မြောက်ကိုရီးယားက နျူကလီးယား လက်နက် စမ်းသပ်ဖောက်ခွဲတာမျိုး သိပ်မကြာခင် တွေ့လာရဖွယ် ရှိတယ်လို့ အမေရိကန် အစိုးရ အရာရှိ တစ်ဦးက ပြောကြားသွားပါတယ်။
အမေရိကန် နိုင်ငံခြားရေး ဝန်ကြီးဌာနက ခန့်အပ်ထားတဲ့ မြောက်ကိုရီးယားဆိုင်ရာ အထူးကိုယ်စားလှယ် ဆွန်ကင်မ်က အမေရိကန် အစိုးရ အနေနဲ့ လာမယ့် သီတင်းပတ်ထဲမှာ မြောက်ကိုရီးယားက နျူကလီးယား လက်နက် စမ်းသပ်လိမ့်မယ်လို့ အတော်လေး ခိုင်ခိုင်မာမာ ယုံကြည်ရတဲ့ အထောက်အထားတွေ ရထားကြောင်း ဆိုပါတယ်။
လာမယ့် ဧပြီ ၁၅ ရက်မှာ မြောက်ကိုရီးယားဟာ သူတို့ရဲ့ ပိုမိုကြီးထွားလာတဲ့ နျူကလီးယား လက်နက်တိုက်အကြောင်း ကမ္ဘာသိ အင်အားပြမယ့် အစီအစဉ်တစ်ရပ် အကောင်အထည် ဖော်လာနိုင်တယ်လို့ ဆွန်က ဆိုပါတယ်။ အဲဒီနေ့ဟာ မြောက်ကိုရီးယားနိုင်ငံ ထူထောင်သူလည်းဖြစ်၊ လက်ရှိ နိုင်ငံခေါင်းဆောင် ကင်မ်ဂျုံအန်းရဲ့ ကွယ်လွန်သူ အဖိုးလည်းဖြစ်တဲ့ ကင်မ်အီလ်ဆွန်းရဲ့ အသက် ၁၁၀ ပြည့်မယ့် မွေးနေ့နဲ့လည်း တိုက်ဆိုင်နေပါတယ်။
မြောက်ကိုရီးယားဟာ အစိုးရ ရုံးပိတ်ရက် သတ်မှတ်ထားတဲ့ အဲဒီကာလမှာ ရန်လို ခြိမ်းခြောက်တဲ့ လက်နက် အင်အားပြမှု တစ်ခုပါ လုပ်ဆောင်လာမှာကို အလေးအနက် စိတ်ပူနေကြောင်း ဆွန်က ဆိုပါတယ်။ ဒီကိစ္စနဲ့ ပတ်သက်လို့ ထင်ကြေးတွေ အများကြီး မပေးလိုကြောင်း၊ မြောက်ကိုရီးယားက ဒုံးကျည်အသစ် စမ်းတာမျိုး ဖြစ်နိုင်သလို နျူကလီးယား လက်နက် ဖောက်ခွဲတာလည်း ကြုံလာနိုင်ကြောင်း၊ ဒေသတွင်း တင်းမာမှုတွေ မြင့်တက်မလာစေဘဲ အဲဒီနေ့ကို အေးအေးချမ်းချမ်း ကျော်ဖြတ်သွားဖို့တော့ မျှော်လင့်ချင်ကြောင်း သူက ပြောကြားသွားပါတယ်။
Public Service Announcement
မြောက်ကိုရီးယားဟာ ၂၀၀၆ ခုနှစ်ကစလို့ နျူကလီးယား လက်နက် စမ်းသပ်မှု ၆ ကြိမ်ထိ ပြုလုပ်ပြီးပါပြီ။ အဲဒီထဲက ၄ ကြိမ်ဟာ လက်ရှိ နိုင်ငံခေါင်းဆောင် ကင်မ်ဂျုံအန်း လက်ထက်မှာ ဖြစ်ပါတယ်။
