အင်ကြင်း/People’s Spring
မန္တလေးမြို့၌ လူသိများပြီး အိုးဘိုအကျဉ်းထောင်၌ နှစ်ရှည်ထောင်ဒဏ်ချခံထားရသည့် နိုင်ငံရေးအကျဥ်းသား ကိုအငယ်လေး(ခ)ဦးစိန်လင်းသည် ဆေးရုံရောက်ပြီး နောက်တရက်တွင် ကွယ်လွန်ခဲ့ကြောင်း သတင်းရရှိသည်။
နိုဝင်ဘာ ၂၀ရက် ညနေ ၅ နာရီ ၁၀မိနစ်ခန့်က မန္တလေးအကျဉ်းထောင်၌ နှစ်ရှည်ထောင်ဒဏ်ကျခံနေရသော အသက်(၅၈)နှစ်အရွယ် နိုင်ငံရေးအကျဥ်းသား ကိုအငယ်လေး(ခ)ဦးစိန်လင်းသည် မန္တလေးဆေးရုံကြီး၌ ကွယ်လွန်ခဲ့ကြောင်း ၎င်းနှင့်နီးစပ်သူများက ပြောသည်။
“ တနေ့ကမှ ထောင်ထဲကနေဆေးရုံပို့တယ်။ မနေ့ကဆုံးတယ်။ ခုရက်ပိုင်းနိုင်ကျဥ်းတွေသေကာနီးရက်ပိုင်းလောက်မှ အပြင်ထုတ်ပေးကြတယ်။” ဟု နိုင်ကျဥ်းများနှင့်နီးစပ်သူတစ်ဦးက ပြောသည်။
Public Service Announcement
၎င်းကွယ်လွန်ရသည့်ရောဂါအခြေအနေနှင့်ပတ်သက်၍ မသိရသေးပေ။
ဦးစိန်လင်းသည် မန္တလေးအိုးဘိုအကျဥ်းထောင်တွင် နိုင်ငံရေးပုဒ်မများဖြင့် ထောင်ဒဏ်(၂၇)နှစ်အထိ မတရားနှစ်ရှည်ထောင်ဒဏ်ချမှတ်ခံထားရသူဖြစ်သည်။
ဦးစိန်လင်းသည် ရှစ်လေးလုံး လူထုအရေးတော်ပုံကြီး၌ ကျောင်းသားသမဂ္ဂ အမာခံတပ်ဦးအဖွဲ့ဝင်ဖြစ်ပြီး” အောင်ဆန်းကြယ်နီစစ်ကြောင်း” တွင် ပါဝင်ခဲ့သည်။ ထို့နောက် စစ်တပ်က အာဏာသိမ်းအပြီး ပါတီတည်ထောင်ခွင့်ရချိန်အမျိုးသားဒီမိုကရေစီအဖွဲ့ချုပ်ပါတီဝင်အဖြစ် ဗ.က.သအဖွဲ့များနှင့် ချိတ်ဆက် ဆောင်ရွက်ခဲ့သည်။
ဘွဲ့ရဒီမိုကရက်တစ်ကျောင်းသားဟောင်းများအဖွဲ့(GOSDA)တွင် ပါဝင်၍ (ABSDF) ကျောင်းသားအဖွဲ့ဝင်များနှင့် ချိတ်ဆက်ကာ မြေအောက်နိုင်ငံရေးလှုပ်ရှားမှုများ ဆောင်ရွက်ခဲ့သည်။
၁၉၉၁ခုနှစ်တွင် ထောက်လှမ်းရေး(၁)မှ ဖမ်းဆီးထိန်းသိမ်းခြင်း ခံခဲ့ရသည်။ ပြန်လည်လွတ်မြောက်လာပြီးနောက် ၁၉၉၈ခုနှစ်တွင် ဒုအကြိမ် ဖမ်းဆီးခံရပြီး နိုင်ငံတော်အကြည်ညိုပျက်စေမှုဖြင့်ထောင်နှစ်၂၀ချမှတ်ခံရသည်။
၂၀၀၉ခုနှစ်၌ ထောင်မှလွတ်ပြီး တက္ကသိုလ်မွတ်စလင်ရိပ်သာရှိတက္ကသိုလ်မွတ်စလင်မိတ်သဟာအသင်းUMFကို ဦးညီညီကျော် (ABSDF)နှင့်လက်တွဲ တည်ထောင်ခဲ့သည်။
