စစ်တပ် အာဏာသိမ်းထားတဲ့ အာဖရိက သုံးနိုင်ငံရဲ့ စစ်ခေါင်းဆောင်တွေ တွေ့ဆုံ၊ စာချုပ်လက်မှတ်ရေးထိုး

အာဖရိက သုံးနိုင်ငံရဲ့ အာဏာသိမ်း စစ်ခေါင်းဆောင်တွေ တွေ့ဆုံပြီး အပြန်အလှန် ပူးပေါင်းဆောင်ရွက်ရေး သဘောတူ စာချုပ်တစ်ရပ်ကို လက်မှတ် ရေးထိုးခဲ့ကြပါတယ်။

နိုင်ဂျား၊ မာလီနဲ့ ဘာကီနာဖာဆိုတို့မှာ အာဏာသိမ်းထားတဲ့ စစ်တပ် အသီးသီးရဲ့ ခေါင်းဆောင်တွေဟာ ပြီးခဲ့တဲ့ သီတင်းပတ်ကုန်က နိုက်ဂျားရဲ့မြို့တော် နိုင်ယာမေမှာ တွေ့ဆုံခဲ့ကြတာပါ။ ဒါဟာ အနောက်အာဖရိက ဒေသတွင်း နိုင်ငံတချို့မှာ အာဏာသိမ်းမှုတွေ ဆက်တိုက် ဖြစ်ပွားခဲ့တဲ့နောက်ပိုင်း အခုလိုမျိုး အာဏာသိမ်း စစ်ခေါင်းဆောင်တွေ ပထမဆုံးအကြိမ် သုံးပွင့်ဆိုင် တွေ့ဆုံမှုလည်း ဖြစ်လာပါတယ်။

မနှစ်တုန်းက မူအားဖြင့် ဆွေးနွေးထားတဲ့ ကာကွယ်ရေး ပူးပေါင်းဆောင်ရွက်မှု သဘောတူ စာချုပ်ကို အာဏာသိမ်း စစ်ခေါင်းဆောင် သုံးဦးက နိုင်ယာမေ တွေ့ဆုံပွဲမှာ လက်မှတ်ရေးထိုး အတည်ပြုခဲ့တာ ဖြစ်ပါတယ်။

နိုက်ဂျား အာဏာသိမ်း စစ်တပ်ခေါင်းဆောင် အက်ဘ်ဒူရာဟ်မာနီ ချီယာနီ၊ ဘာကီနာဖာဆို အာဏာသိမ်း စစ်ခေါင်းဆောင် ဗိုလ်ကြီး အီဘရာဟင် ထယာအိုရေးနဲ့ မာလီရဲ့ ဗိုလ်မှူးကြီး အက်ဆီမီ ဂွိုင်တာတို့ဟာ စာချုပ်လက်မှတ်ရေးထိုးအပြီး အတူယှဉ်တွဲရပ်ရင်း ထူးကဲတဲ့ အောင်မြင်မှု တစ်ခုအဖြစ် သတင်းထောက်တွေဆီ အသိပေး ကြေညာခဲ့ပါတယ်။

Public Service Announcement

စစ်အာဏာသိမ်းမှုကို ဆန့်ကျင်ပြီး အရပ်သား အစိုးရဆီ အာဏာပြန်လွှဲပေးဖို့ အနောက်အာဖရိက နိုင်ငံများ စီးပွားရေး ပူးပေါင်းဆောင်ရွက်မှုအဖွဲ့ (ECOWAS)က အစဉ်တစိုက် ဖိအားပေးနေခဲ့တဲ့နောက် အဲဒီ ၃ နိုင်ငံဟာ ECOWASကနေ နုတ်ထွက်မယ်လို့ ဇန်နဝါရီလမှာ ကြေညာခဲ့ကြပါတယ်။ အခုတော့ ECOWASကို စစ်အာဏာရှင် သုံးဦးပေါင်းပြီး တုံ့ပြန်တဲ့ သဘောနဲ့ စာချုပ် လက်မှတ်ရေးထိုးခဲ့ကြတာပါ။

မာလီမှာ ၂၀၂၁ ခုနှစ်၊ ဘာကီနာဖာဆိုမှာ ၂၀၂၂၊ နိုက်ဂျားမှာ ၂၀၂၃ ခုနှစ်တွေတုန်းက စစ်အာဏာသိမ်းမှုတွေ အသီးသီး ဖြစ်ပေါ်ခဲ့တာပါ။ ECOWASဟာ အာဏာသိမ်းမှုတွေကို ဆန့်ကျင်တဲ့ အနေနဲ့ အဲဒီသုံးနိုင်ငံရဲ့ စစ်အစိုးရတွေကို ဖယ်ကြဉ်ပြီး အဆက်အသွယ် ဖြတ်တောက်ဖို့ ဆုံးဖြတ်ခဲ့ပါတယ်။

ဆာဟာရ သဲကန္တာရနဲ့ ဆက်စပ်တည်ရှိတဲ့ အာဖရိက နိုင်ငံတချို့မှာ အရပ်သား အစိုးရတွေက အကြမ်းဖက် အဖွဲ့အစည်းတွေကို ထိထိရောက်ရောက် မနှိမ်နင်းနိုင်ဘူး၊ ပြည်သူလူထုရဲ့ လုံခြုံရေးကို အာမခံချက် မပေးနိုင်ဘူးဆိုတဲ့ အကြောင်းပြချက်တွေနဲ့ စစ်တပ် အာဏာသိမ်းမှုတွေ ပေါ်ပေါက်ခဲ့တာပါ။

ကုလသမဂ္ဂ အကြီးအကဲ အန်တိုနီယို ဂူတာရက်ဇ်က အဲဒီအခြေအနေတွေကို အကြောင်းပြုပြီး ကမ္ဘာ့ဒေသတချို့မှာ အာဏာသိမ်းမှုတွေဟာ ကပ်ရောဂါတစ်ခုအသွင် ပျံ့နှံ့ကူးစက်လာနေကြောင်း ဝေဖန်ခဲ့ပါတယ်။

ကိုးကား: Al Jazeera