မန္တလေးမြို့တွင် မီး​ပျက်ချိန် လျှပ်စစ်မီးကြိုးဖြတ်တောက်ခိုးယူသူများ သောင်းကျန်းနေ

အင်ကြင်း/People’s Spring

မန္တလေးမြို့၊ ချမ်းမြသာစည်၊ ပြည်ကြီးတံခွန်နှင့် အမရပူရမြို့နယ်တို့တွင် ညဘက်မီးပျက်ချိန် လမ်းမီးတိုင်မှတဆင့် သွယ်တန်းထားသော အိမ်သုံးလျှပ်စစ်မီးကြိုးများအား ဖြတ်တောက်ခိုးယူသူများ ရှိနေကြောင်း ဒေသခံအချို့က ပြောသည်။

“မီးကြိုးက တစ်ခွေတစ်ခွေ စျေးနည်းမှမနည်းတာ။ မီးပျက်ချိန်ကများတော့ ညဆိုလာလာခိုးကြတာ။”ဟု အမရပူရမြို့နယ်ရှိ မီးကြိုးဖြုတ်ခိုးခံရသည့် ရပ်ကွက်တစ်ခုမှ ဒေသခံတစ်ဦးက ပြောသည်။

မီးကြိုးလာခိုးသူများမှာ အဖွဲ့လိုက် လာရောက်ခိုးယူနေကြခြင်းဖြစ်ပြီး စစ်တပ်ကလည်း ဖမ်းဆီးခြင်းမရှိကြောင်း ပြည်ကြီးတံခွန်မြို့နယ်၌ မီးကြိုးဖြုတ်ခိုးယူခံရဖူးသည့် ရပ်ကွက်ဒေသခံများက ပြောသည်။

Public Service Announcement

လျှပ်စစ်မီးပြတ်တောက်ချိန်မှာလည်း ပိုမိုဆိုးရွားလာပြီး တစ်ရက်လျှင် ၄ နာရီခန့်ပင် မရတော့ဟု မန္တလေးမြို့ခံအချို့က ဆိုသည်။ ထို့ကြောင့် မီးကြိုးဖြတ်တောက်ခိုးယူမှုများလည်း ပိုမိုဖြစ်လာခြင်းဟု မြို့ခံများက ပြောသည်။

မန္တလေးမြို့တွင် တစ်ရက်လျှင် နှစ်ကြိမ်၊ တစ်ကြိမ်လျှင် လေးနာရီနှုန်းဖြင့် လျှပ်စစ်မီးဖြန့်ဖြူးပေးမည်ဟု စစ်ကောင်စီကကြေညာခဲ့သော်လည်း မြေပြင်တွင် ထိုကဲ့သို့ လျှပ်စစ်မီးမရရှိကြောင်း မြို့ခံများက ပြောသည်။

စစ်တပ် အာဏာသိမ်းပြီးနောက်ပိုင်း မန္တလေးမြို့တွင် ဥပဒေစိုးမိုးမှုကင်းမဲ့လာပြီး ရိုက်နှက် လုယက်ခြင်း၊ခိုးယူခြင်း၊ ဓါးပြတိုက်ခြင်းများ မကြာခဏဖြစ်ပွားနေသည်။