တရုတ်ကို သပိတ်မှောက်တဲ့ အနေနဲ့ ၂၀၂၂ ခုနှစ်၊ ဘေဂျင်း ဆောင်းရာသီ အိုလံပစ်ကို အမေရိကန် သံအရာရှိတွေ မတက်ရောက်ဖို့ ဆုံးဖြတ်လိုက်ကြောင်း သိရပါတယ်။
ဆောင်းရာသီ အိုလံပစ်မှာ အမေရိကန် အစိုးရ အနေနဲ့ တရားဝင် ကိုယ်စားလှယ် အဖွဲ့တွေ စေလွှတ်သွားမှာ မဟုတ်ကြောင်း အိမ်ဖြူတော်က အတည်ပြုခဲ့ပါတယ်။ ဒါဟာ တရုတ်နိုင်ငံရဲ့ စိုးရိမ်စရာ လူ့အခွင့်အရေး ကိစ္စတွေအပေါ် သပိတ်မှောက်တဲ့ သဘောထားမျိုး ပြသလိုက်တာလည်း ဖြစ်ပါတယ်။
ဒါပေမဲ့ အမေရိကန် ကိုယ်စားပြု အားကစား မောင်မယ်တွေကတော့ ဆောင်းရာသီ အိုလံပစ်မှာ ပါဝင် ယှဉ်ပြိုင်ဖို့ ရှိနေပြီး အစိုးရကလည်း အပြည့်အဝ ထောက်ပံ့ ကူညီပေးသွားမယ်လို့ ဆိုပါတယ်။
အမေရိကန် အစိုးရရဲ့ သဘောထားနဲ့ ပတ်သက်လို့ တရုတ်က ဘယ်လို တုံ့ပြန်မလဲ ဆိုတာတော့ မသိရသေးပါဘူး။ အစောပိုင်းမှာ တရုတ်က တကယ်လို့ ဆောင်းရာသီ အိုလံပစ်မှာ နိုင်ငံရေးနဲ့ ဆက်နွှယ်တဲ့ သပိတ်မှောက်တဲ့ ပုံစံမျိုးတွေ တွေ့လာရရင် တိတိကျကျ စီမံတုံ့ပြန်တာတွေ ရှိလာလိမ့်မယ်လို့ သတိပေးထားဖူးပါတယ်။
Public Service Announcement
အမေရိကန် သမ္မတ ဂျိုးဘိုင်ဒန်က သူဟာ ဆောင်းရာသီ အိုလံပစ်အပေါ် သံတမန်ရေးရာ သပိတ်မှောက်ဖို့ကိစ္စ စိုင်းပြင်းနေကြောင်း ပြီးခဲ့တဲ့လမှာ ထုတ်ပြောခဲ့တဲ့နောက် တရုတ်က အခုလို တုံ့ပြန်ခဲ့တာပါ။
ဒီဇင်ဘာ ၆ ရက်မှာတော့ အိမ်ဖြူတော် ပြန်ကြားရေး အတွင်းဝန် ဂျန်ဆာကီက ဆောင်းရာသီ အိုလံပစ်ကို သံတမန်ရေးအရ သပိတ်မှောက်မယ့် အမေရိကန်ရဲ့ ဆုံးဖြတ်ချက်ကို အတည်ပြု ကြေညာလိုက်ပါတယ်။ ရှင်းကျန်း ဒေသမှာ တရုတ် အာဏာပိုင်တွေရဲ့ လူ့အခွင့်အရေး ချိုးဖောက်မှုတွေနဲ့ နိုင်လိုမင်းထက် ပြုမူမှုတွေကို ဆန့်ကျင်ကြောင်း ပြသတဲ့ အနေနဲ့ အမေရိကန် သံအရာရှိတွေက ဘေဂျင်း အိုလံပစ်ကို သပိတ်မှောက်မှာ ဖြစ်တယ်လို့ ဆာကီက ပြောကြားသွားပါတယ်။
အမေရိကန် အစိုးရရဲ့ ဆုံးဖြတ်ချက်ကို ဒီမိုကရက် ပါတီအပြင် ပြိုင်ဘက် ရီပတ်ဘလစ်ကန်တွေကပါ ချီးကျူး ကြိုဆိုခဲ့ကြပါတယ်။ အမေရိကန်အပြင် ဗြိတိန်နဲ့ ဩစတြေးလျတို့ကလည်း ဆောင်းရာသီ အိုလံပစ်ကို အသီးသီး သပိတ်မှောက်ဖို့ စဉ်းစားနေကြောင်း သိရပါတယ်။
