မေ ၂၃၊၂၀၂၅။မိထက်/People’s Spring
ပဲခူးမြို့တွင် (၁၄)နှစ်အရွယ် Grade-7ကျောင်းသားအား ပြန်ပေးဆွဲသတ်ဖြတ်ခဲ့သူများသည် မူးယစ်ဆေးစွဲနေသူများဖြစ်ပြီး သံသယရှိသူသုံးဦးကို စစ်ကောင်စီ၏ ရဲများက ဖမ်းမိထား သည်။
ပဲခူးမြို့၊မဇင်းရပ်ကွက်၊မဟာစေတီ (၃)လမ်းမှ Grade-7ကျောင်းသားမောင်သက်နိုင်မင်းသည် မေလ ၂၀ရက် ညနေ ၅နာရီခန့်က ပျောက်ဆုံးသွားခဲ့ပြီး ၎င်း၏ရုပ်အလောင်းကို မေလ ၂၂ရက်တွင် ပြန်တွေ့ခဲ့ခြင်းဖြစ်သည်။
ခြေထောက်နှင့်လက်ကို လက်ပြန်ကြိုးတုပ်၍ ဦးခေါင်းအဝတ်အုပ်ကာ ရက်ရက်စက်စက်သတ်ဖြတ်ခံရခြင်းဖြစ်ပြီး ကျူးလွန်သူများသည် မူးယစ်ဆေးစွဲနေသူများဖြစ်သည်ဟု မြို့ခံတစ်ဦးက ပြောသည်။
Public Service Announcement
” ဆေးကြောင်ပြီးလျှောက်လုပ်တာ။ သတ်ထားတာ ရက်စက်တယ်။ ကလေးကိုဖမ်းခေါ်သွားပြီး ငွေငါးသိန်းတောင်းတာလည်း မှန်တယ်။ ပေး၊မပေးတော့မသိရဘူး။ သတ်တာလည်းဆေးကြောင်ပြီးသတ်ပစ်တာ”ဟု မဇင်းရပ်ကွက်ဒေသခံတစ်ဦးက ပြောသည်။
စစ်တပ်အာဏာသိမ်းပြီးနောက်ပိုင်း ပဲခူးမြို့ပေါ်တွင် မူးယစ်ဆေးအလွယ်တကူဝယ်ရရှိနိုင်ပြီး လူငယ်များကြားတွင် မူးယစ်ဆေးသုံးစွဲမှုအလွန်များပြားနေပြီဟု အဆိုပါမြို့ခံအချို့က ပြောသည်။
မောင်သက်နိုင်မင်းသည် Grade-7တက်မည့်ကျောင်းသားတစ်ဦး ဖြစ်သည်။ ၎င်းအား ကျောင်းနှင့်မသက်ဆိုင်တော့ကြောင်း ကျောင်းဘက်က ယနေ့အမိန့်စာ ပြန်ခဲ့သည်။
“ကလေးနာရေးက တစ်မျိုး။ ကျောင်းကဆရာမကပါ အမိန့်လာပြန်တယ်ဗျာ။ ကျောင်းဖွင့်ချိန်ဖြစ်တာလည်းမဟုတ်ဘူး”ဟု ဇင်းရပ်ကွက်ဒေသခံက ပြောသည်။
အဆိုပါအမှုကို ပဲခူးမြို့အမှတ်(၂)ရဲစခန်းက စစ်ဆေးနေပြီး အမျိုးသားသုံးဦးကို ဖမ်းဆီးထားသည်။
စစ်ကောင်စီထိန်းချုပ်ထားဆဲမြို့နယ်များတွင် ဓားပြမှု၊ ပြန်ပေးဆွဲမှု၊လုယက်သတ်ဖြတ်မှုများ ပိုဖြစ်နေပြီး ပြီးခဲ့သည့် ဧပြီနှင့် ယခုမေလအတွင်းမှာပင် မူဆယ်၊ မန္တလေး၊ရန်ကုန်၊ဖျာပုံမြို့တို့၌ ပြန်ပေးဆွဲ လူသတ်မှု ၅မှုထက်မနည်းဖြစ်ခဲ့သည်။
