ဆားလင်းကြီးမြို့ပေါ် စစ်ကောင်စီအထိုင်ချ နေရာ ၂နေရာကို လက်နက်ကြီး အလုံးရေ ၂၀ ကျော် ပစ်ခတ်တိုက်ခိုက်

မင်းညို/People’s Spring

စစ်ကိုင်းတိုင်း၊ ဆားလင်းကြီးမြို့ပေါ်က စစ်ကောင်စီအထိုင်ချ နေရာ၂နေရာကို လက်နက်ကြီးနဲ့ ပစ်ခတ်တိုက်ခိုက်ခဲ့ကြောင်း ချင်းတွင်းဒိုင်းနမိုက်(SaIingyi)အဖွဲ့ ဦးဆောင်သူ ကိုဗိုက်က ပြောပါတယ်။

မနေ့က မတ်လ ၇ ရက် မနက် ၁၀ နာရီလောက်မှာ ဆားလင်းကြီးမြို့ပေါ်က စစ်ကောင်စီအထိုင်ချထားတဲ့ ရဲစခန်းနဲ့ အထွေထွေအုပ်ချုပ်ရေးမှူးရုံးတို့ကို ၆၀ မမ၊ ၈၀မမ တွေနဲ့ တိုက်ခိုက်ခဲ့တာဖြစ်ကြောင်း ချင်းတွင်းဒိုင်းနမိုက်အဖွဲ့ ဦးဆောင်သူ ကိုဗိုက်က ပြောပါတယ်။

“ထိခိုက်ပျက်စီးမှုကတော့ မသိရသေးဘူးဗျ။ လက်နက်ကြီး ထုတာ တစ်နာရီလောက်တော့ကြာတယ်။ ၃ ဖွဲ့ပေါင်း အလုံးရေ ၂၅ လုံးထုခဲ့တာ။”လို့ ကိုဗိုက်က ဆိုပါတယ်။

Public Service Announcement

စစ်ကောင်စီဟာ ဆားလင်းကြီးမြို့ပေါ်မှာ ထွေအုပ်ရုံး၊ ရဲစခန်းနဲ့ မြို့ခန်းမအပါအဝင် ၅ နေရာခန့် ခွဲကာ အထိုင်ချထားကြောင်း၊ ထွေအုပ်နဲ့ ရဲစခန်းမှာ စစ်ကောင်စီအင်အား ၈၀ ခန့်ရှိပြီး အခြားနေရာများအပါအဝင် စုစုပေါင်း ၁၈၀ ခန့် ရှိကြောင်း ကာကွယ်ရေးအဖွဲ့တွေက ပြောပါတယ်။

အဲဒီတိုက်ခိုက်မှုကို ချင်းတွင်းဒိုင်းနမိုက် (SaIingyi) အဖွဲ့နဲ့ ယင်းမာပင်ခရရိုင်တပ်ရင်းတပ်ခွဲ ၃၊ တောင်ပံနီအထူး ပြောက်ကျားတပ်ဖွဲ့ (SaIingyi)၊ SOLO AUNG GYI(SaIingyi) တပ်ဖွဲ့တို့က ပူးပေါင်း တိုက်ခိုက်ခဲ့တာလို့ သိရပါတယ်။

ချင်းတွင်းဒိုင်းနမိုက် (SaIingyi) အဖွဲ့အပါအဝင် ဆားလင်းကြီးအဖွဲ့တွေဟာ ပြီးခဲ့တဲ့ ဖေဖော်ဝါရီ ၂၆ ရက်က မုံရွာမြို့၊ ဗောဓိတထောင် တာဝါတိုင်စခန်း တိုက်ပွဲတုန်းကလည်း ဒေသကာကွယ်ရေးအဖွဲ့တွေနဲ့ပူးပေါင်းပြီး ဝင်ရောက်တိုက်ခိုက်ခဲ့ပါသေးတယ်။