အင်ဒိုနီးရှား နိုင်ငံမှာ မြေပြိုကျမှု ဖြစ်ပွားပြီး သတ္တုမိုင်းတွင်း အလုပ်သမား ၉ ဦး သေဆုံးခဲ့ပါတယ်။
ဆူမားတြား ကျွန်းပေါ်မှာ မေလ ၁၄ ရက်နေ့က တရားမဝင် ရွှေသတ္တု တူးဖော်တဲ့ မိုင်းတွင်းတစ်ခုနားမှာ မြေပြိုမှု ဖြစ်ခဲ့တာပါ။ မေလ ၁၅ ရက်နေ့မှာတော့ ဆီဂျွန်ဂျန် ခရိုင်ထဲက အခင်းဖြစ်ပွားတဲ့ နေရာမှာ ရုပ်အလောင်း ၉ ခုကို ပြန်လည် ရှာဖွေ တွေ့ရှိထားပြီးပြီလို့ ရဲတွေက ပြောကြားခဲ့ပါတယ်။
သတ္တုမိုင်းတွင်းနားက တောင်တစ်လုံးကနေ မြေတွေ ပြိုကျခဲ့ပြီး ၃ ကီလိုမီတာလောက် အကွာမှာတင် ရှိနေခဲ့တဲ့ မိုင်းတွင်းလုပ်သားတွေအပေါ်ကို ဖုံးလွှမ်းသွားခဲ့တာ ဖြစ်ပါတယ်။
အနောက်ပိုင်း ဆူမားတြား ရဲတပ်ဖွဲ့ရဲ့ ပြောရေးဆိုခွင့်ရ အရာရှိ ဆူမီလာဝါတီ ရော့စ်ယာက အခင်းဖြစ်တဲ့ နေရာဟာ တရားမဝင် ရွှေတူးတဲ့ မိုင်းတွင်းတစ်ခု ဖြစ်ကြောင်း၊ မြေပြိုမှုကြောင့် ၉ ဦးသေခဲ့ပြီး ၃ ဦးကတော့ အသက်ရှင်လျက် လွတ်မြောက်ခဲ့ကြောင်း ဆိုပါတယ်။
Public Service Announcement
လူ ၉ ဦး ပျောက်ဆုံးနေကြောင်း သိရှိခဲ့တဲ့နောက် ရဲတွေနဲ့ စေတနာ့ဝန်ထမ်းတွေဟာ ကယ်ဆယ်ရေးနဲ့ ရှာဖွေရေး မစ်ရှင်တွေကို အပူတပြင်း လုပ်ဆောင်ခဲ့ပါတယ်။ ရွှံ့ချပ်တွေကို ဖယ်ရှားဖို့ အတွက်လည်း အကြီးစား စက်ယန္တရားတွေကို အသုံးပြုခဲ့ပါတယ်။ ဒါပေမဲ့လည်း နောက်ဆုံးမှာတော့ အသက်ရှင်သူ မရှိဘဲ ရုပ်အလောင်းတွေကိုပဲ ရှာတွေ့ခဲ့တာပါ။
အရှေ့တောင်အာရှ ဒေသတွင်းက ဓာတ်သတ္တု သယံဇာတ ကြွယ်ဝတဲ့ ကျွန်းစုနိုင်ငံမှာ အစိုးရဆီက လိုင်စင်မယူဘဲ တရားမဝင် သတ္တုတူးဖော်တဲ့ မိုင်းတွင်းတွေ နေရာအနှံ့ ရှိကြပါတယ်။ အဲဒီမိုင်းတွင်းတွေဟာ ထိရောက်တဲ့ လုံခြုံရေး အစီအမံတွေ၊ လုံခြုံရေး အသုံးအဆောင် ထောက်ပံ့မှုတွေလည်း မရှိကြပါဘူး။
ပြီးတော့ မုတ်သုံမိုး ရွာသွန်းတဲ့ ကာလတွေဆိုရင် အင်ဒိုနီးရှားမှာ မြေပြိုမှုတွေကလည်း မကြာခဏ ဖြစ်ပွားတတ်ပါတယ်။ အခုဖြစ်စဉ်ကို ဆက်လက် စုံစမ်းစစ်ဆေးမှာဖြစ်ကြောင်း၊ အဲဒီ သတ္တုမိုင်းတွင်းကိုလည်း ကျိန်းသေပေါက် ပိတ်ပင်မှာဖြစ်ကြောင်း ဆူမီလာဝါတီက ဆိုပါတယ်။
မနှစ်တုန်းကလည်း အနောက်ဂျာဗား ပြည်နယ်ထဲက စကျင်ကျောက် တူးဖော်တဲ့ စခန်းတစ်ခုမှာ ကျောက်သားတွေ ပြိုကျရာက လူ ၁၈ ဦး သေဆုံးခဲ့ပါတယ်။ ၂၀၂၄ ခုနှစ်မှာတော့ ဆူလာဝေဆီ ကျွန်းပေါ်က တရားမဝင် ရွှေသတ္တု မိုင်းတွင်းမှာ မြေပြိုမှုဖြစ်ပြီး ၂၃ ဦးထက်မနည်း အသက်ဆုံးရှုံးခဲ့ပါတယ်။
ကိုးကား: AFP
