ယူကရိန်း အရှေ့ပိုင်းက မဟာဗျူဟာအရ အရေးပါတဲ့ မြို့ကို ဝန်းရံဖို့ ရုရှားတပ်တွေ ကြိုးစားနေ

ယူကရိန်းနိုင်ငံ အရှေ့ပိုင်းက မဟာဗျူဟာအရ အထူးအရေးကြီးတဲ့ မြို့တစ်မြို့နားမှာ ရုရှားတပ်တွေ စုဝေးနေတဲ့နောက် ယူကရိန်းရဲ့ ဒေသတွင်း ထိန်းချုပ်နယ်မြေတွေ လုံခြုံရေးအတွက် စိုးရိမ်စရာ ဖြစ်လာပါတယ်။

ပြီးခဲ့တဲ့ ရက်ပိုင်းတွေအတွင်း ကော့စတီယန်တီနစ်ဗ်ကာ မြို့နားမှာ ရုရှားတပ်တွေ အင်အား အလုံးအရင်းနဲ့ ဖြန့်ကျက်နေပြီး မြို့ကို ဝန်းရံပိတ်ဆို့ဖို့ ကြိုးစားလာနေပါတယ်။ အစောပိုင်းတုန်းက မြို့ကို ယူကရိန်းက ထိန်းချုပ်ထားပေမယ့် အခုတော့ မီးခိုးရောင် နယ်မြေအဖြစ် ပြောင်းလဲသွားပြီလို့ ရှေ့တန်းရောက် ယူကရိန်း စစ်သားတွေက ပြောပါတယ်။ အဓိပ္ပါယ်ကတော့ ဘယ်ဖက်ကမှ ပိုင်ပိုင်နိုင်နိုင် ထိန်းချုပ်မထားနိုင်တဲ့ အခြေအနေ ဖြစ်နေတာမျိုးပါ။

ရုရှား တပ်တွေဟာ ယူကရိန်း ကာကွယ်ရေး တပ်ဖွဲ့တွေရဲ့ နောက်ဖက်ကနေ ပတ်ပြီး ဝန်းရံ ပိတ်ဆို့ဖို့ ကြိုးစားနေကြောင်း၊ မြို့ရဲ့ ဖွဲ့စည်းပုံ အနေအထားအရ ရုရှားတပ်တွေရဲ့ လှုပ်ရှားမှုကို တားဆီးဖို့လည်း ခက်ခဲလွန်းနေကြောင်း ယူကရိန်း စစ်တပ်ရဲ့ ဒရုန်း မောင်းနှင်သူ တစ်ဦးက ပြောကြားခဲ့ပါတယ်။

ရုရှားဟာ ယူကရိန်းပြည်နယ် အရှေ့ပိုင်းက ကျယ်ပြောလှတဲ့ ဒွန်းဘက်စ် ဒေသကြီး တစ်ခုလုံးကို သိမ်းယူဖို့ ရည်ရွယ်ထားပါတယ်။ လက်ရှိမှာလည်း ဒွန်းဘက်စ်ရဲ့ အစိတ်အပိုင်း အများစုဟာ ရုရှားလက်အောက် ကျရောက်နှင့်နေပါပြီ။ ယူကရိန်း ထိန်းချုပ်ထားဆဲ လက်ကျန် နယ်မြေတွေဆီ ရောက်ရှိဖို့ဆိုရင် ကော့စတီယန်တီနစ်ဗ်ကာဟာ အဓိက ဝင်ပေါက် သဘောမျိုး ဖြစ်နေပါတယ်။

Public Service Announcement

တစ်နည်းအားဖြင့် အဲဒီမြို့ ကျဆုံးသွားရင် ယူကရိန်းရဲ့ အရှေ့ခြမ်းမှာရှိတဲ့ နောက်ဆုံးလက်ကျန် အမာခံ ထိန်းချုပ် နယ်မြေတွေကို ရုရှားက အကြီးအကျယ် ခြိမ်းခြောက်လာနိုင်မယ့် သဘောပါပဲ။ ခရာမာတော့စ်ခ်နဲ့ ဆလိုဗီယန့်စ်ခ်စတဲ့ မြို့တွေရဲ့ လုံခြုံရေးကလည်း စိုးရိမ်စရာ ဖြစ်လာမှာပါ။ ဒွန်းဘက်စ်ကို သိမ်းယူဖို့ ဆိုတာဟာ ယူကရိန်း ကျူးကျော်စစ်မှာ ရုရှားရဲ့ အဓိက ရည်မှန်းချက် တစ်ခုဆိုတာကို ရုရှား အစိုးရဖက်က အတိအလင်း ပြောကြားထားပြီး ဖြစ်ပါတယ်။

