ဆည်ကျိုးပေါက်မှုကြောင့် တရုတ်နိုင်ငံ အလယ်ပိုင်းမှာ ရုတ်တရက် ရေကြီးမှုတွေ ကြုံတွေ့ခဲ့ရပါတယ်။
တရုတ်အလယ်ပိုင်း၊ ဟူနန်ပြည်နယ်မှာရှိတဲ့ ဒုံတင် ရေကန်ကြီးနဲ့ ဆက်စပ်နေတဲ့ ဆည်အစိတ်အပိုင်း ရေတားနံရံတွေ ဇူလိုင် ၅ ရက် ညပိုင်းက စတင် ပြိုကျခဲ့တာလို့ ဆိုပါတယ်။ ဒေသဆိုင်ရာ အာဏာပိုင်တွေကတော့ ရေလွှမ်းဧရိယာတွေမှာ ပိတ်မိနေသူတွေကို ကယ်ထုတ်ဖို့ အပူတပြင်း ကြိုးစားနေပါတယ်။
လက်ရှိမှာတော့ အနီးတဝိုက်မှာ နေထိုင်သူ အနည်းဆုံး ၆၀၀၀ လောက်ကို ရွှေ့ပြောင်းပေးထားပြီး ထိခိုက်သေဆုံးမှု သတင်းတွေကိုတော့ လောလောဆယ် မရသေးပါဘူး။
ရေတွေက လူနေကျေးရွာတွေထဲထိ ရောက်လာတာကြောင့် ဒေသခံတွေ ခေါင်မိုးပေါ်တက်ပြီး ခိုလှုံကြရသလို စိုက်ခင်းတွေလည်း ပျက်စီးခဲ့တယ်လို့ သိရပါတယ်။
Public Service Announcement
တရုတ်ရဲ့ လမ်းပန်းဆက်သွယ်ရေး ထိန်းချုပ်မှု ဌာနက ဟူနန်ပြည်နယ်ထဲက ဟွာရောင်ခရိုင်ဆီ ဆက်သွယ်ထားတဲ့ လမ်းအားလုံးမှာ အသွားအလာ စိစစ်ကန့်သတ်ထားလိုက်ပါတယ်။ လမ်းတွေပေါ်ထိ ရေလွှမ်းနေတဲ့ အခြေအနေတွေကြောင့် အခုလို စီမံတုံ့ပြန်ခဲ့တာ ဖြစ်တယ်လို့ ဌာနက အကြောင်းပြခဲ့ပါတယ်။
တရုတ်အစိုးရက ကယ်ဆယ်ထောက်ပံ့ရေး အပိုဆောင်း ရန်ပုံငွေ ယွမ်သန်းပေါင်း ၅၄၀ ထပ်မံ ထုတ်ပေးမယ်လို့ ကြေညာခဲ့ပြီး အများစုကို ဟူနန်ရဲ့ ရေဘေးသင့် ဒေသတွေဆီ လွှဲပေးသွားမယ်လို့ သိရပါတယ်။
တရုတ်ဟာ လွန်လွန်ကဲကဲ ပူပြင်းတဲ့ နွေရာသီကို ဖြတ်သန်းနေရပြီး တစ်ချိန်တည်းမှာပဲ နိုင်ငံအလယ်ပိုင်းနဲ့ တောင်ပိုင်းဒေသတွေမှာ ရေကြီးမှု ပြဿနာတွေကို ရင်ဆိုင်ခဲ့ရပါတယ်။
ကမ္ဘာပေါ်မှာ ဖန်လုံအိမ်ဓာတ်ငွေ့ ထုတ်လွှတ်မှု အများဆုံး နိုင်ငံကြီးဟာ ကမ္ဘာ့ရာသီဥတု ပူနွေးလာမှု ပြဿနာကို အထိခိုက်ဆုံး ခံစားရမယ့် အခြေအနေ ရှိနေပြီး အခုလို လွန်ကဲတဲ့ ရာသီဥတု အခြေအနေတွေကို အနာဂတ်မှာ ပိုမို ကြုံတွေ့လာနိုင်ကြောင်း ပညာရှင်တွေက သတိပေးထားပါတယ်။
ပြီးခဲ့တဲ့ လတုန်းကလည်း ဟူနန်ဟာ တောင်ကျရေတွေကြောင့် ရေကြီးပြီး ထိခိုက်သေဆုံးမှုတွေ ကြုံခဲ့ဖူးသလို တရုတ် တောင်ပိုင်းက ကွမ်တုံဒေသမှာလည်း ရေလွှမ်းမိုးမှုတွေကြောင့် ၃၈ ဦး သေဆုံးခဲ့ပါတယ်။ အခုသီတင်းပတ်ကုန်မှာလည်း ရှန်ဒေါင်း ပြည်နယ်ထဲမှာ လေဆင်နှာမောင်းတစ်ခု မွှေနှောက် တိုက်ခိုက်မှုကြောင့် လူ ၅ ဦးလောက် အသက်ဆုံးရှုံးခဲ့ကြောင်း သိရပါတယ်။
ကိုးကား: CNA
