ထရမ့်-ဇီလန်စကီး ဆွေးနွေးပြီး မကြာခင် ယူကရိန်း ရေနံချက်စက်ရုံကို ရုရှားတိုက်ခိုက်

စစ်ပွဲ ရပ်ဆိုင်းရေးကိစ္စ အမေရိကန်မှာ ယူကရိန်း သမ္မတ ဗိုလိုဒီမာ ဇီလန်စကီးက အရေးတကြီး အစည်းအဝေးတစ်ခု တက်ခဲ့ပြီး မကြာခင်မှာပဲ ရုရှားက ယူကရိန်း အလယ်ပိုင်းမှာရှိတဲ့ ရေနံချက်စက်ရုံကို တိုက်ခိုက်ခဲ့ပါတယ်။

ဇီလန်စကီးက အိမ်ဖြူတော်မှာ အမေရိကန် သမ္မတ ဒေါ်နယ်လ်ထရမ့်၊ အနောက်ဥရောပ မဟာမိတ် ခေါင်းဆောင်တွေနဲ့ တွေ့ဆုံပြီး ရုရှားနဲ့ ယူကရိန်းကြားက စစ်ပွဲ ရပ်ဆိုင်းစေရေး ကိစ္စကို ဆွေးနွေးခဲ့ပြီး ၂၄ နာရီ မပြည့်ခင် ဩဂုတ် ၁၉ ရက်နေ့ ညပိုင်းမှာ ရုရှားဟာ ပိုလ်တာဗာ ဒေသက စွမ်းအင်ဆိုင်ရာ အခြေခံ အဆောက်အအုံ တစ်ခုကို ဒုံးကျည်တွေ၊ ဒရုန်းတွေနဲ့ တိုက်ခိုက်ခဲ့တာလို့ ယူကရိန်းက ထုတ်ပြန်ပါတယ်။

အဲဒီတိုက်ခိုက်မှုမှာ ထိခိုက်ပျက်စီးမှုတွေလည်း ဖြစ်ပေါ်ခဲ့တယ်လို့ သိရပါတယ်။ ကျူးကျော်သူ ရုရှားတပ်တွေဟာ ပိုလ်တာဗာ ဒေသထဲက စွမ်းအင်ဆိုင်ရာ အဆောက်အအုံ တစ်ခုကို ခရုစ်ဒုံးကျည်တွေ၊ ဒရုန်းတွေနဲ့ ပစ်ခတ် ဖျက်ဆီးခဲ့တဲ့အတွက် အကြီးအကျယ် မီးလောင်မှုတွေ ဖြစ်ခဲ့တယ်လို့ ယူကရိန်း စွမ်းအင် ဝန်ကြီးဌာနက Instagramမှာ ရေးသား ဖော်ပြထားခဲ့ပါတယ်။

ထိခိုက်ပျက်စီးခဲ့တဲ့ အဆောက်အအုံ အမျိုးအစားနဲ့ အသေးစိတ် အချက်အလက်တွေကိုတော့ ဝန်ကြီးဌာနက မထုတ်ပြန်ခဲ့ပါဘူး။

Public Service Announcement

ဒါပေမဲ့ ရုရှားရဲ့ Interfax သတင်းဌာနကတော့ ကာကွယ်ရေး ဝန်ကြီးဌာန အရာရှိ တချို့ကို ကိုးကားပြီး အဲဒီ တိုက်ခိုက်မှုဟာ ယူကရိန်းရဲ့ ရေနံချက် စက်ရုံကို ပစ်မှတ်ထားခဲ့တာ ဖြစ်တယ်လို့ ရေးသားထားခဲ့ပါတယ်။ ပိုလ်တာဗာ ဒေသခံ တချို့ကလည်း ရေနံချက်စက်ရုံဖက်ကနေ မီးခိုးလုံးတွေ အူထွက်လာတာကို မြင်ခဲ့ရတယ်လို့ ပြောပါတယ်။

ယူကရိန်းရဲ့ တစ်ခုတည်းသော ရေနံချက် စက်ရုံဖြစ်တဲ့ ကာမန်ချက်ခ်ဟာ ပိုလ်တာဗာမှာ တည်ရှိနေတာပါ။ အဲဒီစက်ရုံဟာ အရင်ကလည်း ရုရှားရဲ့ ဒရုန်းတွေ၊ ဒုံးကျည်တွေနဲ့ တိုက်ခိုက်မှုကို အကြိမ်ကြိမ် ခံခဲ့ရဖူးပြီး ဖြစ်ပါတယ်။

ယူကရိန်း စွမ်းအင် ဝန်ကြီးဌာနကတော့ ၂၀၂၅ ခုနှစ် မတ်လနောက်ပိုင်း ယူကရိန်းရဲ့ စွမ်းအင်ဆိုင်ရာ အဆောက်အအုံတွေကို ရုရှားက ပစ်မှတ်ထားတဲ့ တိုက်ခိုက်မှု အကြိမ်ပေါင်း ၂၉၀၀ လောက်ရှိခဲ့ပြီးပြီလို့ ဆိုပါတယ်။ ရုရှားကတော့ အရပ်ဖက်ဆိုင်ရာ အခြေခံ အဆောက်အအုံတွေကို ပစ်မှတ်ထားနေတယ်ဆိုတဲ့ စွပ်စွဲချက် မှန်သမျှကို ငြင်းဆန်ထားပါတယ်။

ကိုးကား: Reuters