ထိုင်းနိုင်ငံ၊ ချင်းမိုင်မြို့က မြန်မာ အလုပ်သမား အများအပြားရှိတဲ့ စျေးတစ်ခုကို ဒေသ အုပ်ချုပ်ရေးမှူး အမိန့်နဲ့ အာဏာပိုင်တွေက စီးနင်းပြီး စုစုပေါင်း ၆ ဦးကို ဖမ်းဆီးခဲ့ပါတယ်။
ချန်တာရိုမှာရှိတဲ့ ချင်းမိုင် အမှတ်တရ စျေးထဲက စီးနင်းမှုတွေဟာ တရားဝင် စာရွက်စာတမ်းတွေ မရှိဘဲ အလုပ်လုပ်နေတဲ့ နိုင်ငံခြားသားတွေကို ရှာဖွေဖို့ ဖြစ်တယ်လို့ အာဏာပိုင်တွေက ပြောပါတယ်။ အဲဒီစျေးမှာ မြန်မာနိုင်ငံ အရပ်ရပ်က ထုတ်ကုန်တွေကို ရောင်းချတဲ့ မြန်မာ စျေးသည်တွေလည်း ရှိနေပါတယ်။
ချင်းမိုင်မှာ မြန်မာတွေ များပြားလာတာ၊ အဲဒီစျေးထဲမှာလည်း မြန်မာတွေ ပိုမိုထူထပ်လာတာတွေကို ထိုင်းလူမှုကွန်ရက် သုံးစွဲသူတွေကြား ဆွေးနွေး ဝေဖန်မှုတွေလည်း ရှိနေခဲ့ပါတယ်။ ဇူလိုင် ၁၆ ရက်နေ့မှာတော့ အုပ်ချုပ်ရေးမှူး နီရတ် ဖုန်ဆစ်တာဝေါင်ရဲ့ အမိန့်အရ စျေးထဲမှာ စီးနင်း ရှာဖွေမှုတွေ လုပ်ခဲ့တာလို့ ဆိုပါတယ်။
တရားမဝင် နိုင်ငံခြားသား အလုပ်သမားတွေ စျေးထဲမှာ ရှိနေတယ်ဆိုတဲ့ သတင်းအရ ရှာဖွေမှုတွေ လုပ်ခဲ့တာဖြစ်ပြီး စစ်ဆေးမှုတွေအရ နိုင်ငံခြားသား အလုပ်သမားတွေ ရောင်းချနေတဲ့ အစားအသောက် အရောင်းဆိုင် အများအပြားကို တွေ့ရှိခဲ့ကြောင်း တာဝန်ရှိသူတွေက ဆိုပါတယ်။
Public Service Announcement
စျေးထဲမှာ ခွင့်ပြုချက်မရှိဘဲ နိုင်ငံခြားသား အလုပ်သမားတွေ ငှားရမ်းထားသူ ဆိုင်ရှင် ၃ ဦးနဲ့ တရားဝင် စာရွက်စာတမ်း မရှိဘဲ အလုပ်လုပ်နေသူ နိုင်ငံခြားသား ၃ ဦးကို စိစစ်တွေ့ရှိခဲ့တယ်လို့လည်း အာဏာပိုင်တွေက ပြောပါတယ်။ အဲဒီ ၆ ဦးစလုံးကို ချန်တာရို ရဲစခန်းဆီ ခေါ်ဆောင်သွားပြီး ထိန်းသိမ်းထားပါတယ်။
စျေးအုပ်ချုပ်ရေး အဖွဲ့ကတော့ အာဏာပိုင်တွေက လုပ်ငန်းခွင် လုံခြုံရေးနဲ့ ဝန်ထမ်းမှတ်ပုံတင် ကိစ္စတွေ စစ်ဆေးဖို့ လာရောက်ခဲ့ပြီး ဥပဒေ စည်းမျဉ်းတွေနဲ့အညီ လုပ်ဆောင်ခဲ့တာတွေကို ကျေးဇူးတင်ကြောင်း ထုတ်ပြန်ခဲ့ပြီး ရှုပ်ရှုပ်ထွေးထွေး ဖြစ်သွားခဲ့တဲ့ အခြေအနေတွေကြောင့် စိတ်အနှောင့်အယှက် ကြုံခဲ့တဲ့ စျေးဝယ်သူတွေကိုလည်း တောင်းပန်ကြောင်း ထုတ်ပြန်ထားခဲ့ပါတယ်။
