မေ-၁၉၊ ၂၀၂၅။ ကျော်ဇော/People’s Spring
မကြာမီ အခြေခံပညာကျောင်းများဖွင့်လှစ်တော့မည်ဖြစ်ရာ ပညာသင်ကြားရေးကို နှောက်ယှက်ဟန့်တားသည့် မည်သူ့ကိုမဆို တားမြစ်အရေးယူသွားမည်ဟု ချင်းကာကွယ်ရေးတပ်- အရှို(CDF-Asho)က ယနေ့(မေလ ၁၉ ရက်) သတိပေး ထုတ်ပြန်သည်။
၂၀၂၅-၂၀၂၆ အခြေခံပညာသင်နှစ်အတွက် အခြေခံကျောင်းများ စတင်ဖွင့်လှစ်တော့မည်ဖြစ်ရာ ကျောင်းနေအရွယ် ကလေးသူငယ်များ ပညာသင်ကြားရန်လိုအပ်လျှက်ရှိကြောင်း တွေ့ရှိနေရသည်ဟု ဖော်ပြသည်။
သို့သော် စစ်ဆင်ရေးလှုပ်ရှားရာ နယ်မြေများနှင့် ထိစပ်လျှက်ရှိသော မကွေးတိုင်း၊ ငဖဲမြို့နယ်၊ တောင်ပေါ်ဒေသနှင့် မြေပြန့်ဒေသကျေးရွာများရှိ အခြေခံပညာကျောင်းများတွင် တာဝန်ထမ်းဆောင်လျှက်ရှိသည့် အခြေခံပညာအဆင့် ကျောင်းဆရာ၊ဆရာမများအား ခြိမ်းခြောက်ခြင်း၊ နှောက်ယှက်ဟန့်တားခြင်း၊ ဖမ်းဆီးထိန်း သိမ်းခြင်း၊ ပညာသင်ကြားမှု ကျောင်းကိစ္စများအား ဝင်ရောက်စွက် ဖက်ခြင်းအား လုံး၀ပြုလုပ်မည်မဟုတ်ကြောင်း၊ ထို့သို့ပြုလုပ်သူ မည်သူမဆိုအား တားမြစ်အရေးယူမည်ဖြစ်ကြောင်း CDF-Asho က သတိပေးသည်။
Public Service Announcement
“စစ်ရေးလှုပ်ရှားနယ်မြေထဲက ကျနော်တို့နဲ့ဆက် စပ်တဲ့ တောင်ပေါ်ဒေသ၊ မြေပြန့်ဒေသ အားလုံးကို ရည်ညွှန်းပါတယ်။ ရွာနာမည်တွေတော့ အ သေးစိပ် မဖော်ပြတော့ပါဘူးခင်ဗျာ”ဟု ပညာ ရေးဆိုင်ရာ သတိပေးချက်နှင့်စပ်လျဥ်းပြီး CDF-Asho မှ တာဝန်ရှိသူတစ်ဦးက ပြောသည်။
ထို့အပြင် ချင်းကာကွယ်ရေးတပ်-အရှို (CDF-Asho)အနေဖြင့် အရွယ်ရောင်ပြီးသည့် ကလေးငယ်တိုင်း ပညာသင်ကြားခွင့်ရမည်ဟူသည့်မူကို လက်ကိုင်ထားကြောင်းလည်း ၎င်းက မှတ်ချက်ပေးသည်။
ထို့ကြောင့် အခြေခံပညာအဆင့် ပညာရေးဝန် ထမ်းများအနေဖြင့် ကျောင်းနေအရွယ် ကလေးများအား စေတနာ၊ ဝါသနာ၊ အနစ်နာ (၃)ချက်ကို ခံယူအလေးထားလျှက် လွတ်လပ်စွာသင်ကြားမှု ပြုလုပ်ရန် CDF-Asho က မေတ္တာရပ်ခံထားသည်။
