ဧပြီ ၁၄၊၂၀၂၅။ခွာညို/People’s Spring
စစ်ကိုင်းတိုင်း၊ ကနီမြို့နယ်ကို စစ်ကောင်စီက ယနေ့ (ဧပြီလ ၁၄ရက်) သင်္ကြန်အကျနေ့ နံနက် ၇ နာရီခန့်မှစ၍ ဂျက်ဖိုက်တာ၊ Y12 အပြင် စက်တပ်လေထီးများဖြင့် ဗုံးကြဲတိုက်ခိုက်နေပြီး အရပ်သားထိခိုက် သေဆုံးမှုရှိနေကြောင်း သတင်းရရှိသည်။
ကနီမြို့နယ်၊ မုဌောနှင့် နတ်ကြီးကျေးရွာကို ပစ်မှတ်ထားပြီး ဆက်တိုက်ဗုံးကြဲနေခြင်းဟု ဒေသခံတစ်ဦးက ပြောသည်။
” တောက်လျှောက်ကြီး ပစ်နေတာပါ။ လက်ရှိသိရသလောက် တစ်ဦးသေတယ်။ ကျတော့် တူမလေးပါ။ အခုလည်း ပါရာမိုတာထပ်တက်လာပြီ” ဟု ဒေသခံတစ်ဦးက ယနေ့နံနက် ၉နာရီတွင် ပြောသည်။
Public Service Announcement
ယနေ့နံနက် လေကြောင်းမှ တိုက်ခိုက်မှုကြောင့် အမျိုးသမီးတစ်ဦးသေဆုံးကြောင်း အတည်ပြုထားနိုင်ပြီး အခြားထိခိုက်မှုအခြေအနေကို မေးမြန်းနေဆဲဖြစ်သည်။
စစ်ကောင်စီသည် ယာယီအပစ်ရပ်မည်ဟုကြေညာထားသော်လည်း သင်္ကြန်ကာလအတွင်း လေကြောင်းတိုက်ခိုက်မှုများ အရှိန်မြင့်ပြုလုပ်နေသည်။
ယမန်နေ့ သင်္ကြန်အကြိုနေ့က စစ်ကိုင်းတိုင်းအတွင်း ကောလင်းနှင့် ဝန်းသိုမြို့၊ ချင်းပြည်နယ် မင်းတပ်မြို့၊ ရခိုင်ပြည်နယ် ကျောက်တော်မြို့တို့ကို လေကြောင်းမှ ဗုံးကြဲတိုက်ခိုက်ခဲ့သေးသည်။
အဆိုပါ တိုက်ခိုက်မှုများကြောင့် အရပ်သားထိခိုက်သေဆုံးမှုများ၊ နေအိမ်နှင့် ဘာသာရေးအဆောက်အအုံများ ပျက်စီးခဲ့သည်။
