ရုရှားအပေါ် အရေးယူ ပိတ်ဆို့မှုတွေ ဖြေလျှော့ပေးလိုက်တဲ့ အမေရိကန် သမ္မတ ဒေါ်နယ်လ်ထရမ့်ရဲ့ ဆုံးဖြတ်ချက်ကို ယူကရိန်း သမ္မတ ဗိုလိုဒီမာ ဇီလန်စကီးက ဝေဖန်လိုက်ပါတယ်။
အောက်တိုဘာ ၁၆ ရက်နေ့မှာ ထရမ့်က အထူးအမိန့်တစ်ခုကို လက်မှတ်ရေးထိုးပြီး ရုရှားအပေါ် အမေရိကန်ရဲ့ စီးပွားရေးနဲ့ ကုန်သွယ်ရေးဆိုင်ရာ အဓိကကျတဲ့ ပိတ်ဆို့အရေးယူမှုတွေကို ဖြေလျှော့စေခဲ့ပါတယ်။ အဲဒီထဲမှာ ရုရှားအခွန်တွေအပေါ် အခွန်လျှော့ပေါ့ပေးတာ၊ ရုရှားဆီက ရေနံနဲ့ ဓာတ်ငွေ့တွေ ဝယ်ယူမှုကို ပြန်လည် ခွင့်ပြုတာတွေ ပါဝင်ခဲ့ပါတယ်။ အဲဒီ ဖြေလျှော့မှုတွေဟာ လာမယ့်သီတင်းပတ်မှာ စတင် အသက်ဝင်လာမှာပါ။
အောက်တိုဘာ ၁၇ ရက်နေ့မှာတော့ ဇီလန်စကီးက အဲဒီလို ဖြေလျှော့မှုမျိုးကြောင့် ရုရှားသမ္မတ ဗလာဒီမာ ပူတင်က ပိုအတင့်ရဲလာမှာ ဖြစ်သလို ယူကရိန်းအပေါ် ရုရှားရဲ့ ရန်လိုမှုလည်း ပိုကြီးထွားလာလိမ့်မယ်လို့ လူမှုကွန်ရက် မီဒီယာ Xမှာ ရေးသားခဲ့ပါတယ်။
အမေရိကန်က ပိတ်ဆို့မှုတွေကို ပြန်လျှော့ပေးခဲ့တဲ့ အဲဒီဆုံးဖြတ်ချက် အားလုံးဟာ သူ့အမြင်မှာတော့ မှားယွင်းလွန်းနေကြောင်း၊ ပြီးတော့ ရုရှားကိုလည်း အကူအညီပေးရာ ရောက်နေကြောင်း သူက ဆိုပါတယ်။
Public Service Announcement
၂၀၂၂ မှာ ရုရှားက အိမ်နီးချင်း ယူကရိန်းနိုင်ငံကို ကျူးကျော် တိုက်ခိုက်ခဲ့တဲ့နောက် အမေရိကန်ဟာ ရုရှားအပေါ် တင်းကျပ်တဲ့ စီးပွားရေး ပိတ်ဆို့မှုတွေ သတ်မှတ်ခဲ့ပါတယ်။ အမေရိကန်ရဲ့ ရပ်တည်မှုဟာ ယူကရိန်းအပေါ် ရုရှားရဲ့ ကျူးကျော်စစ် ရပ်တန့်သွားအောင် ဖိအားပေးဖို့ ဖြစ်ပေမယ့် အခုတော့ ထရမ့်က ပိတ်ဆို့မှုတွေကို ဖြေလျှော့ပေးလိုက်တာပါ။ အဲဒီ ဆုံးဖြတ်ချက်နဲ့ ပတ်သက်လို့ ထရမ့်က သူဟာ အမေရိကန်ရဲ့ အမျိုးသားရေး အကျိုးစီးပွားနဲ့ ကိုက်ညီအောင် ဆောင်ရွက်ခဲ့တာလို့ အကြောင်းပြချက် ပေးပါတယ်။
