နယ်စပ်က ဝါဒဖြန့် စပီကာတွေ ဖြုတ်သိမ်းနေတယ် ဆိုတာကို မြောက်ကိုရီးယား ငြင်းဆို

တောင်ကိုရီးယားနဲ့ နယ်စပ်တလျှောက်မှာ ထားရှိတဲ့ ဝါဒဖြန့် စပီကာတချို့ကို ဖြုတ်သိမ်းနေတယ်ဆိုတဲ့ သတင်းတွေကို မြောက်ကိုရီးယားက ငြင်းဆိုခဲ့ပါတယ်။

တောင်နဲ့မြောက် ကိုရီးယား နှစ်နိုင်ငံဟာ နယ်စပ်မှာ တစ်ဖက်ကိုတစ်ဖက် ပုတ်ခတ် ဝါဒဖြန့်တဲ့ အကြီးစား စပီကာတွေကို အပြိုင်အဆိုင် ဖြန့်ကျက်ထားကြပါတယ်။ ဒါပေမဲ့ တောင်ကိုရီးယားမှာ လီဂျေမြောင် သမ္မတ ဖြစ်လာတဲ့နောက် မြောက်ကိုရီးယားနဲ့ ဆက်ဆံရေးကို ပြန်လည် ကုစားလိုကြောင်း ပြသတဲ့ ခြေလှမ်းတစ်ရပ်အဖြစ် အဲဒီ စပီကာတွေကို ဖြုတ်ယူ သိမ်းဆည်းခဲ့ပါတယ်။

အဲဒီနောက် မြောက်ကိုရီးယားဖက်ကလည်း အလားတူပဲ စပီကာတွေ ဖြုတ်သိမ်းနေတယ်လို့ တောင်ကိုရီးယားက ပြောပေမယ့် မြောက်ကိုရီးယားခေါင်းဆောင် ကင်မ်ဂျုံအွန်းရဲ့ နိုင်ငံရေး ဩဇာ ကြီးမားတဲ့ ညီမဖြစ်သူ ကင်မ်ယိုဂျောင်က ငြင်းဆိုသွားပါတယ်။ သူက မြောက်ကိုရီးယားဟာ နယ်စပ်က စပီကာတွေကို ဖြုတ်သိမ်းနေတယ်ဆိုတာ လုံးဝမဟုတ်ဘူးလို့ ဆိုပါတယ်။

ဒါ့အပြင် အရင် တောင်ကိုရီးယား သမ္မတ ယွန်ဆွတ်ယော လက်ထက်တုန်းက ဆိုးဆိုးရွားရွား ဖြစ်သွားခဲ့တဲ့ နှစ်နိုင်ငံ ဆက်ဆံရေးကို ပြန်လည် မြှင့်တင်ဖို့ လောလောဆယ် မြောက်ကိုရီးယားမှာ ဆန္ဒမရှိဘူးလို့လည်း သူက အတိအလင်း ပြောကြားခဲ့ပါတယ်။

Public Service Announcement

တောင်ကိုရီးယားက စပီကာတွေ ဖြုတ်သိမ်းခဲ့ပြီးတဲ့နောက် အပြန်အလှန် သဘောမျိုးအဖြစ် မြောက်ကိုရီးယားဟာလည်း နယ်စပ်တလျှောက်မှာ စပီကာတချို့ကို ဖြုတ်သိမ်းနေကြောင်း အစိုးရအဖွဲ့ အစည်းအဝေး တစ်ခုမှာ သမ္မတလီက ပြောကြားခဲ့ပြီးတဲ့နောက် ကင်မ်က အဲဒီကိစ္စ မမှန်ကြောင်း တုံ့ပြန်ခဲ့တာပါ။

မြောက်ကိုရီးယားက နယ်စပ်မှာရှိတဲ့ စပီကာတွေ ဖြုတ်သိမ်းနေတယ် ဆိုတဲ့ လီရဲ့ စကားကို တောင်ကိုရီးယား စစ်တပ်ကလည်း အတည်ပြု ထောက်ခံထားတာ မရှိပါဘူး။

ကင်မ်ကတော့ လီရဲ့ အစိုးရဟာ လူတွေ ထင်ယောင်ထင်မှား ဖြစ်အောင် ရည်ရွယ်ချက်ရှိရှိ လုပ်နေတာလို့ စွပ်စွဲပြီး မြောက်ကိုရီးယားဟာ နယ်စပ်က စပီကာတွေကို ဘယ်တုန်းကမှ မဖြုတ်သိမ်းခဲ့သလို အဲဒီလို လုပ်ဖို့လည်း ဆန္ဒမရှိဘူးလို့ အပြတ်ပြောသွားခဲ့ပါတယ်။

ဒါ့အပြင် အစ်ကိုဖြစ်သူရဲ့ မြောက်ကိုရီးယား အစိုးရဟာ တောင်ကိုရီးယားရဲ့ မဟာမိတ် အမေရိကန်နဲ့လည်း ဆွေးနွေးမှုတွေ လုပ်ဆောင်ဖို့ လုံးဝ စိတ်မဝင်စားကြောင်း ကင်မ်က ဆက်ပြီး ပြောကြားသွားပါတယ်။

ကိုးကား: CNN