'/%3E%3C/svg%3E){kind=small}
အိန္ဒိယ နိုင်ငံက ဆေးဝါးစက်ရုံ တစ်ခုမှာ အပြင်းအထန် ပေါက်ကွဲမှု ဖြစ်ပွားရာက သေဆုံးသူ ၃၀ ကျော်ထိ မြင့်တက်လာကြောင်း သိရပါတယ်။
အိန္ဒိယတောင်ပိုင်းမှာရှိတဲ့ တီလန်ဂါနာ ပြည်နယ်ထဲက ဆေးဝါးစက်ရုံမှာ ဇွန်လ ၃၀ ရက်နေ့က ပေါက်ကွဲမှု တစ်ခုဖြစ်ပြီး မီးတွေပါ လောင်ကျွမ်းခဲ့တယ်လို့ ဒေသခံ မီဒီယာတွေက ဖော်ပြခဲ့ပါတယ်။ ဇူလိုင် ၁ ရက် မနက်အစောပိုင်းထိ အခြေအနေအရ အသေအပျောက် ၃၄ ဦးထိ မြင့်တက်လာပြီး ဒဏ်ရာရသူလည်း ဒါဇင်တွေနဲ့ချီ များပြားလာကြောင်း နီးစပ်သူတွေက ပြောပါတယ်။
ဒေသခံ ရဲတပ်ဖွဲ့ အရာရှိ တစ်ဦးဖြစ်တဲ့ ပါရီတော့ရှ် ပန်ကက်ဂျ်က အခင်းဖြစ်ရာ နေရာမှာ အလောင်း ၃၁ ခုကို ရှာတွေ့ခဲ့ပြီး ဆေးရုံမှာတော့ လူနာ ၃ ဦး ဆုံးပါးသွားခဲ့ကြောင်း ဆိုပါတယ်။ ရဲတွေက စက်ရုံကို ထိန်းချုပ်တဲ့ ဆီဂါချီ စက်မှုလုပ်ငန်းကို အမှုဖွင့်ထားတယ်လို့ သိရပါတယ်။
ဆီဂါချီကတော့ အဲဒီ စက်ရုံမှာ စက်ပစ္စည်း အစိတ်အပိုင်းတစ်ခု ပျက်စီးမှုကြောင့် လည်ပတ်မှု ရပ်နားထားတာ ရက် ၉၀ လောက် ရှိနှင့်ပြီးပြီလို့ ဆိုပါတယ်။ ဒါပေမဲ့ အခုလို ပြဿနာဖြစ်ပြီး လူတွေ ထိခိုက်သေကြေခဲ့ရတဲ့အတွက် ကြီးစွာ စိတ်မကောင်း ဖြစ်ရကြောင်း ကုမ္ပဏီဖက်က ကြေညာပါတယ်။
Public Service Announcement
စက်ရုံထဲမှာ ပေါက်ကွဲမှုကြောင့် အဆောက်အအုံက လုံးဝ ပြိုကျသွားခဲ့တယ်လို့ မီးသတ်တွေက ပြောပါတယ်။ အခင်းဖြစ်ချိန်က အဲဒီနေရာမှာ လူ ၆၀ လောက် ရှိနေခဲ့တယ်လို့ သိရပါတယ်။
စက်ရုံအလုပ်သမား အများစုက ဂျာခန်း၊ ဩရိသ၊ ဘီဟာ၊ ယူတာပရာဒက်ရှ်နဲ့ အနောက်ဘင်္ဂလား ပြည်နယ်တွေကနေ လာရောက်ကြတဲ့ ရွှေ့ပြောင်းအလုပ်သမားတွေလို့ သတင်းတွေက ဖော်ပြထားပါတယ်။
ပေါက်ကွဲမှု ဖြစ်ပွားရတဲ့ အကြောင်းရင်းကို တိတိကျကျ မသိရသေးပေမယ့် စက်ပိုင်းဆိုင်ရာ ချွတ်ယွင်းမှု တစ်ခုခုကြောင့် ဖိအားတွေ စုစည်းမိပြီး ကန်ထွက်လာတာ ဖြစ်နိုင်တယ်လို့ စုံစမ်းရေး အရာရှိတွေက ကနဦး ယူဆထားပါတယ်။
ဆေးရုံရောက်နေတဲ့ လူနာတွေထဲမှာ နှစ်ဒါဇင်လောက်ဟာ မီးလောင်ဒဏ်ရာတွေ အပြင်းအထန် ရရှိထားသလို အဆိပ်အတောက် ဓာတ်ငွေ့တွေကိုလည်း ရှူရှိုက်မိထားတယ်လို့ ဆိုပါတယ်။
သေဆုံးသူတွေထဲမှာ တချို့ရုပ်အလောင်းတွေက အခြေအနေ အရမ်းဆိုးရွားပြီး ဘယ်သူဘယ်ဝါ ခွဲခြားနိုင်ဖို့အတွက် DNA စစ်ဆေးမှုတွေပါ လိုအပ်နေကြောင်း အာဏာပိုင်တွေက ပြောပါတယ်။
အိန္ဒိယ ဝန်ကြီးချုပ် နာယန်ဒရာ မိုဒီကတော့ အစိုးရက သေဆုံးသူ တစ်ဦးစီအတွက် နစ်နာကြေး ရူပီး ၂ သိန်းနဲ့ ဒဏ်ရာရသူတွေအတွက် ရူပီး ၅ သောင်းစီ ထောက်ပံ့ ပေးအပ်သွားမယ်လို့ ကြေညာထားပါတယ်။
ကိုးကား: BBC
