စစ်ပွဲရပ်ဆိုင်းဖို့အတွက် ယူကရိန်းဟာ နယ်မြေတချို့ကို ရုရှားဆီ တရားဝင် ပေးအပ်သင့်တယ်ဆိုတဲ့ အမေရိကန် သမ္မတ ဒေါ်နယ်လ်ထရမ့်ရဲ့ အဆိုပြုချက်ကို ယူကရိန်း သမ္မတ ဗိုလိုဒီမာ ဇီလန်စကီးက ပယ်ချသွားခဲ့ပါတယ်။
ယူကရိန်းဟာ ရန်လို ကျူးကျော်သူတွေဆီ ဘာအကြောင်းနဲ့မှ နယ်မြေတွေ မပေးနိုင်ဘူးလို့ သူက ဆိုပါတယ်။ အခု သီတင်းပတ်ထဲမှာတော့ ထရမ့်က သူဟာ ဩဂုတ် ၁၅ ရက်ကျရင် ရုရှား-ယူကရိန်းစစ်ပွဲ ရပ်ဆိုင်းရေးကိစ္စ ဆွေးနွေးဖို့ ရုရှားသမ္မတ ဗလာဒီမာ ပူတင်နဲ့ တွေ့ဆုံမယ်လို့ ကြေညာခဲ့ပါတယ်။
အမေရိကန်က စစ်ရပ်ဆိုင်းရေး ကြားဝင် စေ့စပ်ပေးရာမှာ ရုရှား သိမ်းပိုက်ထားတဲ့ ယူကရိန်း နယ်မြေတချို့ကို ရုရှားဆီ အပြီးတိုင် လက်လွှဲပေးရေး ဆိုတာမျိုး နည်းလမ်းနဲ့ သဘောတူညီမှု ယူပေးဖို့ စီစဉ်နေတယ် ဆိုတာမျိုးလည်း ထရမ့်က မှတ်ချက်ပေးခဲ့ပါတယ်။
သူက အသေးစိတ်ကို မပြောပေမယ့်လည်း နီးစပ်သူတွေရဲ့ အဆိုအရ ယူကရိန်း အနေနဲ့ ဒွန်းဘက်စ် ပြည်နယ် တစ်ခုလုံး၊ ပြီးတော့ ၂၀၁၄ ကတည်းက ရုရှားတပ်တွေ ဝင်ရောက် သိမ်းယူထားတဲ့ ခရိုင်းမီးယား ကျွန်းဆွယ်တို့ကို ရုရှားပိုင်နက်အဖြစ် အသိအမှတ် ပြုဖို့ အမေရိကန်က တွန်းအားပေးဖွယ် ရှိတယ်လို့သိရပါတယ်။ တစ်ဖက်မှာတော့ ရုရှားတပ်တွေဟာ အစိတ်အပိုင်းတချို့ ထိန်းချုပ်ထားရာ ယူကရိန်း ပြည်နယ် နှစ်ခုဖြစ်တဲ့ ဇာပေါ့ရစ်ဇီယာ၊ ခါဆွန်တို့ကနေ ပြန်လည် ဆုတ်ခွာပေးရမှာပါ။
Public Service Announcement
ဇီလန်စကီးကတော့ ယူကရိန်း နယ်မြေတွေ စွန့်လွှတ်ရေး ကိစ္စနဲ့ ပတ်သက်လို့ ယူကရိန်း အခြေခံ ဥပဒေမှာ ရှင်းရှင်းလင်းလင်း ပြဋ္ဌာန်းထားပြီးသား ဖြစ်တယ်လို့ ပြောပါတယ်။ အဲဒီ ပြဋ္ဌာန်းချက်ကို ဘယ်သူကမှ သွေဖယ်လို့ မရကြောင်း၊ ယူကရိန်းဟာ ကျူးကျော် သိမ်းပိုက်ထားတဲ့ သူတွေဆီ နိုင်ငံရဲ့ နယ်မြေတွေကို လွှဲပေးနိုင်မှာ မဟုတ်ကြောင်း ဇီလန်စကီးက Telegramမှာ ရေးသားထားခဲ့ပါတယ်။
ဇီလန်စကီးဟာ အပစ်အခတ် ရပ်စဲရေး သဘောတူညီချက် ရရှိဖို့အတွက် ယူကရိန်းက နယ်မြေတွေ အဆုံးရှုံး ခံပေးရမယ်ဆိုတဲ့ စိတ်ကူးမျိုးကို အစဉ်တစိုက် ငြင်းပယ်ခဲ့သူပါ။ ထရမ့်က သူနဲ့ ပူတင်တို့ အလာစကာမှာ တွေ့ဆုံမယ့် ကိစ္စမှာ ဇီလန်စကီးရဲ့ အခန်းကဏ္ဍကိုတော့ ထည့်ကြေညာခဲ့တာမျိုး မရှိပါဘူး။
အစောပိုင်းမှာတော့ အိမ်ဖြူတော်က အပစ်အခတ် ရပ်စဲရေး အထမြောက်စေဖို့ ရုရှားနဲ့ ယူကရိန်းကြား နယ်မြေတွေ အလဲအလှယ် လုပ်ပြီး သဘောတူညီမှု ရယူနိုင်အောင် ကြားဝင် ညှိနှိုင်းပေးဖို့ အလေးအနက် စဉ်းစားနေကြောင်း ထုတ်ပြန်ထားပါတယ်။
ဇီလန်စကီးကတော့ အဲဒီအပေးအယူမျိုးဟာ ငြိမ်းချမ်းရေး ဆုံးဖြတ်ချက်တွေကို ဆန့်ကျင်နေပြီး ဘယ်လို အကျိုးကျေးဇူးမှလည်း မရှိနိုင်ကြောင်း ပြောပါတယ်။ ဇီလန်စကီးရဲ့ တုံ့ပြန်မှုနဲ့ ပတ်သက်လို့ အိမ်ဖြူတော်ဖက်ကတော့ သီးခြား မှတ်ချက် မပေးသေးဘူးလို့လည်း သိရပါတယ်။
ကိုးကား: New York Times
