လွှတ်တော်မှာ စတုတ္ထ အကြိမ်မြောက် အယုံအကြည်မရှိအဆို မဲခွဲ တင်သွင်းခံရပေမယ့်လည်း ထိုင်းဝန်ကြီးချုပ် ပယာရွတ်သ် ချန်အိုချာက ရှင်သန် လွတ်မြောက်နိုင်ခဲ့ပြန်ပါတယ်။
အသက် ၆၈ နှစ်အရွယ် ပယာရွတ်သ်ဟာ ထိုင်းနိုင်ငံမှာ အာဏာသိမ်းခဲ့တဲ့ စစ်တပ်ရဲ့ အကြီးအကဲဟောင်းဖြစ်ပြီး သူကိုယ်တိုင် စိတ်တိုင်းကျ ပြင်ဆင် ရေးဆွဲထားတဲ့ ဖွဲ့စည်းပုံ ဥပဒေသစ်ကို အားကိုးပြီး ရွေးကောက်ပွဲမှာ အနိုင်ရခဲ့တာပါ။ ထိုင်းရဲ့ ဒီမိုကရေစီ အင်အားစုတွေက ပယာရွတ်သ်ကို အစဉ်တစိုက် စိန်ခေါ်နေပေမယ့် လွှတ်တော်ထဲမှာ သူ့စိတ်တိုင်းကျ ခန့်အပ်ထားတဲ့ အမတ်တွေ တော်တော်များများ ကြိုတင် ထည့်သွင်းထားနိုင်တဲ့ အားသာချက်ကြောင့် ပယာရွတ်သ်ဟာ ရာထူး ဆက်မြဲနေခဲ့ပါတယ်။
ဇူလိုင် ၂၃ ရက်က အယုံအကြည်မရှိအဆို တင်သွင်းမှုမှာ ပယာရွတ်သ်ဟာ ကြိုတင် ခန့်မှန်းထားသလိုပဲ သူ့ကို ထောက်ခံတဲ့မဲ ၂၅၆ မဲ၊ သူ့ကို ဆွဲချမယ့်မဲ ၂၀၆ မဲနဲ့ အသာစီးရပြီး လွတ်မြောက်သွားနိုင်ခဲ့ပါတယ်။ ဒါပေမဲ့ ရွေးကောက်ပွဲ မကျင်းပခင် ၁၁ လလောက် အလိုမှာ ဒီအခြေအနေမျိုး ကြုံရတာက သူ့အတွက်တော့ ဖိအားတစ်ခု ဖြစ်စေခဲ့ပါတယ်။ ပယာရွတ်သ်ကို အယုံအကြည်မရှိ အဆို တင်သွင်း မဲခွဲရာမှာ လွှတ်တော်အမတ် ၉ ဦးက မဲမပေးဘဲ ကြားနေခဲ့ကြပါတယ်။
အတိုက်အခံ အင်အားစုတွေဟာ ဝန်ကြီးချုပ်နဲ့ အစိုးရ အဖွဲ့ဝင် ၁၀ ဦးကို အဂတိ လိုက်စားမှု၊ စီးပွားရေး မူဝါဒတွေ လွဲမှားမှု စတာတွေနဲ့ ပြင်းပြင်းထန်ထန် ဝေဖန် စွပ်စွဲထားကြပါတယ်။ ဒီမိုကရေစီ ဘက်တော်သား အတိုက်အခံတွေက ၁၇ ပါတီ စုဖွဲ့ထားတဲ့ ညွန့်ပေါင်း အစိုးရကို ထိုးနှက်နိုင်ဖို့ ဘက်ပေါင်းစုံ အားထုတ်ခဲ့ကြပါတယ်။
Public Service Announcement
ပယာရွတ်သ် အတွက်တော့ သူ့ရဲ့ စွမ်းဆောင်ရည်နဲ့ ပတ်သက်ပြီး ဝန်ကြီးချုပ် ရာထူးသက်တမ်းတလျှောက် လွှတ်တော်မှာ စတုတ္ထ အကြိမ်မြောက်အဖြစ် အယုံအကြည်မရှိအဆို တင်သွင်း ခံခဲ့ရတာပါ။ အတိုက်အခံတွေက ပယာရွတ်သ်ဟာ အမှန်တကယ် လုံးဝ အရည်အချင်း မရှိဘဲ သူ့ကိုယ်သူ ကာကွယ်ဖို့ ဘက်ပေါင်းစုံ စီစဉ် ရေးဆွဲထားတဲ့ ဖွဲ့စည်းပုံ ဥပဒေကြောင့်သာ ရာထူးမြဲနေတာလို့ စွပ်စွဲကြပါတယ်။ ပယာရွတ်သ်ကတော့ အဲဒီ ဝေဖန်ထိုးနှက်မှုတွေကို ပယ်ချထားပါတယ်။
လူထုအမြင် စစ်တမ်းတွေအရ လူကြိုက်များမှု သိသိသာသာ ယုတ်လျော့ ကျဆင်းလာနေပေမယ့်လည်း ဖွဲ့စည်းပုံ ဥပဒေ အကာအကွယ်ကြောင့် ပယာရွတ်သ်ဟာ ဝန်ကြီးချုပ်အဖြစ် ဆက်ရှိနေဦးမယ်လို့ နိုင်ငံရေး လေ့လာသူတွေကလည်း သုံးသပ်ထားကြပါတယ်။