ပြီးခဲ့တဲ့ လပိုင်းတွေအတွင်း ရုရှားရဲ့ ထိုးစစ်တွေဟာ အရှိန်ရပ်နေခဲ့သလို ၂၀၂၆ ခုနှစ်မှာ ရုရှားဟာ ထပ်မံ ချဲ့ထွင် သိမ်းယူနိုင်တဲ့ နယ်မြေထက် ပြန်လည် လက်လွှတ်လိုက်ရတဲ့ နယ်မြေတွေက ပိုမိုများပြားတဲ့ အခြေအနေနဲ့ပါ ရင်ဆိုင်နေရပါတယ်။ အဲဒီနောက်မှာတော့ အခုလိုမျိုး ကော့စတီယန်တီနစ်ဗ်ကာကို ပစ်မှတ်ထားတဲ့ လူသူအင်အား စုဝေးမှုတွေကို စတင်လာတာ ဖြစ်ပါတယ်။

ရုရှား ကာကွယ်ရေး ဝန်ကြီးဌာနက ထုတ်ပြန်တဲ့ ဓာတ်ပုံနဲ့ ဗီဒီယို မှတ်တမ်းတွေမှာတော့ ရုရှားစစ်သားတွေဟာ ကော့စတီယန်တီနစ်ဗ်ကာရဲ့ အနီးတဝိုက် ဧရိယာတွေထိ ချဉ်းနင်းရောက်ရှိနေပြီ ဆိုတာကို ဖော်ပြထားပါတယ်။ ရုရှားစစ်သားတွေဟာ မြို့ရဲ့ တောင်ဖက်ပိုင်းကနေ တဖြည်းဖြည်းချင်း ထိုးဖောက်လာနေသလို မြောက်ပိုင်းမှာလည်း ရုရှားတပ်တွေ လှုပ်ရှားနေတာကို တွေ့ရပါတယ်။

ရုရှားဖက်က ထုတ်ပြန်ချက်မှာတော့ ကော့စတီယန်တီနစ်ဗ်ကာရဲ့ အနောက်တောင်ပိုင်း စစ်မျက်နှာကနေ ရုရှားစစ်ကြောင်းတွေ အလျင်အမြန် ရှေ့တိုးချီတက်နေနိုင်ပြီး ယူကရိန်း တပ်တွေကို စတင် ပိတ်ဆို့ ဝန်းရံနေပြီလို့ ပါရှိခဲ့ပါတယ်။ ယူကရိန်း အစိုးရနဲ့ ဒေသခံ ရှေ့တန်း ယူနစ်တွေကတော့ ရုရှားရဲ့ အဆိုကို ပယ်ချထားပါတယ်။ ဒါပေမဲ့ ရုရှားစစ်သား ၁၃၀ ကျော်လောက်တော့ မြို့ရဲ့ ပိုင်နက်ထဲ စတင် ဝင်ရောက်နေပြီလို့တော့ ယူကရိန်း အမှတ် ၁၉ တပ်မဟာမှူး ဗိုလ်မှူးချုပ် အိုလက်ဇန္ဒာ ဘာကူလင်က ဝန်ခံခဲ့ပါတယ်။

အမည်မဖော်လိုတဲ့ ယူကရိန်းစစ်ဘက် အရာရှိ တစ်ဦးကတော့ ကော့စတီယန်တီနစ်ဗ်ကာမြို့ရဲ့ အခြေအနေဟာ ရုရှား ဝါဒဖြန့်နေသလောက် အသည်းအသန် အဆင့် မဟုတ်သေးကြောင်း၊ ဒါပေမဲ့ ယူကရိန်း အစိုးရ အတွက်လည်း ထုတ်ဖော် ဝန်ခံရမှာ တွန့်ဆုတ်ရလောက်တဲ့အထိ ဆုတ်ယုတ်မှုတွေလည်း ရှိနေကြောင်း မှတ်ချက်ပေးသွားခဲ့ပါတယ်။

ကိုးကား: BBC