တစ်ချိန်တည်းမှာပဲ သူဟာ ရုရှားရဲ့ ရေနံချက် စက်ရုံတွေကို တိုက်ခိုက်နေတဲ့ ယူကရိန်းကိုလည်း ဝေဖန်ခဲ့ပါတယ်။ နောက်ပြီး ဇီလန်စကီးဟာ ပြဿနာတွေကို ဖြေရှင်းဖို့ ဆန္ဒမရှိသူလို့ ထရမ့်က ထိုးနှက်ခဲ့ပြီး ယူကရိန်းဟာ ခေါင်းဆောင်သစ် တစ်ဦးကို ရရှိသင့်နေပြီလို့လည်း ပြောကြားထားပါသေးတယ်။
ဇီလန်စကီးက ထရမ့်ရဲ့ နောက်ဆုံး ခြေလှမ်းသစ်ဟာ ပူတင်က တိုက်ခိုက်မှုတွေ ပိုမိုလုပ်ဆောင်လာဖို့ အတင့်ရဲသွားစေလိမ့်မယ်လို့ ဝေဖန်ခဲ့ပါတယ်။ ရုရှားကို အလိုပြည့်အောင် ကူညီတာ မှန်သမျှက လူတွေ ပိုသတ်ချင်တဲ့ ဆန္ဒကို လောင်စာဖြည့်ပေးတာနဲ့ အတူတူပဲဖြစ်ကြောင်း ဇီလန်စကီးက ဆိုပါတယ်။
ရုရှားဟာ အောက်တိုဘာ ၁၆ ရက်နေ့တုန်းက ယူကရိန်းရဲ့ ဓာတ်အားပေး စက်ရုံတွေ၊ ဓာတ်အားခွဲ စက်ရုံတွေ အပါအဝင် နေရာပေါင်း ၁၅ ခုကို တိုက်ခိုက်ခဲ့တယ်လို့လည်း ဇီလန်စကီးက ပြောပါတယ်။ ရုရှားက စစ်ပွဲကို ရပ်ဖို့ လုံးဝ စိတ်ကူးမရှိတာ သေချာကြောင်းလည်း ယူကရိန်း သမ္မတက ဝေဖန်ခဲ့ပါတယ်။
အခုအခါ ရုရှားဟာ ရှေ့တန်းစစ်မြေပြင်နဲ့ ဝေးကွာပြီး NATO မဟာမိတ်အဖွဲ့ ပိုင်နက်နဲ့ ပိုနီးကပ်တဲ့ ယူကရိန်း အနောက်ဖက်ခြမ်း နယ်မြေတွေမှာ တိုက်ခိုက်မှုတွေ အရှိန်မြှင့်ဖို့ စီစဉ်နေတယ်လို့လည်း ဇီလန်စကီးက စွပ်စွဲခဲ့ပါတယ်။
ရုရှားအစိုးရရဲ့ ရင်းနှီးမြှုပ်နှံမှုဆိုင်ရာ အထူးကိုယ်စားလှယ် ကီရဲလ် ဒီမီထရီယက်ဗ်ကတော့ ပိတ်ဆို့မှုတွေ ဖြေလျှော့ပေးလိုက်တဲ့ ထရမ့်ရဲ့ ဆုံးဖြတ်ချက်ကို စစ်မှန်တဲ့ သမိုင်းဝင် အခိုက်အတန့် တစ်ခုလို့ ချီးကျူး ညွှန်းဆိုထားပါတယ်။ အဲဒီ ပိတ်ဆို့မှုတွေကြောင့်ပဲ ရုရှားနဲ့ အမေရိကန်ကြား စီးပွားရေး ပူးပေါင်းဆောင်ရွက်မှုတွေ အားလုံးနီးပါး ရပ်တန့်နေခဲ့တာ ဖြစ်တယ်လို့လည်း သူက ပြောကြားသွားပါတယ်။
ကိုးကား: Reuters
