုံလာတာကို လက်ကမ်းကြိုဆိုနေမယ်လို့ ဖိတ်ခေါ်ထားပါတယ်။
