ကဖေး/People’s Spring
ကျောက်ဖြူမြို့နယ်တွင် ဓညဝတီရေတပ်ဌာနချုပ်အနီး ဦးကင်းကျေးရွာသို့ ဝင်ရောက်မီးရှို့သည့် စစ်ကောင်စီစစ်ကြောင်းကို အာရက္ခတပ်တော်(AA)က တိုက်ခိုက်ပြီးနောက်ပိုင်းစစ်ကောင်စီတပ်ပြန်ဆုတ်ခွာသွားပြီ ဒရုန်းများအပြန်အလှန်သုံး၍တိုက်ပွဲဖြစ်ပွားနေသည်။
စစ်ကောင်စီစစ်ကြောင်းက မတ်လ ၆ရက် နံနက်ပိုင်းတွင် ဦးကင်းကျေးရွာကို ဝင်ရောက်လာခြင်းဖြစ်ပြီး ယင်းစစ်ကြောင်းကို AAကလာရောက်တိုက်ခိုက်သွားသည်ဟု ကျောက်ဖြူမြို့ခံသတင်းရင်းမြစ်က ပြောသည်။
“ဦးကင်းရွာတိုက်ပွဲလည်းတော်တော်ပြင်းထန်တယ်။ ရွာကို လေကြောင်းကနေအရင်ပစ်ပြီးမြေပြင်ကလည်း စစ်ကြောင်းဝင်လာတာ။ AAက လာတိုက်တော့ စစ်ကောင်စီဘက်က ၃၀ လောက်သေတယ်ကြားတယ်။ အလောင်းတွေထားခဲ့ပြီး ပြန်ဆုတ်သွားတယ်။ ဒါပေမယ့် အခုက ဓညဝတီကာကင်းတွေကို AA တိုက်နေပြီး နှစ်ဘက်စလုံးက ဒရုန်းတွေနဲ့ ချနေကြတယ်”ဟု အဆိုပါ ဒေသခံကပြောသည်။
Public Service Announcement
ဓညဝတီရေတပ်ဌာနချုပ်နှင့် သုံးမိုင်ခန့်အကွာတွင်ရှိသော ဦးကင်းရွာတွင် အိမ်ခြေ ၁၇၀ ခန့်ရှိသည်။ မတ်လ၆ရက်နံနက်က စစ်ကောင်စီလေကြောင်းတိုက်ခိုက်မှုနှင့် မြေပြင်မှလည်းမီးရှို့ဖျက်ဆီးသောကြောင့် နေအိမ်အများစု မီးလောင်ပျက်စီးသွားသည်။
တိုက်ပွဲသည် ဦးကင်းရွာအပြင် ကြတ်တိန်၊ထောင့်စည်မော်၊ကုလဘာတောင်ကျေးရွာတို့တွင်လည်းဖြစ်ပွားနေသည်။ AA၏ ကျောက်ဖြူမြို့သိမ်းတိုက်ပွဲသည် ပိုမိုပြင်းထန်လာသည်ဟု ဒေသခံများကပြောသည်။ မတ်လ ၇ရက်ကလည်း စစ်ကောင်စီက လေကြောင်းမှ တိုက်ခိုက်ခဲ့သည်။ အဆိုပါရွာများမှဒေသခံများသည် ပြီးခဲ့သည့်ဖေဖော်ဝါရီလမှစ၍ ကျောက်ဖြူမြို့ပေါ်နှင့် အနီးပတ်ဝန်းကျင်ကျေးရွာများတွင် တိမ်းရှောင်နေကြသည်။
” အခုဖြစ်နေတာက ကျောက်ဖြူမြို့နဲ့ ၇မိုင်ခန့်အကွာမှာဖြစ်နေတာ။ မြို့ပေါ်ကတော့ စောင့်ကြည့်အခြေအနေရှိပါတယ်”ဟုမြို့ခံတဦးကပြောသည်။
ကျောက်ဖြူမြို့မှ ဓညဝတီရေတပ်စခန်းကို အာရက္ခတပ်တော်(AA)က ဖေဖော်ဝါရီလ၂၁ရက်တွင် စတင်တိုက်ခိုက်ပြီးနောက်ပိုင်း တိုက်ပွဲများဆက်တိုက်ဖြစ်ပွားနေသည်။ တိုက်ပွဲပြင်းထန်နေစဉ်ပြီးခဲ့သည့် ဖေဖော်ဝါရီလအတွင်းက တရုတ်လုံခြုံရေးတပ်ဖွဲ့ဝင်အချို့ လေကြောင်းမှရောက်ရှိလာသည်။
ကျောက်ဖြူမြို့တွင် တရုတ်နိုင်ငံပိုင် CITIC Group ကုမ္ပဏီနှင့် မြန်မာအစိုးရ အကောင်အထည်ဖော်နေသည့် အထူးစီးပွားရေးဇုန်နှင့် ရေနက်ဆိပ်ကမ်းစီမံကိန်းရှိသည်။ ယင်းစီမံကိန်းနေရာများတွင် တရုတ်လုံခြုံရေးတပ်ဖွဲ့ဝင်များက လုံခြုံရေးယူထားကြောင်း မြို့ခံသတင်းရင်းမြစ်များကပြောသည်။
တရုတ်နှင့် စစ်ကောင်စီသည် အကျိုးတူပူးပေါင်းသည့် လုံခြုံရေးကုမ္ပဏီ (Joint Venture Security Company) တည်ထောင်ရေး လုပ်ငန်းကော်မတီကို ၂၀၂၄ နိုဝင်လာလတွင် တည်ထောင်ပြီးနောက် ကျောက်ဖြူမြို့ရှိ တရုတ်စီမံကိန်းများလုံခြုံရေးအဖွဲ့ကို ဖွဲ့စည်းခဲ့သည်။ထိုအဖွဲ့ကို ကျောက်ဖြူအထူးစီးပွားရေးဇုန်စီမံခန့်မှုခွဲကော်မတီ ဥက္ကဋ္ဌ ဗိုလ်ချုပ် ကျော်ရွှေထွန်းဦးဆောင်ပြီး တရုတ် CITIC Group ကုမ္ပဏီမှ တာဝန်ရှိသူများ၊ တရုတ်လုံခြုံရေးအဖွဲ့ဝင်များပါဝင်ကြောင်း သိရသည်။
