စစ်ကောင်စီ၏သန်းခေါင်စာရင်းနှင့် ရွေးကောက်ပွဲသပိတ်မှောက်ရန်​ သရက်ချောင်းတွင် လှုံ့ဆော်မှုပြုလုပ်

သုည/People’s Spring

တနင်္သာရီတိုင်း ထားဝယ်ခရိုင် သရက်ချောင်းမြို့နယ်တွင် ဒီမိုကရေစီအရေးလှုပ်ရှားမှုသပိတ်ကော်မတီမှ ဦးဆောင်ပြီး စစ်ကောင်စီ၏ သန်းခေါင်စာရင်းကောက်ယူနေမှုနှင့် အတုအယောင်ရွေးကောက်ပွဲကို ပြည်သူများဆန့်ကျင်ကြရန် လှုံ့ဆော်သည့် လှုပ်ရှားမှုတစ်ရပ်ကို ယနေ့ (စက်တင်ဘာ ၃၀)နံနက်က ပြုလုပ်ခဲ့သည်။

သပိတ်အင်အားစုမှ လူငယ်များက သရက်ချောင်းမြို့နယ် လမ်းမများထက်၌ “စစ်ကောင်စီရဲ့ သန်းခေါင်စာရင်းကို ငြင်းဆန်ကြ” ၊ “အတုအယောင်ရွေးကောက်ပွဲကို သပိတ်မှောက်ကြ” ဆိုသည့် စာသားများ ရေးသား၍ တိုက်တွန်းလှုံ့ဆော်ခဲ့ကြသည်။

Public Service Announcement

“ပြည်သူတွေ ဒုက္ခရောက်နေတဲ့ကြားက စစ်ကောင်စီဟာ ပြည်လုံးကျွတ်သန်းခေါင်စာရင်းကောက်ယူဖို့ ကြိုးပမ်းနေပါတယ်။ ရရှိလာတဲ့ လူဦးရေဆိုင်ရာအချက်အလက်တွေကို အခြေခံပြီး စစ်ခေါင်းဆောင်တွေဟာ သူတို့အာဏာတည်မြဲရေးအတွက် စိတ်တိုင်းကျ ပုံဖော်နိုင်မယ့် ရွေးကောက်ပွဲ ပြုလုပ်ဖို့ စီစဥ်နေတာပါ။ ဒီရွေးကောက်ပွဲဟာ မြန်မာနိုင်ငံရဲ့ နိုင်ငံရေးပဋိပက္ခတွေကို ဖြေရှင်းပေးနိုင်မှာမဟုတ်ဘဲ စစ်ခေါင်းဆောင်တွေက နိုင်ငံရေးထွက်ပေါက်တခုအနေနဲ့ အသုံးချမယ့် ဟန်ပြရွေးကောက်ပွဲသာ ဖြစ်ပါတယ်။ စစ်ခေါင်းဆောင်တွေရဲ့ မတရားအာဏာရယူထားမှုကို သက်ဆိုးရှည်ဖို့ အထောက်အကူပြုမယ့် သန်းခေါင်စာရင်းကောက်ယူရေးနဲ့ ရွေးကောက်ပွဲတို့ကို ပြည်သူတွေအနေနဲ့ တတ်နိုင်သမျှ ဆန့်ကျင်ကြပါ”ဟု သရက်ချောင်းသပိတ်အင်အားစုက တိုက်တွန်းထားသည်။