ကရင်အမျိုးသားအစည်းအရုံး(KNU) ညောင်လေးပင်ခရိုင် မူး(မုန်း)မြို့နယ်တွင် စစ်ကောင်စီတပ်သား ၁ဦး လက်နက်နှင့်အတူ အလင်းဝင်လာကြောင်း KNU ဗဟိုက ယနေ့(ဖေဖော်ဝါရီ ၁၆ရက်) ညပိုင်း၌ သတင်းထုတ်ပြန်သည်။
မုန်းမြို့နယ်ရှိ စစ်ကောင်စီတပ် ခလရ(၇၃)တပ်ရင်းလက်အောက်ခံ စခန်းဖြစ်သော သပြေညွှန့်စခန်းမှ စစ်ကောင်စီတပ်သား ကိုစိုးသူဆိုသူသည် လက်နက် ၁လက်နှင့် ကျည်ဆံများယူလာပြီး KNU တပ်ရင်း(၈)ထံ လက်နက်ချလာခြင်းဖြစ်သည်ဟု ဖော်ပြသည်။ အလင်းဝင်လာသည့် နေ့ရက်ကို ထုတ်ပြန်ချက်၌ ဖော်ပြမထားပေ။
အဆိုပါအလင်းဝင်လာသည့် စစ်ကောင်စီတပ်သားကို မုန်းမြို့နယ်တာ၀န်ရှိ ခေါင်းဆောင်မှ ဂုဏ်ပြုငွေ(၁၀)သိန်းကျပ် ပေးအပ်ချီးမြှင့်ခဲ့သည်ဟုလည်း အသိပေးသည်။
Public Service Announcement
အာဏာရှင်ကိုဆန့်ကျင်ပြီး ပြည်သူများနှင့်အတူ ပူးပေါင်းကာ စစ်အာဏာရှင်စနစ်ကို တိုက်ထုတ်သွားမည့် မည်သူ့ကို မဆို နွေးထွေးစွာ ကြိုဆိုကြောင်းလည်း KNUက တိုက်တွန်းခဲ့သည်။
ဖေဖော်ဝါရီလဆန်းကလည်း KNU ညောင်လေးပင်ခရိုင် ကျောက်ကြီးမြို့နယ်ရှိ ကရင်အမျိုးသားလွတ်မြောက်ရေးတပ်မတော်(KNLA) တပ်ရင်း(၉)ထံသို့ စစ်ကောင်စီ တပ်သား ၄ဦး လက်နက်များယူလာပြီး အလင်းဝင်လာခဲ့သည်။ လက်နက် ၃လက်နှင့် ကျည်များ ယူလာသည့် အဆိုပါ စစ်ကောင်စီတပ်သားများကိုလည်း KNUက တစ်ဦးလျင်ကျပ် ၁၀သိန်းစီ ဆုငွေပေးအပ်ခဲ့သည်။
အလင်းဝင်လာသည့် စစ်ကောင်စီတပ်သားများသည် စစ်ကောင်စီက အတင်းအဓမ္မ စစ်မှုထမ်းစေခိုင်းခြင်းခံနေရသူများဖြစ်သည်ဟုဆိုသည်။
ထိုသို့ မိမိဆန္ဒ သဘောထားမပါဝင်ဘဲ စစ်ကောင်စီတပ်၏ ဖမ်းဆီးခြင်းခံရပြီးအတင်းအဓမ္မ စစ်မှုထမ်း စေခိုင်းခံရသူများ အနေဖြင့် နီးစပ်ရာ တိုင်းရင်းသား တော်လှန်ရေးတပ်များနှင့် ပြည်သူ့ကာကွယ်ရေးတပ်များထံသို့ ရရာနည်းဖြင့် လက်နက်ချ အလင်းဝင်ရန်လည်း KNU ဗဟိုက တိုက်တွန်း အသိပေးခဲ့သည်။
အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနကလည်း ဖေဖော်ဝါရီ ၁၀ရက်တွင်ကြေညာချက် ထုတ်ပြန်ပြီး အဓမ္မ စစ်သားစုဆောင်းခံရသည့် လူငယ်လူရွယ်များ အနေဖြင့် စစ်သင်တန်းတက်နေစဉ်ဖြစ်စေ၊ သင်တန်းပြီးဆုံး၍ လက်နက်တပ်ဆင်ပြီး အနေအထားတွင် ဖြစ်စေ အခြေအနေ ပေးသည်နှင့် နီးစပ်ရာ ပြည်သူ့တော်လှန်ရေးအဖွဲ့များ(PDF၊ ပကဖ၊ ပအဖ၊ ပလဖနှင့် တိုင်းရင်းသားတော်လှန်ရေး အဖွဲ့အစည်းများ)ထံ ဆက်သွယ်၍ အမြန်ဆုံးဘက်ပြောင်းခိုလှုံကြရန် တိုက်တွန်းနှိုးဆော်ချက် ထုတ်ပြန်ထားပြီး လက်နက်ခဲယမ်းများ ပါလာပါက ထိုက်တန်သည့် ဆုကြေးငွေများ ပေးအပ်မည်ဟု အသိပေးထားသည်။
