မြို့ကာကင်းစခန်းအသိမ်းခံရပြီး​နောက် မြိုင်မြို့ပတ်ပတ်လည်ကို စစ်တပ်ဗုံးဆက်တိုက်ကြဲ

ဇူလိုင်-၁၁၊၂၀၂၅။ရဲခေါင်/People’s Spring

မြို့၏စစ်တပ်ကာကင်းစခန်းသိမ်းပိုက်ခံပြီးနောက်စစ်​ကောင်စီက မြိုင်မြို့ပတ်ပတ်လည်ကိုလေကြောင်းမှ ဆက်တိုက်ဗုံးကြဲနေကြောင်း ဒေသခံနှင့်စစ် ရေးသတင်းရင်းမြစ်များက လူထုနွေဦးသို့ ပြောသည်။

ယနေ့(ဇူလိုင် ၁၁ ရက်)နေ့လယ် ၁၂ နာရီ ခွဲ ခန့်ကစ၍ မြို့ဝန်းကျင်အနှံ့ဂျက်ဖိုက်တာများနှင့် ဗုံးအကြိမ်ကြိမ် ကြဲချ တိုက်ခိုက်နေခြင်းဟုသိရသည်။

“တနေ့က မြိုင်မှာဖြစ်တဲ့ကိစ္စ(စစ်ကောင်စီအထိုင်စွဲ ထားသည့် မြိုင်မြို့စီမံကိန်းရုံးကို တော်လှန်ရေးတပ် များသိမ်းပိုက်)ကြောင့် အဓိကဖြစ်တယ်”ဟု မြိုင်မြို့ခံတစ်ဦးက ​ပြောသည်။

Public Service Announcement

စစ်ကောင်စီက ဆက်တိုက်ဗုံးကြဲ​နေသဖြင့် ပြည်သူများ ဂရုစိုက်ရန်လည်း အညာမြေတပ်ပေါင်းစုက ထုတ်ပြန်ထားသည်။

“စိတ်ထင်သလိုကို ကြဲနေတာပါ။အခုကတော့ အကြိမ်ရေ တအားများတယ်။ဂျက်ဖိုက်တာ၊Y 12 နဲ့ပါရာမော်တာ အဲဒီသုံးမျိုးနဲ့လှည့်ကြဲနေတာ”ဟု အညာမြေတပ်ပေါင်းစု တာဝန်ရှိသူက ပြောသည်။

စစ်ကောင်စီ၏လေကြောင်းတိုက်ခိုက်မှုကြောင့် ထိခိုက်ပျက်စီးမှုအခြေအနေမသိရသေးပေ။

“ဒီကောင်တွေကမြို့ကိုကျနော်တို့ဝိုင်းထားတယ်ထင်ပြီးပတ်ကြဲနေတာ”ဟုမြိုင်မြို့နယ်အခြေစိုက် နဂါးနီအထူးတိုက်ခိုက်ရေးတပ်ဖွဲ့ ဝင်တစ်ဦးက ပြောသည်။

ဇူလိုင် ၉ ရက်နေ့ မနက် ၄ နာရီ မြိုင်မြို့ အရှေ့ပိုင်းရှိ မြို့ကိုကာထားသည့်မြိုင်-ပခုက္ကူသွားလမ်းပိုင်းတွင်ရှိသော စီမံကိန်းရုံးတွင် အထိုင်ချထားသော စစ်သားများကို PDF တပ်ပေါင်းစုက တိုက်ခိုက်သိမ်းပိုက်ခဲ့ပြီး သုံ့ပန်း ၁၂ ဦး ၊လက်နက် မျိုးစုံ ၁၃ လက်နှင့် ခဲယမ်းများသိမ်းဆည်းရရှိခဲ့သည်။

အဆိုပါစစ်ဆင်​ရေးကိုမုံရွာခရိုင်တပ်ရင်း(၈)၊မြိုင်ညီညွတ်ရေးတပ်ပေါင်းစု (9+) ၊ ဇာမဏီပြောက်ကြားတပ်ဖွဲ့၊တပ်ပေါင်းစု(Good Brother)၊ အညာဟီးရိုး လက်နက်ကြီးအဖွဲ့၊ ဂျော်ကာပြောက်ကြားတပ်ဖွဲ့ (ဒရုန်း)၊ ကင်ဒို (ဒရုန်း) ပေါက်၊ အညာမြေပြောက်ကြားတပ်ဖွဲ့ (ဒရုန်း)၊ Burma Revolution Ranger (BRR)၊ NFTA(မြောက်ပိုင်းကျားငါးကောင်အဖွဲ့)၊အညာမုန်တိုင်းအဖွဲ့၊တော်လှန်ပြောက်ကျားအဖွဲ့၊ Scorpion People Denfece Force တို့ဖြင့် ပူးပေါင်းတိုက်ခိုက်​ခဲ့ကြခြင်းဖြစ်သည်။

ဇူလိုင် ၁၀ ရက်နေ့ကလည်းမြိုင်မြို့သနပ်ရင်းရွာကို စစ်ကောင်စီ ၏လေကြောင်းတိုက်ခိုက်မှုကြောင့်၂ နှစ်အရွယ် ကလေးတစ်ဦးနှင့် ၄၀ ကျော်အရွယ် အရပ်သား တစ်ဦး သေဆုံးခဲ့ရသည်။