ပေါ်တူဂီ လက်ရွေးစင် အသင်းကနေ အနားယူကြောင်း ရော်နယ်လ်ဒို ကြေညာ

ပေါ်တူဂီ လက်ရွေးစင် ဘောလုံးအသင်းကနေ အပြီးတိုင် အနားယူပြီလို့ အသင်းခေါင်းဆောင် ခရစ္စတီယာနို ရော်နယ်လ်ဒိုက ကြေညာခဲ့ပါတယ်။

အသက် ၄၁ နှစ်အရွယ် တိုက်စစ်မှူးဟာ ရှည်လျားတဲ့ စာတစ်စောင်ကို ပရိသတ်ဆီ ဖတ်ပြနေတဲ့ ဗီဒီယို တစ်ခုကို လူမှုကွန်ရက်ပေါ် တင်ပြီး နိုဝင်ဘာ ၅ ရက်နေ့မှာ အဲဒီ ဆုံးဖြတ်ချက်ကို အတည်ပြု ပြောကြားခဲ့တာ ဖြစ်ပါတယ်။

လက်ရွေးစင် အသင်းနဲ့အတူ တစ်ဦးချင်း စံချိန်ကောင်းတွေ ပိုင်ဆိုင်ခဲ့တဲ့ ရော်နယ်လ်ဒိုက လက်ရွေးစင် အသင်းရဲ့ ကျောနံပါတ် ၇ ဂျာစီကို အသင်းလက်ထဲ ပြန်အပ်နှံရမယ့် အချိန်ကို ရောက်လာပြီလို့ ပြောကြားထားပါတယ်။ ဒီဂျာစီဟာ သူတစ်ယောက်တည်းပဲ ပိုင်ဆိုင်ရမယ့် အရာလို့ ဘယ်တုန်းကမှ မတွေးခဲ့ကြောင်း၊ ဒါပေမဲ့ ၂၃ နှစ်လုံးလုံး ဒီဂျာစီကို ဝတ်ဆင်ခဲ့တဲ့အတွက် ဂုဏ်ယူသလို တာဝန်လည်း ကျေခဲ့ကြောင်း ဆော်ဒီအာရေးဘီးယား ကလပ် အယ်လ်နက်ဆာ အသင်းမှာ ပရော်ဖက်ရှင်နယ်အဖြစ် ကစားနေတဲ့ ရော်နယ်လ်ဒိုက ဆိုပါတယ်။

သူဟာ လက်ရွေးစင်အဖြစ် ပွဲပေါင်း ၂၃၄ ပွဲ ကစားခဲ့ပြီး ၁၄၆ ဂိုး သွင်းယူခဲ့ပါတယ်။ ကမ္ဘာပေါ်မှာ ရှိသမျှ ဘယ်အမျိုးသား လက်ရွေးစင် ကစားသမားမှ နိုင်ငံအတွက် ရော်နယ်လ်ဒိုလောက် ပွဲများများ ကစားပေးဖူးတာ၊ ဂိုးများများ သွင်းပေးဖူးတာ မရှိခဲ့ပါဘူး။

Public Service Announcement

သူ့ရဲ့ ရှည်လျားတဲ့ နိုင်ငံလက်ရွေးစင် ကစားသမား ဘဝမှာ အထွဋ်အထိပ် ကာလကတော့ ၂၀၁၆ ခုနှစ်တုန်းက ဥရောပ တံခွန်စိုက် ချန်ပီယံ ဆုဖလားကြီးကို ပေါ်တူဂီ အသင်းနဲ့အတူ ကိုင်မြှောက်နိုင်ခဲ့တာ ဖြစ်ပါတယ်။ အလားတူပဲ ဥရောပ အမျိုးသား အမှတ်ပေးပြိုင်ပွဲ ချန်ပီယံ ဆုတွေကိုလည်း ၂၀၁၉ နဲ့ ၂၀၂၅ ခုနှစ်တွေမှာ ဆွတ်ခူးနိုင်ခဲ့ပါတယ်။

တောက်ပတဲ့ ကာလတွေကို ဖြတ်သန်းခဲ့ပေမယ့်လည်း ရော်နယ်လ်ဒိုနဲ့ လက်ရွေးစင် အသင်းကြားက ဆက်ဆံရေးဟာ ပြီးခဲ့တဲ့ နှစ်အနည်းငယ် အတွင်းမှာ တဖြည်းဖြည်းချင်း ဆုတ်ယုတ်လာခဲ့ပါတယ်။ အသက်အရွယ်ကြောင့် ရော်နယ်လ်ဒိုရဲ့ ခြေစွမ်းကျဆင်းလာမှုက လက်ရွေးစင်အသင်း နည်းပြတွေအတွက် ခေါင်းခဲစရာ ဖြစ်လာသလို ပရိသတ်တွေကြားမှာလည်း စိတ်ပျက်သူတွေနဲ့ ဆက်လက်ထောက်ခံသူတွေ နှစ်ဖွဲ့ကွဲလာပါတယ်။

ပြီးခဲ့တဲ့ လကတော့ သူဟာ အသင်းမန်နေဂျာ ဂျော့ဂျ်ဂျီးဆက်စ်နဲ့ ပြဿနာ တက်ခဲ့ပြီး ပေါ်တူဂီ အသင်းရဲ့ စခန်းသွင်း လေ့ကျင့်မှုကနေ ထွက်ခွာသွားခဲ့ပါတယ်။ နောက်ပိုင်းမှာ ရော်နယ်လ်ဒိုက တောင်းပန်ခဲ့ပြီး သူ့လက်ရွေးစင် ကစားသမား ဘဝကို ရှေ့ဆက်လိုတဲ့ သဘောမျိုး အရိပ်အယောင် ပြခဲ့ပေမယ့် အခုတော့ အနားယူတော့မယ် ဆိုတာကို အတိအလင်း ကြေညာလိုက်တာ ဖြစ်ပါတယ်။

ရော်နယ်လ်ဒိုဟာ သူ့ရဲ့ ပရော်ဖက်ရှင်နယ် သွင်းဂိုး အရေအတွက် ၁၀၀၀ ပြည့်မြောက်ဖို့ ပုဂ္ဂိုလ်ရေး ရည်မှန်းချက်ကိုတော့ အယ်လ်နက်ဆာ အသင်းနဲ့အတူ ရှေ့ဆက် ကြိုးစား အကောင်အထည် ဖော်သွားမယ့် သဘောပါ။ သူဟာ လက်ရှိ အချိန်ထိ ကလပ်နဲ့ နိုင်ငံအတွက် တရားဝင် ပြိုင်ပွဲတွေမှာ သွင်းဂိုး ၉၈၅ ဂိုးထိ ရရှိထားပြီး ဖြစ်ပါတယ်။

ကိုးကား: CNN