ပြင်သစ်မှာ ရထားလမ်းချော်မှုဖြစ်ပြီး ၄၀ ကျော် ဒဏ်ရာရ

ပြင်သစ်နိုင်ငံမှာ ရထားတစ်စီး သံလမ်းချော်မှု ဖြစ်ပွားပြီး လူ ၄၀ ကျော် ဒဏ်ရာရရှိခဲ့ပါတယ်။

နိုင်ငံမြောက်ပိုင်းက ရုန်းမြို့နားမှာရှိတဲ့ ကလီယွန် ဧရိယာမှာ စက်တင်ဘာ ၁၁ ရက်နေ့ ညနေပိုင်းက ရထားလမ်းချော်မှု ဖြစ်ခဲ့တာပါ။ ရုန်းနဲ့ ကိန်းမြို့တွေကြား ပြေးဆွဲရာ ရထားပေါ်မှာ လူပေါင်း ၁၈၀ လောက် စီးနင်းလိုက်ပါလာပြီး ၄၄ ဦး ဒဏ်ရာရခဲ့ကြောင်း၊ အသက် ၁၈ နှစ်အရွယ် မိန်းကလေးငယ် တစ်ဦးကတော့ ဒဏ်ရာပြင်းလို့ ဆေးရုံကို ရဟတ်ယာဉ်နဲ့ အရေးပေါ် ပို့ဆောင်ခဲ့ရကြောင်း ပို့ဆောင်ရေးဝန်ကြီး ဖိလစ် တာဘာရော့က ပြောကြားခဲ့ပါတယ်။

မီးသတ်တပ်ဖွဲ့ဝင်တွေနဲ့ တခြား အရေးပေါ် အခြေအနေ တုံ့ပြန်ရေး အေဂျင်စီ ဝန်ထမ်းတွေ စုစုပေါင်း ၁၄၀ လောက်ဟာ အခင်းဖြစ်ရာ နေရာကို အဆောတလျင် သွားရောက်ပြီး ကယ်ဆယ်ရေးတွေ ဆောင်ရွက်ခဲ့တယ်လို့ သိရပါတယ်။

လူမှုကွန်ရက်ပေါ် ပျံ့နှံ့လာတဲ့ ဓာတ်ပုံတွေမှာတော့ ရထားပျက်ထဲကနေ ခရီးသည်တွေ လမ်းလျှောက်ပြီး ထွက်လာကြတာကို တွေ့ရပါတယ်။ အဆိုအရ ရထားတွဲ သုံးခုဟာ လမ်းချော်ပြီး တိမ်းမှောက်သွားခဲ့ကြောင်း ပြင်သစ်မီဒီယာတွေက ဖော်ပြခဲ့ပါတယ်။

Public Service Announcement

ရထားလမ်းချော်မှု ဖြစ်ပွားရတဲ့ အကြောင်းရင်းကိုတော့ မသိရသေးပါဘူး။ ပို့ဆောင်ရေး ဝန်ကြီးဌာနက ကိန်းနဲ့ ရုန်းကြားမှာ ရထားပြေးဆွဲမှုတွေဟာ အခုဖြစ်စဉ်ကြောင့် နှောင့်နှေးမှုတွေ၊ တခြားပြဿနာတွေ ကြုံတွေ့ခဲ့ကြောင်း ထုတ်ပြန်ပါတယ်။

အာဏာပိုင်တွေက ရထားလမ်းချော်မှု ဖြစ်ထားတဲ့ နေရာတဝိုက်ကို ဒေသခံတွေ သွားရောက်တာမျိုး မလုပ်ဖို့လည်း တိုက်တွန်းထားပါတယ်။

ကိုးကား: BBC