ပြီးတော့ ပြည်တွင်းမှာ K-Pop ဂီတ နားထောင်သူတွေ၊ K-Drama စီးရီး ကြည့်ရှုသူတွေကို ပိုပြီး ပြင်းပြင်းထန်ထန် အရေးယူဖို့ ပြင်ဆင်နေတယ်လို့လည်း ကင်မ်က ဆိုပါတယ်။ K-Pop နဲ့ K-Dramaတွေဟာ နိုင်ငံတကာထိ ထိုးဖောက်နိုင်တဲ့ တောင်ကိုရီးယား ခေတ်သစ် ယဉ်ကျေးမှု ခြေလှမ်းတွေအဖြစ် တွင်ကျယ်လာခဲ့ပါတယ်။
တံခါးပိတ် ကွန်မြူနစ် နိုင်ငံတစ်ခုဖြစ်တဲ့ မြောက်ကိုရီးယားမှာလည်း K-Pop နဲ့ K-Dramaတွေရဲ့ စိမ့်ဝင် ထိုးဖောက်မှုတွေ ရှိနေပါတယ်။ ဒီအခြေအနေက မြောက်ကိုရီးယားရဲ့ လူနေမှု ဘဝကို တင်းတင်းကျပ်ကျပ် ချုပ်ကိုင်ထားချင်တဲ့ အာဏာရှင် အစိုးရရဲ့ လိုလားမှုနဲ့ ဆန့်ကျင်နေပါတယ်။
တောင်ကိုရီးယားရဲ့ ဂီတနဲ့ ရုပ်ရှင်တွေဟာ CDတွေအဖြစ် နယ်စပ်ကနေ တရားမဝင် လမ်းကြောင်းတွေနဲ့ ဝင်ရောက်ပြီး မြောက်ကိုရီးယားမှာ မှောင်ခို ဖြန့်ဝေတာ ဖြစ်ပါတယ်။ မြောက်ကိုရီးယား အာဏာပိုင်တွေက ဒီကိစ္စဟာ တောင်ကိုရီးယားရဲ့ ယဉ်ကျေးမှု အခြေခံ ဝါဒဖြန့်မှု တစ်ခု အနေနဲ့ ယူဆပြီး လိုက်လံ ပိတ်ပင်လေ့ ရှိပါတယ်။
အခုတော့ ခေါင်းဆောင်ကြီး ကင်မ်က အဲဒီ အခြေအနေကို အတော်လေး စိတ်အနှောင့်အယှက် ဖြစ်နေပြီး ဆက်လွှတ်ပေးထားတော့မှာ မဟုတ်ဘူးလို့ မြောက်ကိုရီးယား အစိုးရပိုင် မီဒီယာက ဖော်ပြသွားပါတယ်။
ဒီဇင်ဘာလတုန်းက မြောက်ကိုရီးယားမှာ K-Popနဲ့ K-Dramaတွေ နားထောင်တာ၊ ကြည့်ရှုတာ တွေ့ရင် အလုပ်ကြမ်းနဲ့ ထောင်ဒဏ် ၁၅ နှစ်ထိ ချမှတ်နိုင်တဲ့ ပြစ်ဒဏ်မျိုး သတ်မှတ်ဖို့ အဆိုပြုလာခဲ့ပါတယ်။ မူလက ဒီလို ပြစ်မှုမျိုး ကျူးလွန်ရင် အမြင့်ဆုံး ထောင်ဒဏ် ၅ နှစ်ပြစ်ဒဏ် သတ်မှတ်ထားပါတယ်။
တောင်နဲ့မြောက် ကိုရီးယား နှစ်နိုင်ငံမှာ အသုံးပြုတဲ့ ဘာသာစကား တူညီပေမယ့် ဝါကျ ဖွဲ့စည်းမှု အခြေအနေ တချို့နဲ့ လေယူလေသိမ်းတွေမှာ အထိုက်အလျောက် ကွဲပြားမှု ရှိပါတယ်။ မြောက်ကိုရီးယားမှာ အမျိုးသမီးတွေက သူတို့ရဲ့ ခင်ပွန်းကို ရဲဘော်လို့ပဲ ခေါ်ဖို့ ညွှန်ကြားထားပေမယ့် အိုပါးလို့ ခေါ်ဝေါ်လာတာမျိုးကို ကင်မ်က အကြီးအကျယ် ဒေါသထွက်နေတယ်လို့လည်း သိရပါတယ်။