ဇေအောင်/People’s Spring
စစ်ကိုင်းတိုင်း၊ ကန့်ဘလူမြို့နယ်ရှိ ကျေးရွာ ၂ရွာအား စစ်ကောင်စီတပ်က မီးရှို့ဖျက်ဆီးပြီး ဒေသခံပြည်သူ ၄၀ခန့်အား ဖမ်းဆီးခေါ်ဆောင်သွားကြောင်း သတင်းရရှိသည်။
ယမန်နေ့(အောက်တိုဘာ ၃၀ရက်) နေ့လည်ပိုင်းက ကန့်ဘလူမြို့နယ်၊ ကာဘိုးတိုက်နယ်အတွင်းရှိ ကျီစုရွာနှင့် ကျောက်တိုင်ကျေးရွာအား စစ်ကောင်စီတပ်နှင့်ပျူစောထီးပူးပေါင်းအင်အား ၁၆၀ ခန့်က ဝင်ရောက်မီးရှို့ဖျက်ဆီးသည့်အပြင် ဒရုန်းဖြင့် ဗုံးသီးချတိုက်ခိုက်ခဲ့ရာ ကျီစုကျေးရွာမှ ဘုန်းကြီးကျောင်း ၂ကျောင်းနှင့် နေအိမ် ၄၀၀ ခန့် ပျက်စီးဆုံးရှုံးခဲ့ကြောင်း ကျွန်းလှ ကန့်ဘလူ တက်ကြွလှုပ်ရှားသူများအဖွဲ့က ပြောသည်။
ထို့အပြင် ကျောက်တိုင်ကျေးရွာမှလည်း ဘုန်းကြီးကျောင်းတစ်ကျောင်း၊ စာသင်ဆောင်တစ်ဆောင်နှင့် နေအိမ် ၃၀၀ နီးပါး ပျက်စီးဆုံးရှုံးခဲ့ကြောင်း ၎င်းက ပြောသည်။
Public Service Announcement
“ကျီစုက အခုနဲ့ဆို ရှို့ခံရတာ သုံးကြိမ်၊ကျောက်တိုင်က နှစ်ကြိမ်ရှိပြီ။ ကျီစုက အရင်ရှို့ခံထားရတော့ အိမ်ခြေ ၂၀၀လောက်ကျန်တာ။ကျောက်တိုင်လည်း ၁၅၀လောက်ကျန်မှာပဲ။ နှစ်ရွာစလုံး ရှောင်နေရာကနေ အခုနောက်ပိုင်းမှ ကိုယ့်အိမ်ကွင်းနဲ့ကိုယ် အိမ်လေးတွေပြန်ဆောက်ပြီး နေကြတာ။ အခုတခါ စစ်ကြောင်းဝင်တော့ အရင်မရှို့ခံရတဲ့အိမ်တွေရော အကုန်ရှို့သွားတယ်တဲ့။”ဟု ကျွန်းလှ ကန့်ဘလူ တက်ကြွလှုပ်ရှားသူများအဖွဲ့တာဝန်ရှိသူက ပြောသည်။
ကျေးရွာများအတွင်း ဒရုန်းဖြင့် ဗုံးသီး ကြဲချခဲ့ရာ အိုင်ပေါင်းချောင်ကျေးရွာမှ အမျိုးသားတစ်ဦး ဗုံးစထိမှန် ဒဏ်ရာရရှိခဲ့ကြောင်း သိရသည်။
ထို့အပြင် အိုင်ပေါင်းချောင်ကျေးရွာမှ ဘုန်းကြီးကျောင်းအတွင်း စစ်ရှောင်နေသည့် အမျိုးသား ၃၄ဦးနှင့် အမျိုးသမီး သုံးဦး၊စုစုပေါင်း ဒေသခံ ပြည်သူ ၃၇ ဦးအား ဖမ်းဆီးခေါ်ဆောင်သွားကြောင်း သတင်းရရှိသည်။
အဆိုပါ စစ်ကောင်စီတပ် စစ်ကြောင်းအန္တရာယ် ကြောင့် ပြည်သူထောင်နှင့်ချီ ထွက်ပြေးတိမ်းရှောင်နေရကြောင်း သိရသည်။
