ဗြိတိန် မီဒီယာ လုပ်ငန်းစုကြီး BBCကို အသရေဖျက်မှုနဲ့ အမေရိကန် သမ္မတ ဒေါ်နယ်လ်ထရမ့်က တရားစွဲဆိုလိုက်ပါတယ်။
BBCရဲ့ မှတ်တမ်းရုပ်ရှင်တွေ ဖန်တီးထုတ်လုပ်တဲ့ Panorama အစီအစဉ်မှာ ထရမ့်ရဲ့ မိန့်ခွန်းတစ်ခုကို မူရင်း အဓိပ္ပါယ်နဲ့ အရမ်းလွဲချော်အောင် တည်းဖြတ် ပြင်ဆင်ထားတဲ့ ကိစ္စနဲ့ ပတ်သက်ပြီး သမ္မတရဲ့ ရှေ့နေတွေက တရားစွဲခဲ့တာ ဖြစ်ပါတယ်။
၂၀၂၁ ခုနှစ်၊ ဇန်နဝါရီ ၆ ရက်နေ့တုန်းက ထရမ့်ကို ထောက်ခံသူတွေက အမေရိကန် လွှတ်တော်ထဲ အင်အားသုံး စီးနင်းခဲ့တဲ့ ဖြစ်စဉ်မတိုင်ခင် ထရမ့်ပြောကြားခဲ့တဲ့ မိန့်ခွန်းကို BBCက ပြုပြင် တည်းဖြတ်ခဲ့တာ ဖြစ်ပါတယ်။ အဲဒီ တည်းဖြတ်မှုရဲ့ ရလဒ်က ထရမ့်ဟာ မင်းမဲ့စရိုက်ဆန်ဆန် ဆူပူမှုတွေ ကျူးလွန်ကြဖို့ ထောက်ခံသူတွေကို တိုက်တွန်းတောင်းဆိုသလို ဖြစ်သွားပါတယ်။
တကယ်တော့ BBCက ထရမ့်ရဲ့ မိန့်ခွန်းထဲက မိနစ်တွေ တော်တော်များများ ခြားနေတဲ့ အပိုင်းနှစ်ခုကို ဆက်စပ်လိုက်တာကြောင့် အဲဒီလို မူရင်းအဆိုနဲ့ ကွဲလွဲတဲ့ အဓိပ္ပါယ်မျိုးဆီ ဦးတည်သွားခဲ့တာ ဖြစ်ပါတယ်။
Public Service Announcement
ထရမ့်ရဲ့ ရှေ့နေတွေက ဒီကိစ္စအတွက် BBCကို ပြန်လည် ဖြေရှင်းတောင်းပန်ဖို့၊ ထရမ့်ကို နစ်နာကြေးပေးဖို့ တောင်းဆိုခဲ့ပါတယ်။ နိုဝင်ဘာလထဲမှာ BBCက မှတ်တမ်းရုပ်ရှင်ကို ဖယ်ရှားပေးခဲ့ပြီး ထရမ့်ကိုလည်း တောင်းပန်ခဲ့ပေမယ့် နစ်နာကြေး ပေးဖို့ကိုတော့ ငြင်းဆန်ခဲ့ပါတယ်။ ဒီအရှုပ်အထွေးကို အကြောင်းပြုပြီး BBCရဲ့ ထိပ်တန်း ဦးဆောင် အရာရှိ တချို့လည်း ရာထူးကနေ တာဝန်ယူ နုတ်ထွက်ခဲ့ပါတယ်။
BBCက အမှားအတွက် တောင်းပန်ပေမယ့် ထရမ့်ရဲ့ ရှေ့နေတွေ ပြောသလိုမျိုး ရည်ရွယ်ချက်ရှိရှိ အသရေဖျက်တယ်ဆိုတဲ့ သဘောတရားမျိုး လုံးဝ မပါတာကြောင့် နစ်နာကြေးပေးဖို့ ငြင်းဆိုခဲ့ပါတယ်။ အခုတော့ ထရမ့်ရဲ့ ရှေ့နေတွေက BBCဟာ အမေရိကန် သမ္မတအပေါ် ရည်ရွယ်ချက်ရှိရှိ၊ ကောက်ကျစ်တဲ့ အတွေးမျိုးနဲ့ လှည့်စားပြီး နာမည်ဖျက်ဖို့ မိန့်ခွန်းကို တည်းဖြတ်ခဲ့ပါတယ်လို့ စွပ်စွဲပြီး တရားစွဲဆိုလိုက်တာ ဖြစ်ပါတယ်။ BBC မီဒီယာ လုပ်ငန်းစုကြီးကတော့ ဒီကိစ္စအပေါ် ဘာမှတ်ချက်မှ မပေးသေးပါဘူး။
၂၀၂၄ ခုနှစ် အမေရိကန် ရွေးကောက်ပွဲ မတိုင်ခင် ဗြိတိန်မှာ ထုတ်လွှင့်ခဲ့တဲ့ မှတ်တမ်းရုပ်ရှင် ကိစ္စနဲ့ ပတ်သက်ပြီး BBCကို တရားစွဲဖို့ သူက စီစဉ်နေကြောင်း ပြီးခဲ့တဲ့လမှာ ထရမ့်က ပြောကြားခဲ့ပါတယ်။ ဒီကိစ္စကို သူ့အနေနဲ့ မဖြစ်မနေ လုပ်ရမယ်လို့ ယူဆကြောင်း ထရမ့်က သတင်းထောက်တွေဆီ မှတ်ချက်ပေးခဲ့ပါတယ်။ BBCဟာ လိမ်ညာခဲ့ကြောင်း၊ သူ့ပါးစပ် ထွက်တဲ့ စကားလုံးတွေကို လိုသလို ခြယ်လှယ် ပြောင်းလဲခဲ့ကြောင်း ထရမ့်က စွပ်စွဲသွားပါတယ်။
ကိုးကား: BBC
