စစ်ကိုင်းတိုင်း၊ အရာတော်မြို့နယ်၊ ရှောက်ခါးကျေးရွာတွင် စစ်ကောင်စီသတင်းပေးဒလန်နှင့် ပျူစောထီးအပါအဝင် ငါးဦးအသတ်ခံရပြီးနောက် အကြမ်းဖက်စစ်တပ်က ပြည်သူ့နေအိမ်(၁၁)လုံးနှင့် ဆိတ်တဲများကို မီးရှို့ဖျက်ဆီးသွားခဲ့ကြောင်း ဒေသခံများက ပြောသည်။
ယမန်နေ့ နိုဝင်ဘာ(၁၁)ရက်နေ့က အရာတော်မြောက်နယ် ရှောက်ခါးကျေးရွာကို အကြမ်းဖက်စစ်တပ်က အင်အား(၃၀)ကျော်ဖြင့် ဝင်ရောက်စီးနင်းခဲ့ပြီး ရှောက်ခါးရွာတွင်းရှိ ရွာခံတက်ကြွလှုပ်ရှားသူတချို့နှင့် ပြည်သူ့အိမ်များကို ဝင်ရောက်ဖျက်ဆီးပြီး မီးတင်ရှို့သွားခဲ့ကြောင်း၊ စစ်တပ်၏ မီးရှို့သွားမှုကြောင့် ရွာခံပြည်သူ့နေအိမ်ပေါင်း(၁၀)အိမ်ကျော် မီးရှို့ဖျက်ဆီးခံခဲ့ရသည်ဟု အရာတော်မြို့နယ်သတင်းမှန်ပြန်ကြားရေးက သတင်းထုတ်ပြန်သည်။
“နေ့ခင်း ၁၂ လောက်မှာဝင်လာပြီး မီးရှို့သွားတာလို့ပြောတယ်။ ကျွန်တော်တို့ရွာဘက်ကနေ လှမ်းကြည့်တာမီးခိုးတွေတက်လာတာ အတိုင်းသားမြင်နေရတယ်။” ဟု ဒေသခံတစ်ဦးကပြောသည်။
နိုဝင်ဘာ(၁၀)ရက်နေ့က ရှောက်ခါးမှ စစ်သတင်းပေးနှင့် ပျူစောထီး(၄)ဦးတို့ကို ဂဠုန်နင်ဂျာများနှင့် လင်းယုန်နင်ဂျာများက ရှင်းလင်းခဲ့ပြီးဖြစ်ကြောင်း အရာတော်နင်ဂျာ မောင်ဒေဝါ က ထုတ်ပြန်ခဲ့သည်။
Public Service Announcement
နိုဝင်ဘာလ ၁၁ ရက်နေ့တွင်လည်း ရှောက်ခါးကျေးရွာမှ ကြံ့ခိုင်ရေးပါတီ စည်းရုံးရေးမှူးလုပ်ခဲ့သည့် စစ်တပ်နှင့်ပတ်သက်နေသူ မော်ကြီးဆိုသူကို အရာတော်နင်ဂျာများအဖွဲ့ကပင် ထပ်မံရှင်းလင်းခဲ့သည်ဟု အသိပေးသည်။
အဆိုပါသတင်းပေးနှင့်ပျူစောထီးများသတ်ဖြတ်ခံရပြီးနောက် စစ်တပ်ကဝင်ရောက်မီးရှို့ခဲ့ခြင်းဖြစ်နိုင်ကြောင်း ဒေသခံများက ပြောသည်။
စစ်တပ်၏ အကြမ်းဖက်ဝင်ရောက် မီးရှိူ့နေမှုကြောင့် ရွာခံပြည်သူရာချီ ထွက်ပြေးတိမ်းရှောင်နေရသည်ဟု ဒေသခံများက ပြောသည်။
