ဝံပုလွေတွေ အုပ်လိုက်ကြီး လွတ်သွားတဲ့နောက် ပြင်သစ်က တိရစ္ဆာန်ရုံ တစ်ခုကို အရေးပေါ် ပိတ်ခဲ့ရကြောင်း သိရပါတယ်။
ဒီဇင်ဘာ ၂၄ ရက်က လာရောက် လည်ပတ်သူတွေ ရှိနေတဲ့အချိန် ဝံပုလွေ ၉ ကောင်ပါတဲ့ အုပ်စုတစ်ခု လှောင်ချိုင့်ထဲက လွတ်သွားတာ ဖြစ်ပါတယ်။ ပြင်သစ် တောင်ပိုင်း၊ မွန်ထရီဒွန်-လာဘက်ဆွန်နီ မြို့ထဲမှာ ရှိနေတဲ့ တိရစ္ဆာန်ရုံက ဒီဖြစ်စဉ်မှာ လူတွေ ထိခိုက် ဒဏ်ရာရတာ မရှိခဲ့ဘူးလို့ ပြောပါတယ်။
ဝံပုလွေအုပ်ဟာ လုံခြုံရေး အတားအဆီးတွေကို ဖျက်ဆီးပစ်ခဲ့ပြီး စည်းရိုးတစ်ခုကို ကျော်တက်ခဲ့ပေမယ့် တိရစ္ဆာန်ရုံဝင်း အပြင်ဖက်ကိုတော့ လွတ်မြောက်မသွားခဲ့ပါဘူး။ အဲဒီထဲက ၄ ကောင်ဟာ ရန်လိုတဲ့ အပြုအမူတွေ ရှိနေတဲ့အတွက် အသေပစ်သတ်ခဲ့ရကြောင်း တိရစ္ဆာန်ရုံ တာဝန်ရှိသူတွေက ဆိုပါတယ်။
ကျန်တဲ့ ၅ ကောင်ကိုတော့ မေ့ဆေးနဲ့ ပစ်ဖမ်းပြီး လှောင်ချိုင့်ထဲ ပြန်ထည့်ခဲ့ပါတယ်။ အခြေအနေက ရှုပ်ရှုပ်ထွေးထွေး ဖြစ်သွားပေမယ့် ဧည့်သည်တွေအတွက် အန္တရာယ်တော့ မရှိခဲ့ဘူးလို့ ဒေသခံ အုပ်ချုပ်ရေး အရာရှိ ဖေဘီယန် ချောလတ်က ပြောပါတယ်။ လုံခြုံရေးအရ စိတ်ချရတာ သေချာကြောင်း စစ်ဆေး အတည်ပြုမှုတွေ မပြီးမချင်းတော့ ထရိုင်ယော့စ် ဗဲလက်စ် တိရစ္ဆာန်ရုံကို ဆက်ပြီး ပိတ်ထားရမှာ ဖြစ်ပါတယ်။ တိရစ္ဆာန်ရုံရဲ့ ဝက်ဘ်ဆိုက်မှာတော့ အရေးပေါ် ပြင်ဆင်မှုတွေအတွက် ဇန်နဝါရီ လလယ်ထိ ခဏပိတ်ထားမယ်လို့ ဖော်ပြထားတာ တွေ့ရပါတယ်။
Public Service Announcement
အဲဒီ တိရစ္ဆာန်ရုံဟာ ဟက်တာပေါင်း ၆၀ ကျော် ကျယ်ဝန်းပြီး ခြင်္သေ့တွေ၊ မျောက်တွေ၊ ဝံပုလွေတွေ၊ ကြိုးကြာတွေ အပါအဝင် တိရစ္ဆာန် အကောင် ၆၀၀ ကျော်ကို မွေးမြူထားကြောင်း သိရှိရပါတယ်။
