မန္တလေးနဲ့ ပြင်ဦးလွင်မြို့ကို စစ်ကောင်စီထိပ်ပိုင်းခေါင်းဆောင်လာမှာမို့ လုံခြုံရေးတွေ တင်းကြပ်

မေ/People’s Spring

မန္တလေးနဲ့ ပြင်ဦးလွင်မြို့ကို စစ်ကောင်စီရဲ့ ထိပ်ပိုင်းခေါင်းဆောင်လာဖို့ရှိတာမို့ လုံခြုံရေးတွေချပြီး တင်းကြပ်ထားတယ်လို့ မြို့ခံတွေက ပြောပါတယ်။

ပြင်ဦးလွင်မြို့ကိုအဓိကထား လုံခြုံရေးတင်းကြပ်ထားပြီး ဇန်နဝါရီ ၉ရက်နေ့ မနေ့ကတည်းက မြို့အဝင်စစ်ဆေးတာတွေနဲ့ မြို့တွင်းဖုန်းစစ်ဆေးတာတွေပြုလုပ်နေတာလို့မြို့ခံတွေက ပြောပါတယ်။

“မအလမဟုတ်ရင် ဒုချုပ်စိုးဝင်း ခရီးစဥ်ရှိတယ်ပြောတယ်။ဒီနေ့အထိ လုံခြုံရေးကြပ်ထားတယ်။ခရီးစဥ်ကိုရက်အတိကျ​ပြောမထားသလို ဘယ်သူဆိုလာမယ်ဆိုတာလည်းအောက်ခြေကိုပေးမသိထားဘူး”လို့ ပြင်ဦးလွင်မြို့ခံတစ်ဦးကပြောပါတယ်။

Public Service Announcement

ပြင်ဦးလွင်မြို့မှာ စစ်ကောင်စီအဖွဲ့က လုံခြုံရေးတွေချပြီး ဖုန်းစစ်ဆေးတာနဲ့ လူငယ်တွေရဲ့ဖုန်းဖြင့် အသုံးချပြီး လုပ်ငန်းရှင်တွေထံ ငွေညစ်တာတွေ လုပ်နေတယ်လို့ ပြင်ဦးလွင်မြို့နယ်ပြည်သူ့ကာကွယ်ရေးအဖွဲ့(ပကဖ)မှ သတင်းပြန်ကြားရေးတာဝန်ခံက ပြောပါတယ်။

” ၂၁ရပ်ကွက်ဖြစ်တာ။ ကျန်တဲ့ ရပ်ကွက်နဲ့ ကျေးရွာတွေမှာလဲ အတင်းအဓ္ဓမပေါ်တင်ဆွဲ စစ်သားသစ်စုဆောင်နေသလို စစ်မှုမထမ်း ရှောင်လိုရင် ကျပ်သိန်းတစ်ရာထိ ငွေညစ်နေတာမျိုးထိ လုပ်နေတာရှိပါတယ်။ အသံမထွက်ရဲကြလို့ နေကြတာပါ”ဟု သူက ပြောပါတယ်။

မန္တလေးမြို့မှာလည်း ဒီကနေ့မှာ စစ်တပ်က ကားနဲ့မြို့တွင်း လုံခြုံရေးတွေလိုက်ချထားတယ်လို့သိရပါတယ်။

မန္တလေးမြို့ လမ်း၈၀ကနေ ဘုရားကြီးသွားတဲ့လမ်း၊ကျုံးအရှေ့ဘက်က ဝန်ထမ်းအိမ်ယာတွေအနီး၊မိန်းထဲနေရာတချို့ကို ဒီကနေ့မနက်ပိုင်းကတည်းက စစ်တပ်လုံခြုံရေးချထားတယ်လို့သိရပါတယ်။

“မန္တလေးမှာရောက်နေပြီထင်တယ်။ကားတန်းတခုတွေ့တယ်။အရင်ကလို သိသိသာသာလူကြီးလမ်းကြောင်းပုံစံမျိုးလာတာမဟုတ်ဘူး”လို့ မဟာမုနိဘုရားကြီးဘက်မှာ ယာဥ်တန်းကို မျက်မြင်တွေ့လိုက်သူတစ်ဦးက ပြောပါတယ်။

အလယ်ပိုင်းဒေသကို နယ်မြေစိုးမိုးမှုရယူဖို့ အလယ်ပိုင်းတိုင်းစစ်ဌာနချုပ်(လပခ)ထဲမှာ ယခုရက်ပိုင်းအတွင်း အစည်းအဝေးလုပ်ဖို့ရှိတယ်လို့ သတင်းရထားပြီး အစည်းအဝေးကို ဘယ်သူတက်မယ်ဆိုတာကိုတော့ အတိအကျမသိရဘူးလို့ စစ်ရေးသတင်းအရင်းမြစ်တွေကလည်း ပြောပါတယ်။