ဇေအောင်/People’s Spring
စစ်ကိုင်းတိုင်း၊ ကန့်ဘလူမြို့နယ်ရှိ ကျေးရွာ ၃ရွာ ထပ်မံ မီးရှို့ဖျက်ဆီးခံရပြီး နေအိမ် ၁၃ဝ ကျော်ပျက်စီကာ ဒေသခံပြည်သူတစ်ဦးလည်း မီးရှို့သတ်ဖြတ်ခံရကြောင်း သတင်းရရှိသည်။
နိုဝင်ဘာ ၉ ရက်က အင်အား ၁၂၀ ခန့်ပါ စစ်ကောင်စီစစ်ကြောင်းသည် ကန့်ဘလူမြို့နယ် ဇီးကုန်းတိုက်နယ်အတွင်းရှိ ကျောင်းကုန်း၊ဖိုလ်ကုန်း နှင့် သပြေသာကျေးရွာတို့အား မီးရှို့ဖျက်ဆီးခဲ့ရာ ကျောင်းကုန်းရွာ နေအိမ် ၄၃ လုံး၊ဖိုလ်ကုန်းရွာမှ နေအိမ် ၂၃ လုံးနှင့် သပြေသာရွာရှိ နေအိမ် ၆၇ လုံး စုစုပေါင်း နေအိမ် ၁၃၃လုံး မီးလောင်ပျက်စီးခဲ့ကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က ပြောသည်။
ထို့အပြင် သပြေသာကျေးရွာ၌ မီးရှို့သတ်ခံရသည့် ရုပ်အလောင်းတစ်လောင်းတွေ့ရှိခဲ့ရပြီး အခြားပြည်သူတစ်ဦးလည်း ဖမ်းဆီးခံထားရကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့တာဝန်ရှိသူက ပြောသည်။
Public Service Announcement
“မီးရှို့အသတ်ခံရတာက ကျားလားမလား အတိအကျမသိရသေးဘူး။”ဟု ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့တာဝန်ရှိသူက ပြောသည်။
စစ်ကောင်စီတပ်သည် ကန့်ဘလူခရိုင်တွင်း လှည့်လည်စစ်ကြောင်းထိုးမီးရှို့နေသည်မှာ နှစ်ပတ်နီးပါး ရှိလာပြီဖြစ်ပြီး ဒေသခံပြည်သူ ၈၀၀၀ခန့် ထွက်ပြေးတိမ်းရှောင်နေရကြောင်း သတင်းရရှိသည်။
နိုဝင်ဘာ ၈ ရက်ကလည်း စစ်ကောင်စီတပ်က ဘအင်းသရက်တောရွာအား မီးရှို့ဖျက်ဆီးပြီး အမျိုးသား၂ ဦးအား သတ်ဖြတ်ကာ ၃ ဦးအား ဖမ်းဆီးသွားသည်။
စစ်ကောင်စီတပ်သည် ကန့်ဘလူမြို့နယ်တွင် နိုဝင်ဘာလဆန်းပိုင်းအတွင်း နေအိမ် ၈၀၀ နီးပါး မီးရှို့ဖျက်ဆီးပြီး ကျေးရွာ ၃ ရွာမှ ဒေသခံပြည်သူ ၉၂ ဦးအား ဖမ်းဆီးသွားကာ ယနေ့အထိ လွတ်မြောက်လာခြင်းမရှိသေးပေ။
ထို့အပြင် အောက်တိုဘာ ၂၈ ရက်က ကာဘိုးကျေးရွာမှ စစ်တပ်ဂိတ်တိုက်ခိုက်ခံရကာ စစ်သား ၃ ဦးသေဆုံးခဲ့ပြီးနောက် ကျေးရွာများ စစ်ကြောင်းထိုးမီးရှို့မှုများ ပြုလုပ်နေခြင်းဖြစ်သည်။
