အောင်သပြေဂူကုန်းပေါ်မှစစ်တပ်စခန်းကိုကရင်နီပူး​ပေါင်းတပ်တိုက်ခိုက် စစ်သား၉ ဦး​သေ၊ ၄ဦးဖမ်မိ

■ ​သေနတ် ၁၂ လက်သိမ်းဆည်းရရှိ

ရဲခေါင်/People’s Spring

လွိုင်ကော်မြို့နှင့် ၈ မိုင်ခန့်အကွာ လွိုင်ကော်-ဆီဆိုင် ကားလမ်းဘေးရှိ အောင်သပြေဂူ ကုန်းပေါ်တွင် တပ်စွဲထားသော စစ်ကောင်စီ တပ်စခန်းကို ကရင်နီပူးပေါင်းတပ်က ဝင်ရောက်တိုက်ခိုက်ခဲ့သည်။

ဒီဇင်ဘာ ၁၈ ရက်နေ့ နံနက် ၆ နာရီခန့်က စတင်ခဲ့သော တိုက်ပွဲ၌ စစ််ကောင်စီဘက်မှဗိုလ် (၁)ဦး၊ တပ်ကြပ် (၁)ဦး အပါအဝင် တပ်သားအဆင့် (၉)ဦး သေဆုံးခဲ့ပြီး စစ်သုံ့ပန်း (၄)ဦးဖမ်းမိခဲ့ကြောင်း ကရင်နီအမျိုးသားများကာကွယ်ရေးတပ် KNDF ကထုတ်ပြန်သည်။

ထို့အပြင် MA-1 (၇)လက်၊ MA-11(၄)လက် နှင့် MA-3 (၁)လက် စုစုပေါင်း သေနတ် (၁၂)လက် သိမ်းဆည်းရမိခဲ့ကြောင်း အသိပေးသည်။

Public Service Announcement

“ဆီဆိုင်ဘက်ကနေ စစ်ကြောင်းထိုးတဲ့အချိန်ကစလို့ တပ်စွဲလိုက်တဲ့ လွိုင်ကော် နဲ့ ဆီဆိုင်လမ်းမပေါ်က ကာကင်းစခန်းတစ်ခု ပါ။တိုက်ပွဲက တစ်နာရီကျော် လောက်ဖြစ်ပွားခဲ့ပါတယ်”ဟု KNDF တာဝန်ရှိသူက လူထုနွေဦးသို့ပြောသည်။

ကရင်နီအမျိုးသားများကာကွယ်ရေးတပ်(KNDF) ဗျူဟာအမှတ်-၂၊ KNDF တပ်ရင်းအမှတ်- ၂၊ KNDF တပ်ရင်းအမှတ်- ၁၄၊ KNDF UAV နှင့်Loikaw PDF တို့ ပူးပေါင်းသည့် တိုက်ပွဲတွင် ရဲဘော်တစ်ဦး မစိုးရိမ် ရသည့် ကျည်ဆံထိမှန်မှုသာရှိခဲ့သည်ဟုလည်း သိရသည်။

“ကရင်နီကာကွယ်ရေးတပ်ဖွဲ့တွေကတော့ လတ်တ လောစစ်ကောင်စီရဲ့ လွိုင်ကော်မြို့ပတ်ပတ်လည်မှာရှိတဲ့ စစ်ကောင်စီရဲ့ ဝပ်ကင်းတွေ ကာကင်းတွေ ကုန်းစခန်းတွေကို ကျွန်တော်တို့ တိုက်ခိုက်သိမ်းပိုက်နေပါတယ်”ဟု KNDF ပြန်ကြားရေးတာဝန်ခံ သာအယ်စိုးက လူထုနွေဦးသို့ပြောသည်။

ကရင်နီပြည်နယ်၌ စစ်ကောင်စီသည် လွိုင်ကော်မြို့မှတဆင့်အခြားနေရာဒေသများအား ထိုးစစ်ဆင်တိုက်ခိုက်မှုများ ပြန်လည်ပြုလုပ်လျက်ရှိနေပြီး ပြည်သူလူထုအနေဖြင့် အခြေအနေအား အမြဲမပြတ်နားစွင့်ထားရန် KNDF က တိုက်တွန်းသည်။