၂၀၁၀ ပြည့်နှစ်၌ ကျောင်းသားရဲဘော်ဟောင်းများအဖွဲ့၊ မေတ္တာကမ်ပိန်းအဖွဲ့များ၌ ပါဝင်ကာအလုပ်သမားရေးရာပြဿနာများ၊မြေယာပြဿနာများ ဖြေရှင်းဆောင်ရွက်ခဲ့သည်။
ယခင် FTUB ယခု CTUMနိုင်ငံလုံးဆိုင်ရာ အလုပ်သမားသမဂ္ဂအဖွဲ့ချုပ်နှင့် ချိတ်ဆက်ကာ အလုပ်သမားပြဿနာများ ဖြေရှင်းခြင်း၊ အလုပ်သမားသမဂ္ဂများ ဖွဲ့စည်းပေးခြင်း၊ အလုပ်ရှင်/အလုပ်သမားပြဿနာများ ညှိနှိုင်းဆောင်ရွက်ခြင်း အသိပညာပေးခြင်းများ ဆောင်ရွက်ခဲ့သည်။
စိမ်းရောင်စို Activities ၊ Green Justice Institute ၊မန္တလေးသူငယ်ချင်းများအဖွဲ့တို့နှင့် မိုးရာသီ သစ်ပင်စိုက်ပျိုးခြင်းအပါအဝင် သဘာဝပတ်ဝန်းကျင်ဆိုင်ရာကိစ္စများ၊သဘာဝဘေးဒါဏ် ကူညီရေး၊ ရေရှားပါးသည့်ဒေသများ သောက်သုံးရေရရှိရေး ဆောင်ရွက်မှုများတွင် ပါဝင်ခဲ့သည်။
၂၀၁၉ခုနှစ်တွင်” ပြည်သူ့ပါတီ” မန္တလေးတိုင်းဒေသကြီးစည်းရုံးရေးမှူးအဖြစ် ဆောင်ရွက်၍
၂၀၂၀ ပြည့်နှစ် အထွေထွေရွေးကောက်ပွဲ၌ “ ပြည်သူ့ပါတီ” ကိုယ်စားပြု၍ချမ်းအေးသာစံမြို့နယ်၊ မဲဆန္ဒနယ် အမှတ် (၂)တွင်တိုင်းဒေသကြီးလွှတ်တော်ကိုယ်စားလှယ်လောင်းအဖြစ် ဝင်ရောက်ယှဉ်ပြိုင်ခဲ့သည်။
၂၀၂၁ စစ်တပ် အာဏာသိမ်းမှုနောက်တွင် ပြည်သူ့ပါတီမှနုတ်ထွက်ပြီး လက်ရှိနိုင်ငံရေးအခြေအနေများတွင်ပါ၀င်လှုပ်ရှားရပ်တည်မှုများကြောင့် နိုငိငံရေးပုဒ်မများဖြင့် ထောင်ဒဏ်၂၇နှစ်ထိ ချမှတ်ခံခဲ့ရသည်။
ပြီးခဲ့သည့် နိုဝင်ဘာ ၈ ရက်ကလည်း အိုးဘိုအကျဥ်းထောင်၌ အဂတိလိုက်စားမှု စွပ်စွဲချက်ဖြင့် ထောင်ဒဏ် ၂၈ နှစ်ချမှတ်ခံထားရသည့် အမျိုးသားဒီမိုကရေစီအဖွဲ့ချုပ် (NLD) အစိုးရ၏ လျှပ်စစ်နှင့် စွမ်းအင်ဝန်ကြီး ဦးဝင်းခိုင်သည် မန္တလေးဆေးရုံကြီး၌ ကွယ်လွန်ခဲ့သည်။
အလားတူ အိုးဘိုထောင်၌ ထောင်ဒဏ်နှစ်ရှည်ကျခံနေရသည့် မန္တလေးတိုင်းဝန်ကြီးချုပ် ဒေါက်တာဇော်မြင့်မောင်သည်လည်း အောက်တိုဘာ ၇ ရက်နေ့က ကွယ်လွန်ခဲ့သည်။
အဆိုပါနိုင်ငံရေးအကျဥ်းသား ၃ ဦးလုံးသည် ထောင်တွင်း၌ ဆေးဝါးကုသခွင့်မရရှိဘဲ ကွယ်လွန်ကာနီးမှ စစ်ကောင်စီက ဆေးရုံပို့ပေးခဲ့ခြင်းဖြစ်ကြောင်း နိုင်ငံရေးအကျဥ်းသားများနှင့် နီးစပ်သူများကပြောသည်။
