ထိုင်းမှာမောင်းပြေးတဲ့ ကားပေါ်ကနေ ကလေးတွေ အပါအဝင် တရားမဝင်မြန်မာရွှေ့ပြောင်း ၁၇ ဦး အဖမ်းခံရ

မတ်-၂၁၊၂၀၂၅။People’s Spring

ကလေးတွေ အပါအဝင် တရားမဝင် ဝင်ရောက်လာသူ မြန်မာ ၁၇ ဦးကို ဖမ်းဆီး ရမိခဲ့ကြောင်း ထိုင်းရဲတပ်ဖွဲ့က ထုတ်ပြန် ကြေညာခဲ့ပါတယ်။

ကန်ချနာဘူရီ ပြည်နယ်ထဲက ဆန်ခလာဘူရီမှာ မတ်လ ၂၀ ရက်နေ့ သန်းခေါင်ကျော်၊ မတ်လ ၂၁ ရက်နေ့ မနက်အစောပိုင်းတုန်းက မသင်္ကာစရာပစ်ကပ်ကား တစ်စီးကို ထိုင်းအာဏာပိုင်တွေက တားဆီးခဲ့ပါတယ်။ သောင်ဖာဖွမ် ခရိုင်ဖက်ကို ဦးတည်မောင်းနှင်နေတဲ့ကားရဲ့ယာဉ်မောင်းက ကားကို ရပ်မပေးဘဲ မောင်းပြေးခဲ့တာကြောင့် ထိုင်းလုံခြုံရေး တပ်ဖွဲ့ဝင်တွေက နောက်ကနေ အပူတပြင်း လိုက်သွားခဲ့ပါတယ်။

သိပ်မကြာခင်မှာတော့ ဆွန်ခလာဘူရီရဲ့ ငွန်လူ ခရိုင်ခွဲ၊ ကျေးရွာ အမှတ် ၃ နားမှာရှိတဲ့ စမ်းချောင်းတစ်ခုနား တောစပ်မှာ ရပ်ထားတဲ့ ကားကို ထိုင်းရဲတွေက ရှာတွေ့ခဲ့ပါတယ်။ ယာဉ်မောင်းက ကားကို စွန့်ခွာပြီး ခြေလျင်ထွက်ပြေး လွတ်မြောက်သွားခဲ့ပါတယ်။

Public Service Announcement

ကားထဲမှာတော့ ကြပ်ကြပ်တည်းတည်းစီးနင်းလိုက်ပါလာတဲ့ မြန်မာနိုင်ငံသား အမျိုးသား ၃ ဦးနဲ့ အမျိုးသမီး ၁၄ ဦးကို ရဲတွေက ရှာတွေ့ခဲ့ပါတယ်။ အဲဒီထဲမှာ အရွယ်မရောက်သေးတဲ့ ကလေး ၆ ဦး ပါဝင်ပြီး အငယ်ဆုံးဟာ ၁ နှစ်အရွယ်သာရှိသေးတယ်လို့ သိရပါတယ်။

သူတို့အားလုံးကို ဆွန်ခလာဘူရီ ရဲစခန်းဆီ ခေါ်ဆောင်ခဲ့ပြီး စစ်ဆေးမေးမြန်းခဲ့ရာမှာ ထိုင်းကို တရားမဝင် ဝင်ရောက်လာခဲ့ကြောင်း ဝန်ခံခဲ့ကြတယ်လို့ ဆိုပါတယ်။ ထိန်းသိမ်းခံခဲ့ရတဲ့ မြန်မာ နိုင်ငံသားတွေက ထိုင်းမှာ အလုပ်လာလုပ်ခွင့်ရဖို့ မြန်မာပွဲစား တစ်ဦးကို တစ်ယောက် ဘတ် ၁၀၀၀၀ စီ ပေးခဲ့ရတယ်လို့ ထွက်ဆိုခဲ့ပါတယ်။

ထိုင်းရဲတပ်ဖွဲ့ဟာ အခုဖြစ်စဉ်ကို နောက်ဆက်တွဲ စုံစမ်းစစ်ဆေးနေပြီးထွက်ပြေးသွားတဲ့ ယာဉ်မောင်းကိုလည်း ရှာဖွေနေပါတယ်။

ကိုးကား: Khaosod