ကမ္ဘာ့ကျန်းမာရေး အဖွဲ့ကြီး (WHO)က ပထမဆုံးအကြိမ်အဖြစ် တိုင်းရင်းဆေး ညီလာခံကို ဦးဆောင် ကျင်းပပေးခဲ့ပြီး ဒီအခြေအနေက သဘောထား ကွဲလွဲမှုတွေကို ဖြစ်ပေါ်စေခဲ့ပါတယ်။
အိန္ဒိယနိုင်ငံ၊ ဂန်ဟီနာဂါမြို့မှာ အိန္ဒိယ အစိုးရနဲ့ WHOတို့ ပူးပေါင်းပြီး ဩဂုတ် ၁၇ ရက်နဲ့ ၁၈ ရက်တွေမှာ နှစ်ရက်တာ တိုင်းရင်းဆေး ညီလာခံကြီး ကျင်းပစေခဲ့တာ ဖြစ်ပါတယ်။ ပြီးခဲ့တဲ့နှစ်မှာ WHOဟာ အိန္ဒိယ အစိုးရရဲ့ ရန်ပုံငွေ ဒေါ်လာ သန်း ၂၅၀ ပံ့ပိုးမှုနဲ့အတူ ဂျမ်နာဂါမှာ ကမ္ဘာလုံးဆိုင်ရာ တိုင်းရင်းဆေးဝါး စင်တာကြီး ထူထောင်ပြီး နောက်ဆက်တွဲ အနေနဲ့ အခုညီလာခံကို ကျင်းပခဲ့တာ ဖြစ်ပါတယ်။
ဒီကိစ္စနဲ့ ပတ်သက်လို့ ဆေးသိပ္ပံ ပညာရှင်တွေကြားမှာ အတော်လေး ဝေဖန်စရာတွေ ဖြစ်ခဲ့ပြီး သိပ္ပံနည်းကျ သုတေသနပြု လေ့လာမှုတွေ ကင်းမဲ့တဲ့ တိုင်းရင်းဆေးတွေကို WHOလို နိုင်ငံတကာ ကျန်းမာရေး မူဝါဒ ဦးဆောင် အဖွဲ့အစည်းကြီးက ဘယ်လိုဘယ်ပုံ စံနှုန်းသတ်မှတ်ပြီး အသိအမှတ် ပြုမလဲဆိုတဲ့ မေးခွန်းတွေ ထွက်ပေါ်လာပါတယ်။
WHOကတော့ ကမ္ဘာတလွှားမှာ တိုင်းရင်းဆေးဝါးတွေကို ယုံကြည် လက်ခံ သုံးစွဲနေသူ ဘီလီယံနဲ့ချီ များပြားပြီး အဖွဲ့အစည်း အနေနဲ့ အဲဒီလို ရိုးရာယုံကြည်မှုနဲ့ ဆက်နွှယ်တဲ့ ဆေးဝါးတွေကို သိပ္ပံနည်းကျ ဆေးပညာနဲ့ ဘယ်လို ပေါင်းစပ် ညှိနှိုင်းယူနိုင်မလဲ ဆိုတာကို ထဲထဲဝင်ဝင် လေ့လာဖို့ ရည်ရွယ်ထားတာသာ ဖြစ်တယ်လို့ ပြောပါတယ်။
Public Service Announcement
ဆေးသိပ္ပံ ပညာရှင် အတော်များများက WHO အနေနဲ့ တိုင်းရင်းဆေးတွေကို သုတေသနပြု လေ့လာချင်တယ်ဆိုတဲ့ စိတ်ကူးကို လက်ခံပေမယ့် အခုလို ညီလာခံမျိုး ဦးဆောင်ကျင်းပပြီး ယူဆောင်နိုင်မယ့် အကျိုးရလဒ် အပေါ်မှာတော့ အကြီးအကျယ် သံသယ မေးခွန်းထုတ်နေကြပါတယ်။
WHOကတော့ အခုလို ညီလာခံမျိုးကို ရေရှည် အတိုင်းအတာထိ ပိုမိုကျင်းပနိုင်မယ်ဆိုရင် ကွဲပြားခြားနားတဲ့ ကမ္ဘာ့ အစိတ်အပိုင်း အသီးသီးက တိုင်းရင်းဆေးနည်းတွေကြား ပေါင်းကူး ဆက်စပ်ပြီး အတွေ့အကြုံ ဖလှယ်မှုတွေကို မြှင့်တင်နိုင်မှာဖြစ်ကြောင်း၊ အဲဒီ အခြေအနေတွေအပေါ် မူတည်ပြီး ချမှတ်မယ့် မူဝါဒတွေ၊ စုဆောင်းယူနိုင်မယ့် အချက်အလက်တွေက ဆေးသိပ္ပံ ပညာရပ်အတွက် ကောင်းကျိုး ဖြစ်စေမယ်လို့ ယုံကြည်ကြောင်း ပြောပါတယ်။
အခုညီလာခံနဲ့ ပတ်သက်လို့ အကောင်းအဆိုး သဘောထား ကွဲပြားမှု အမျိုးမျိုး ရောထွေးနေသလို တချို့ ပညာရှင်တွေက တိုင်းရင်းဆေးတွေအကြောင်း အကျယ်တဝင့် ဆွေးနွေးမှုကို မူအားဖြင့် လက်ခံပေမယ့် အကျိုးအာနိသင် တိတိကျကျ အတည်မပြုနိုင်သေးတဲ့ တိုင်းရင်းဆေးနည်း တချို့ကို အားပေး မြှင့်တင်တဲ့ သဘောမျိုး သက်ရောက်သွားမှာကိုလည်း စိုးရိမ်တကြီး ထောက်ပြနေကြောင်း သိရပါတယ်။
