ငလျင်ဗဟိုချက်အနီးဆုံးစစ်ကိုင်းမြို့တွင် ပျက်စီးမှုများပြားပြီးကယ်ဆယ်ရေးမလုံမလောက်ဖြစ်နေ

■မတ်လ ၂၉ ရက်​နေ့ခင်းပိုင်းအထိရုပ်အ​လောင်း၁၅၀ ခန့်ရှာ​တွေ့ထား

‌ဇော်ရမ်း/People’s Spring

ဖျက်အားပြင်ငလျင်ကြီး၏ အနီးဆုံးမြို့ဖြစ်​သောစစ်ကိုင်းမြို့တွင် ငလျင်ဒဏ်ကြောင့် မြို့ပေါ်ရပ်ကွက်များရှိတိုက်တာအဆောက်အဦးအားလုံးနီးပါး နှင့် သမိုင်းဝင်စေတီပုထိုးအများအပြားထိခိုက်ပျက်စီးခဲ့​သော်လည်း မတ်လ ၂၉ ရက်​အထိအ​ရေး​ပေါ်ကယ်ဆယ်ရေးများ အင်တိုက်အားတိုက်မလုပ်နိုင်​သေးဘဲ အကူအညီများလိုအပ်​နေကြောင်း ဒေသခံများကပြောသည်။

စစ်ကိုင်းမြို့သည် ငလျင်ဗဟိုချက်နှင့် အနီးဆုံးဖြစ်ခဲ့ပြီး ထိခိုက်ပျက်စီးမှုအလွန်များပြားခဲ့သည်။ ငလျင်လှုပ်ပြီး ဒုတိယမြောက်နေ့အထိ ကူညီကယ်ဆယ်ရေးလုပ်ငန်းများ မရောက်ရှိသေးကြောင်း မြို့ခံတစ်ဦးကပြောသည်။

Public Service Announcement

“အကူအညီတွေလာပေးကြပါဗျာ။ ဒီကနေ့အထိဘာမှ မတွေ့ရသေးဘူး။ဒီမှာကနှစ်ကာလကြာတဲ့အိမ်တွေများတယ်။မပျက်တဲ့အိမ်ဆိုတာမရှိသလောက်ပဲ။ အချင်းချင်းကူညီရအောင်လည်း အကုန်လုံးဒုက္ခရောက်နေတာ” ဟု မြို့ခံတဦးကပြောသည်။

စစ်ကိုင်း-မန္တလေးလမ်းပေါ် ကန်တော်ကြီးအ‌ရှေ့ခြမ်း၌ အပျက်အစီးအလွန်များပြီး တစ်အိမ်ထဲတွင် မိသားစုဝင် ရှစ်ဦးအထိသေဆုံးခဲ့ကြောင်း ဒေသခံတဦးကပြောသည်။

မြသိန်းတန်စေတီအပါအဝင် ရှေးဟောင်းဘာသာ ရေးအဆောက်အအုံအများအပြားလည်း ပြိုကျပျက်စီးခဲ့သည်ဟု ဒေသခံများကပြောသည်။ စစ်ကိုင်းမြို့ရှိ အကြီးဆုံးစာသင်တိုက်ဖြစ်သောဇိနောဒယစာသင်တိုက် ပြိုကျ ပျက်စီးမှုကြောင့် သံဃာတော်များနှင့် သာမဏေများ ထိခိုက် သေဆုံးမှု များပြားကြောင်းဒေသခံတစ်ဦးကပြောသည်။