Scorpio/People’s Spring
စစ်ကိုင်းငလျင်ကြီး လှုပ်ခတ်ခဲ့တာ မနက်ဖြန် မေလ(၂၈)ရက်နေ့ဆို နှစ်လတင်းတင်း ပြည့်ပါပြီ။ နှစ်လအကြာမှာကော မန္တလေးက ဘာတွေများ ပြောင်းလဲသွားပါပြီလဲ။
●အပြိုအပျက်တွေ ရှင်းနေရဆဲ
စက်ယန္တရားမလုံလောက်မှု၊ ငွေကြေးအခက်အခဲရှိမှုတွေကြောင့် ငလျင်ကြောင့် ပြိုကျသွားတဲ့ အဆောက်အဦးတွေဟာ နှစ်လပြည့်သည်အထိ ရှင်းလင်းနေရတုန်းပါ။ အိမ်တလုံးဖြိုချ ရှင်းလင်းမယ်ဆိုရင်ကျပ်သိန်းရာဂဏန်းအထိ ကုန်ကျမှာဖြစ်တဲ့အတွက် အိမ်ပြိုမိသားစုတွေဟာ အတော်အကျပ်ရိုက်နေကြပါတယ်။ “ပြန်ဆောက်ဖို့မပြောနဲ့ ဒီအပြိုတွေရှင်းဖို့ကို တစ်ရာကျော်လောက်ကုန်မှာမို့ မနည်းရှာနေရတယ်။”လို့ မန္တလေးမြို့ပေါ်က အိမ်ပြိုတဲ့အမျိုးသားတဦးက ပြောပါတယ်။
Public Service Announcement
●ရုပ်အလောင်းများ နှစ်လကြာတဲ့အထိ ထုတ်လို့မပြီးသေး
ငလျင်ကြီးလှုပ်ခတ်ခဲ့တာ နှစ်လပြည့်ခဲ့ပေမဲ့ ဒီကနေ့ မေလ(၂၇)ရက်နေ့အထိကို ရုပ်အလောင်းတွေ ထုတ်ယူလို့ မပြီးသေးပါဘူး။ ဒီကနေ့ မနက်ပိုင်းကတင် Sky Villa အဆောက်အဦး (B) အောက်က အမျိုးသမီး ရုပ်အလောင်း (၃)လောင်း ထုတ်ယူခဲ့တယ်လို့ မီးသတ်ဦးစီးဌာနကနေ ထုတ်ပြန်ထားပါတယ်။
●နောက်ဆက်တွဲငလျင်တွေနဲ့ မိုးရွာမှုတွေကြောင့် ကြောက်နေရ
နောက်ဆက်တွဲငလျင်ငယ်တွေဟာ အနည်းငယ်ပြင်းတာတွေလည်း လာနေသေးတာကြောင့် မန္တလေးမြို့ခံတွေ စိုးရိမ်နေကြပါတယ်။ ဒါ့အပြင် နောက်ဆက်တွဲငလျင်နဲ့ မိုးရွာသွန်းမှုတွေကြောင့် အိမ်ပြို၊ သစ်ပင်ပြိုတာတွေရှိပြီး လူသေဆုံးမှုတွေပါ ရှိနေတာကြောင့် မန္တလေးမြို့ခံတွေဟာ စိုးရိမ်မှုတွေနဲ့ ဖြတ်သန်းနေရပါတယ်။
●စစ်ကောင်စီဆီက အလှူငွေ အများစုမရသေး
ပုဂ္ဂလိက လာလှူတာတွေဆီကသာ အလှူငွေတွေရပေမဲ့ စစ်ကောင်စီက အလှူငွေတော့ မရသေးဘူးလို့ မန္တလေးက အိမ်ပြိုသူတွေက ပြောပါတယ်။ စစ်ကောင်စီဟာ နိုင်ငံတကာက လှူဒါန်းငွေတွေ အများအပြား ရရှိထားပေမဲ့ သူ့ကိုထောက်ခံပြီး စစ်အုပ်စုဝင်အများအပြားနေထိုင်တဲ့ နေပြည်တော်၊ မိတ္ထီလာတို့လောက်သာ ဦးစားပေး လှုပေးနေတယ်လို့လည်း ဒေသခံတွေက ပြောပါတယ်။
●စစ်ဆေးရေးတွေ ပြန်တင်းကြပ်လာတဲ့ စစ်ကောင်စီ
ငလျင်လှုပ်စဥ်က ခေတ္တရပ်သွားတဲ့ စစ်ကောင်စီရဲ့ စစ်ဆေးမှုတွေဟာ ငလျင်နှစ်လပြည့်မတိုင်ခင် မေလလယ်ထဲကစလို့ ပြန်လည်တင်းကြပ်လာခဲ့ပါတယ်။ စစ်ကောင်စီတပ်၊ ရဲနဲ့ ယာဥ်ထိန်းရဲတွေပါဝင်တဲ့ အဖွဲ့စုံစစ်ဆေးရေးအဖွဲ့တွေဟာ မန္တလေးမြို့တွင်းမှာ လေးဘက်လေးလံပိတ်ဆို့ပြီး ဆိုင်ကယ်သမားတွေကို ယာဥ်မောင်းလိုင်စင်အပါအဝင် စစ်ဆေးနေတယ်၊ ခြိမ်းခြောက်ငွေညှစ်နေတယ်လို့ မြို့ခံတွေက ပြောပါတယ်။
