ပေါ်တူဂီ အသင်းဟာ ခရိုအေးရှား အသင်းနဲ့ ခက်ခဲတဲ့ ပွဲစဉ်ကို ဖြတ်သန်းပြီးတဲ့နောက် ကမ္ဘာ့ဖလား ၁၆ သင်း ရှုံးထွက်အဆင့်ဆီ ရောက်ရှိလာနိုင်ခဲ့ပါတယ်။ ဒီပွဲက ပရိသတ်တွေအတွက် ဖျော်ဖြေမှုတွေ ပေးနိုင်ခဲ့သလို နောက်ဆုံးမိနစ် သွင်းဂိုး ပယ်ဖျက်ခံရမှုလို ပြဇာတ်ဆန်တဲ့ အလှည့်အပြောင်းတွေကိုပါ မြင်တွေ့စေခဲ့ရပါတယ်။
ပေါ်တူဂီက နှစ်ဂိုး-တစ်ဂိုးနဲ့ အနိုင်ရခဲ့တဲ့ ပွဲစဉ်မှာ နှစ်သင်းစလုံး နောက်ထပ် ဂိုးတွေ သွင်းခဲ့ကြပေမယ့် လူကျွံဘောတွေ ဖြစ်နေခဲ့ကြတာပါ။ ပထမပိုင်းမှာတော့ နှစ်သင်းစလုံး ဂိုးမသွင်းနိုင်ခဲ့ကြပါဘူး။
ဒုတိယပိုင်း ပြန်စပြီးတဲ့နောက် ၅၃ မိနစ်မှာတော့ အိုင်ဗန် ပါရီဆစ်က ခရိုအေးရှားအတွက် ဦးဆောင်ဂိုးကို စတင်သွင်းယူပေးခဲ့ပါတယ်။ သိပ်မကြာခင်မှာပဲ ခရိုအေးရှားက ဂိုးထပ်သွင်းပေမယ့် လူကျွံနေတာကြောင့်သာ ပေါ်တူဂီတို့ သက်သာရာ ရခဲ့တာပါ။ ပြီးတော့ ပေါ်တူဂီ အသင်းခေါင်းဆောင် ခရစ္စတီယာနို ရော်နယ်လ်ဒိုရဲ့ သွင်းဂိုးကလည်း လူကျွံနေခဲ့ပြန်ပါတယ်။
ပေါ်တူဂီအတွက် ချေပဂိုးကိုတော့ ပွဲချိန် ၆၈ မိနစ်မှာ ရော်နယ်လ်ဒိုက ပင်နယ်တီကနေ သွင်းယူခဲ့ပါတယ်။ ထောင့်ကန်ဘောကို ခေါင်းတိုက်ဖို့ ကြိုးစားတဲ့ ရီနာတို ဗီဂါကို ခရိုအေးရှား ကွင်းလယ်လူ နစ်ကိုလာ ဗလာဆစ်က နောက်ကနေ ဆွဲလှဲချခဲ့တာကြောင့် ကွင်းလယ်ဒိုင်က ဗီဒီယို အနှေးပြကွက် VAR ပြန်ကြည့်ပြီး ပင်နယ်တီအဖြစ် အတည်ပြုပေးခဲ့တာပါ။ အဲဒီ ပင်နယ်တီကို ရော်နယ်လ်ဒိုက အမှားအယွင်းမရှိ အဆုံးသတ်ပြီး ပေါ်တူဂီကို အခြေအနေ ပြန်ကောင်းလာစေခဲ့ပါတယ်။
Public Service Announcement
ကနေဒါနိုင်ငံ၊ တိုရန်တိုမြို့က BMO Field အားကစားကွင်းကြီးထဲမှာ သွင်းယူတဲ့ အဲဒီပင်နယ်တီဟာ ကမ္ဘာ့ဖလား သမိုင်းတလျှောက် ရှုံးထွက်အဆင့် ပွဲစဉ်တွေမှာ ရော်နယ်လ်ဒို ရရှိဖူးတဲ့ ပထမဆုံး သွင်းဂိုးလည်း ဖြစ်လာပါတယ်။ အဲဒီနောက်မှာ ခရိုအေးရှားက နောက်တစ်ဂိုး သွင်းပေမယ့်လည်း လူကျွံနေခဲ့ပြန်ပါတယ်။
ပေါ်တူဂီအတွက် အနိုင်ဂိုးကိုတော့ ပွဲချိန် မိနစ် ၉၀ အပြီး နာကျင်အပိုဆောင်းချိန် ၄ မိနစ်မှာ ရာဖေးလ်လီယာအို ကန်တင်ပေးတဲ့ ဘောလုံးကနေ လူစားဝင် တိုက်စစ်မှူး ဂွန်ဆာလို ရာမို့စ်က ခေါင်းတိုက်ပြီး သွင်းယူပေးခဲ့ပါတယ်။
နောက်ဆုံးလက်ကျန် မိနစ်တွေမှာ ခရိုအေးရှားကလည်း ချေပဂိုး ပြန်ရဖို့ ကစားအားကို အစွမ်းကုန် မြှင့်တင်လာခဲ့ပြီး ပွဲပြီးဖို့ စက္ကန့်ပိုင်းလောက် အလိုမှာ နောက်ခံလူ ဂျော့စကို ဂျီဗာဒီယောလ်က ဂိုးသွင်းယူခဲ့ပါတယ်။ အချိန်ပို ဆက်ကစားရမယ်လို့ ထင်ပြီး ခရိုအေးရှား တစ်သင်းလုံး အောင်ပွဲခံနေပေမယ့် ဒိုင်လူကြီးက VAR အဆုံးအဖြတ်အရ လူကျွံဘောလို့ သတ်မှတ်လိုက်တာကြောင့် ကစားသမားတွေ ကြေကွဲခဲ့ရပါတယ်။
အခုပွဲကို အနိုင်ရခဲ့တာကြောင့် ပေါ်တူဂီ အသင်းဟာ ၁၆ သင်း ရှုံးထွက်အဆင့်မှာ စပိန်နဲ့ ရင်ဆိုင်ကစားရတော့မှာ ဖြစ်ပါတယ်။
ကိုးကား: FIFA
